"ސަރުކާރު، މަޖިލިސް އަދި ކޯޓުތައް ކުޅިވަރު ތެރެއަށް ވަންނަނަމަ، ކުޅިވަރުތަކުން ސަސްޕެންޑް ކުރުމުގެ ފުރުސަތު ބޮޑު"
6 ސެޕްޓެމްބަރު 2020 | އާދީއްތަ 06:24ޓީޓީ އެސޯސިއޭޝަނުގެ އިންތިޚާބު މައްސަލަ ވަނީ ކޯޓަށް ހުށަހަޅާފައި
ކުޅިވަރާ ބެހޭ ވަޒީރު އަޙްމަދު މަޙްލޫފް
ސަރުކާރު، މަޖިލިސް އަދި ކޯޓުތައް ކުޅިވަރު ތެރެއަށް ވަންނަނަމަ، ކުޅިވަރުތަކުން ސަސްޕެންޑް ކުރުމުގެ ފުރުސަތު ބޮޑު ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.
މަޙްލޫފް މިހެން ވިދާޅުވީ އަންގާރަ ދުވަހު ބޭއްވުމަށް ހަމަޖެހިފައި އޮތް ޓޭބަލް ޓެނިސް އެސޯސިއޭޝަން އޮފް މޯލްޑިވްސްގެ އިންތިޚާބުގެ މައްސަލަ ފެންމަތިވެ، އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް) އިން ރާއްޖެ ސަސްޕެންޑް ކުރުމުގެ ބިރު އެބައޮތް ކަމަށް ޓީޓީ އެސޯސިއޭޝަނުން ބުނެފައިވާ ދަނޑިވަޅެއްގައެވެ.
ޓީޓީ އެސޯސިއޭޝަނުގެ ޖެނެރަލް ސެކްރެޓަރީ އިސްމާއިލް ސުޖާއު ދާދި ފަހުން ވިދާޅުވީ އެ އެސޯސިއޭޝަނުގެ އިންތިޚާބު ހުއްޓުވަން ކޯޓަށް މައްސަލަ ހުށަހަޅައިގެން ކުރިއަށްދާނަމަ، އައިޓީޓީއެފްއިން ރާއްޖެ ސަސްޕެންޑް ކުރުމުގެ ބިރު އެބައޮތް ކަމަށެވެ. ޓީޓީ އެސޯސިއޭޝަނުގެ އިންތިޚާބުގެ މައްސަލަ ކޯޓަށް ހުށަހަޅާފައިވާއިރު، ކޯޓުން ވަނީ އެ މައްސަލަ ބަލައިގަނެފައެވެ. ޓީޓީގެ މައްސަލަ ކޯޓަށް ހުށަހަޅާފައިވަނީ ހިންގާ ކޮމިޓީގައި ހިމެނިވަޑައިގަންނަވާ ކުރީގެ މަޝްހޫރު ޓީޓީ ކުޅުންތެރިޔާ އަލީ އާދަމް މަނިކް (ތާޅަފިލި އަލިބެ) އެވެ.
މިކަމާ ގުޅިގެން އާދީއްތަ ދުވަހު ކުޅިވަރާ ބެހޭ ވަޒީރު އަޙްމަދު މަޙްލޫފް ކުރެއްވި ޓްވީޓެއްގައި ވިދާޅުވީ ޒުވާން ޓީޓީ ޓީމު މިދިޔަ އަހަރު ރާއްޖެއަށް ރަންވަނަތަކެއް ހޯދާފައިވާއިރު، އައިޓީޓީއެފްއިން ރާއްޖެ ސަސްޕެންޑް ކޮށްފާނެ ކަމުގެ އިންޒާރުގެ ސިޓީގެ ކޮޕީއެއް އެމަނިކުފާނަށްވެސް ލިބިފައިވާ ކަމަށެވެ. އަދި ސަރުކާރު، މަޖިލިސް އަދި ކޯޓުތައް ކުޅިވަރު ތެރެއަށް ވަންނަނަމަ، ކުޅިވަރުތަކުން ސަސްޕެންޑް ކުރުމުގެ ފުރުސަތު ބޮޑު ކަމަށްވެސް ވަޒީރު ވަނީ ވިދާޅުވެފައެވެ.
