ސްޕެއިންގެ ސްކޮޑުން ޓްރައޮރޭ ބާކީކޮށްފި

ޔުއެފާ ނޭޝަންސް ލީގުގައި ވާދަކުރަމުން އަންނަ ސްޕެއިންގެ ގައުމީ ފުޓްބޯޅަ ޓީމުގެ ސްކޮޑުން ވުލްވްސްގެ ތަރި އެޑަމާ ޓްރައޮރޭ ބާކީކޮށްފިއެވެ.

މުޅިން އަލަށް ސްޕެއިންގެ ސްކޮޑުން ޓްރައޮރޭ ޖާގަ ހޯދި ނަމަވެސް، ނޭޝަންސް ލީގުގައި ސްޕެއިނުން ކުޅުނު ފުރަތަމަ މެޗުގައިވެސް އޭނާއަށް ފުރުސަތު ލިބިފައެއް ނުވެއެވެ. އެ މެޗުގެ ސްކޮޑުން ޓްރައޮރޭ ބާކީކުރީ އޭނާގެ ހަށިގަނޑުން ކޮވިޑް-19 ގެ އަލާމާތްތައް ފެނުމާ ގުޅިގެންނެވެ. އަދި ފަހުން ހެދި ޕީސީއާރް ޓެސްޓުތަކުން ޓްރައޮރޭގެ ހަށިގަނޑުން ކޮވިޑް-19 ގެ އެންޓިބޮޑީ ފެނުމާ ގުޅިގެން، އޭނާ ވަނީ ސްކޮޑުން ބާކީކޮށްފައެވެ.

ރިޕޯޓުތައް ބުނާގޮތުން ޓްރައޮރޭ ސްޕެއިންގެ ސްކޮޑުން ބާކީކުރުމާއެކު، ޔުއެފާ ޕްރޮޓޮކޯލްގެ ދަށުން އޭނާ އެނބުރި އިންގްލެންޑަށް ދާނެއެވެ. އަދި އިންގްލެންޑަށް ގޮސް އައިސޮލޭޝަނުގައި 14 ދުވަސް ޓްރައޮރޭ ފުރިހަމަކުރާނެ ކަމަށްވެސް ރިޕޯޓުތައް ބުނެއެވެ.

ސްޕެއިންގެ 21 އަހަރުން ދަށުގެ ގައުމީ ފުޓްބޯޅަ ޓީމަށް މީގެ ކުރިން ކުޅެފައިވާ ޓްރައޮރޭއަށް ސްޕެއިންގެ ސީނިއާ ޓީމުން މިދިޔަ އަހަރު ނޮވެމްބަރު މަހުވެސް ފުރުސަތު ދިނެވެ. އެކަމަކު އެ ފަހަރު އަނިޔާގެ ސަަބަބުން އޭނާ ވަނީ ޓީމާ ވަކިވެފައެވެ. އެހެންކަމުން ޓްރައޮރޭ ބޭނުންނަމަ އާއިލީ ގޮތުން އޭނާއާ ގުޅުން އޮތް މާލީގެ ގައުމީ ފުޓްބޯޅަ ޓީމަށް ކުޅުމުގެ ފުރުސަތުވެސް އޭނާއަށް އެބައޮތެވެ. އެކަމަކު ސްޕެއިންގެ މީޑިއާ ރިޕޯޓުތައް ބުނާގޮތުން ޓްރައޮރޭގެ ވިސްނުން މިހާރު ހުރީ ސްޕެއިންގެ ޓީމަށް ކުޅުމަށެވެ.

މިދިޔަ ސީޒަނުގައި ވުލްވްސްގެ ޖާޒީގައި ޓްރައޮރޭ މޮޅު ކުޅުމެއް ދެއްކިއިރު، އޭނާ ހޯދުމަށް ޔޫރަޕްގެ ބޮޑެތި ކުލަބުތަކުން އަންނަނީ މަސައްކަތް ކުރަމުންނެވެ. މީގެ ކުރިން ބާސެލޯނާއަށްވެސް ކުޅުނު ޓްރައޮރޭ ވަނީ މިހާތަނަސް ވުލްވްސްއަށް ކުޅެދިން 90 މެޗުގައި ހަތް ލަނޑު ކާމިޔާބުކޮށްފައެވެ.

ލުއިސް އެންރީކޭގެ އިރުޝާދުގެ ދަށުން ކުޅެމުން އަންނަ ސްޕެއިން، ނޭޝަންސް ލީގުގެ ފުރަތަމަ މެޗުގައި ޖަރުމަނާ ދެކޮޅަށް ނުކުތްއިރު، އެ މެޗު ނިމުނީ 1-1 ން ދެ ޓީމު އެއްވަރުވެގެންނެވެ. މި މުބާރާތުގެ ދެވަނަ މެޗުގައި އާދީއްތަ ދުވަހުގެރޭ ސްޕެއިން ޔޫކްރޭނާ ބައްދަލުކުރާއިރު، މި މެޗު ފަށާނީ އާދީއްތަ ދުވަހުގެރޭ ރާއްޖެ ގަޑިން 23:45 ގައެވެ.