ސްޕެއިންގެ ގައުމީ ޓީމަށް ކުޅެން ފުރުސަތު ލިބުމަކީ ލިބޭ ވަރަށް ބޮޑު ފަހުރެއް ކަމަށް ބާސެލޯނާއަށް ކުޅެމުން އަންނަ ޖެރާޑް ޕީކޭ ބުނެފިއެވެ.
އަންނަ އަހަރު ރަޝިއާގައި ބާއްވާ ފީފާ ވޯލްޑްކަޕްގެ ކޮލިފައިންގައި އޮކްޓޯބަރު މަހު އަލްބޭނިއާ އަދި އިސްރާއިލްއާ ދެކޮޅަށް ސްޕެއިންއިން ކުޅޭ މެޗުތަކަށް ނެގި ސްކޮޑުން އުމުރުން 30 އަހަރުގެ ޕީކޭއަށް ފުރުސަތު ދީފައިވާއިރު އޭނާއަކީ ސްޕެއިންގެ ކެޓަލޯނިއާއަށް ނިސްބަތްވާ ކުޅުންތެރިޔެކެވެ. އަދި ކެޓަލޯނިއާއިން މިނިވަންކަން ހޯދުމަށް ކުރަމުން އަންނަ މަސައްކަތަށް ތާއިދުކޮށް މީޑިއާގައި ވާހަކަ ދެއްކުމާ ގުޅިގެން ޕީކޭއާ ދެކޮޅަށް ސްޕެއިންގެ ގައުމީ ޓީމުގެ ސަޕޯޓަރުން އަންނަނީ ނުރުހުން ފާޅުކުރަމުންނެވެ.
އެހެނަސް އޭނާއަށް ބޮޑެތި ފާޑުކިޔުންތަކެއް އަމާޒުވިޔަސް ޕީކޭ ބުނެފައި ވަނީ ސްޕެއިންގެ ގައުމީ ޓީމަށް ކުޅެން ފުރުސަތު ލިބުމަކީ ލިބޭ ވަރަށް ބޮޑު ފަހުރެއް ކަމަށާއި އޭނާ ސްޕެއިންގެ ގައުމީ ޓީމަށް ކޮންމެފަދަ ގުރުބާނީއެއް ވެސް ވާން ތައްޔާރަށް ހުރި ކަމަށެވެ. އަދި އަންނަ މަހު އަލްބޭނިއާ އާއި އިސްރާއިލްއާ ދެކޮޅަށް ކުޅޭ މެޗުތައް ކާމިޔާބުކޮށް ވޯލްޑްކަޕުން ޖާގަ ކަށަވަރު ކުރަން ބޭނުން ކަމަށާއި ގައުމީ ޓީމުގެ ސްކޮޑުން ޖާގަ ލިބުމުން އަންގައިދެނީ އޭނާ ގައުމީ ޓީމުގައި ދައްކާ ކުޅުމާ މެދު ކޯޗުގެ ފުރިހަމަ އިތުބާރާއި ހިތްހަމަޖެހުން އޮތުން ކަމަށް ވެސް ޕީކޭ ބުނެފައިވެއެވެ.
ސްޕެއިންގެ ގައުމީ ޓީމުގެ ކޯޗު ޖޫލިއަން ލޮޕްޓެގީވެސް ވަނީ ޕީކޭއާ ނުލާ ސްޕެއިންގެ ގައުމީ ޓީމު ފުރިހަމަ ނުވާނެ ކަމަށާއި އޭނާއަކީ އަބަދުވެސް ދަނޑުމަތީގައި އެންމެ އިތުބާރު ކުރެވޭ ކުޅުން ދައްކާ ކުޅުންތެރިޔެއް ކަމަށް ބުނެފައެވެ. އެހެނަސް ޕީކޭ ކެޓަލޯނިއާގެ މިނިވަންކަމާ ގުޅޭގޮތުން ކުރިން ޓްވީޓްއަށް ލޮޕްޓެގީ އެއްވެސް ބަހެއް ބުނެފައެއްނުވެއެވެ.
ސްޕެއިންގެ ގައުމީ ޓީމަށް 91 މެޗު ކުޅެދީފައިވާ ޕީކޭއަކީ ކެޓަލޯނިއާއަށް ނިސްބަތްވާ ކުޅުންތެރިޔެކެވެ. ސްޕެއިންގެ ސަރުކާރުން ފުރިހަމަ މިނިވަންކަން ހޯދުމަށް ކެޓަލޯނިއާގައި ވޯޓު ނަގަން ހަމަޖެހިފައިވާއިރު ޕީކޭ ވަނީ މިކަމަށް ތާއިދުކޮށް ޓްވީޓެއް ކޮށްފައެވެ. އެގޮތުން ހިޔާލު ފާޅުކުރުމުގެ މިނިވަންކަމަކީ ކޮންމެ ރައްޔިތަކަށް ވެސް އޮންނަން ޖެހޭނެ ހައްގެއް ކަމަށާއި އަދި ސްޕެއިންގެ މައި ސަރުކާރުން މި ވޯޓަށް ހުރަސް ނޭޅުމަށް ޕީކޭ ވަނީ ގޮވާލާފައެވެ.
ޕީކޭއަކީ އޭނާ ސޯޝަލް މީޑީއާގައި ފާޅުކުރާ ހިޔާލުތަކުގެ ސަބަބުން ބޮޑެތި ފާޑުކިޔުންތަކާ ކުރިމަތިލާން ޖެހިފައިވާ ކުޅުންތެރިޔަކަށްވާއިރު އޭނާ އަންނަނީ 2009 ވަނަ އަހަރުގެ ފަހުން އެ ޓީމުގެ ޑިފެންސްގައި މުހިންމު ރޯލެއް އަދާކުރަމުންނެވެ. އޭނާވަނީ ސްޕެއިންގެ ގައުމީ ޓީމާއެކު 2010 ވަނަ އަހަރުގެ ފީފާ ވޯލްޑްކަޕާއި 2012 ވަނަ އަހަރުގެ ޔޫރޯ މުބާރާތް ކާމިޔާބު ކޮށްފައެވެ.