މީގެ ކުރިން މިދިޔަ އޮގަސްޓް މަހު ރައްޔިތުންގެ މަޖިލީހުގައި ވާހަކަދައްކަވަމުން ވަޒީރު ވިދާޅުވީ ޓީޓީގެ އިންތިޚާބާ ގުޅޭ ގޮތުން ސްޕޯޓްސް ކޮމިޝަނާއި ސްޕޯޓްސް ކައުންސިލަށް މައްސަލަތަކެއް ހުށަހަޅާފައިވާ ކަމަށާއި، އެހެން ނަމަވެސް އަސާސީ ގަވާއިދުގައިވެސް އަދި ގެޒެޓްކޮށްފައިވާ އިންތިޚާބާ ބެހޭ އިއުލާންގައި އެއްވެސް މައްސަލައެއް ނެތް ކަމަށެވެ.
ރާއްޖޭގެ ޓީޓީ އެސޯސިއޭޝަން ސަސްޕެންޑް ވެދާނެ ކަމަށް އެ އެސޯސިއޭޝަނުން ބުނި ނަމަވެސް، ތާޅަފިލި އަލިބެ ހޮނިހިރު ދުވަހު ނެރުއްވި ބަޔާނެއްގައި ބުނީ އިންސާފު ހޯދުމަށް ކުރެވޭ މަސައްކަތާއި ދެކޮޅަށް ބައެއް ފަރާތްތަކުން ދައްކާ ވާހަކަތަކުގެ ތެރޭގައި އެކަމުގެ ސަބަބުން ޓީޓީގެ ބައިނަލްއަގުވާމީ އިދާރާ ކަމަށްވާ އައިޓީޓީއެފްއިން ރާއްޖޭގެ ޓީޓީ އެސޯސިއޭޝަނާ މެދު ފިޔަވަޅު އަޅައި، އަދި އެފިޔަވަޅުތަކުގެ ސަބަބުން ރާއްޖޭގެ ޓީޓީ ސަސްޕެންޑްވެދާނެ ކަމަށް ބުނެ ދޮގު މައުލޫމާތު ފަތުރަމުން ގެންދާ ކަމަށެވެ. އަދި އެއީ ކަނޑައެޅިގެން ކޯޓުގައިވާ މައްސަލައަށް ނުފޫޒު ފޯރުވަން ކުރަމުންދާ މަސައްކަތެއް ކަމަށްވެސް ވަނީ ވިދާޅުވެފައެވެ.
ޓީޓީ އެސޯސިއޭޝަނުގެ އިންތިޚާބު މައްސަލަ ކޯޓުގައި އޮތްއިރު، އަންނަ އަންގާރަ ދުވަހު އެސޯސިއޭޝަނުގެ އިންތިޚާބު ބޭއްވުމަށް މިހާރު ވަނީ ނިންމާފައެވެ. މި އިންތިޚާބުގައި މިހާރުގެ ރައީސް އަލީ ރަޝީދު އާއި ތޯހާ ސަލީމް އަދި މުޙައްމަދު ޖަލާލް ވާދަކުރައްވާއިރު، ޖަލާލުގެ ނަން އަނބުރާ ނެގުމަށް އޭނާ ނިންމާފައިވާ ކަމަށް ވަނީ މައުލޫމާތު ލިބިފައެވެ.
ޓީޓީ އެސޯސިއޭޝަނުގެ އިންތިޚާބުގައި ރައީސް އާއި ނައިބު ރައީސްގެ އިތުރުން ހަޒާންދާރުގެ މަގާމާއި، ފިރިހެން އަދި އަންހެން މެންބަރުން ތަމްސީލްކުރާ ގޮނޑި އާއި، ކުލަބުތަކާއި ބެލެނިވެރިން ތަމްސީލުކުރާ ގޮނޑިއަށްވެސް މެންބަރުން އިންތިޚާބު ކުރާނެއެވެ. މި އިންތިޚާބުގައި 15 ކުލަބަކާއި، 270 މެންބަރުން ވޯޓުލާނެ ކަމަށާއި، މިހާރުގެ ހާލަތާއެކު ވޯޓުލުމުގެ ކަންކަން ކުރިއަށްގެންދާނެ ގޮތެއް ނިންމާނީ ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ލަފާގެ މަތިން ކަމަށް ޓީޓީ އެސޯސިއޭޝަނުން ބުނެއެވެ.
