ޖިނާއީ އިޖުރާއަތުގެ ގާނޫނު އިސްލާހު ކުރުން: 130 މާއްދާ ހިމެނޭ ބިލް މަޖިލީހުން ފާސްކޮށްފި
ޖިނާއީ އިޖުރާއަތުގެ ގާނޫނަށް ސަރުކާރުގެ ފަރާތުން ހުށަހެޅި އިސްލާހު ގެނައުމުގެ ބިލްގައި 130 މާއްދާއެއް އެކުލެވޭ
ރައްޔިތުންގެ މަޖިލީހުގެ ޖުޑީޝަރީ ކޮމެޓީގެ ބައްދަލުވުމެއްގެ ތެރެއިން: ޖުޑީޝަރީ ކޮމެޓީއަކީ މުޅިންއަލަށް މިހާރު ހިނގަމުންދާ 19 ވަނަ މަޖިލީހުން އުފެއްދި ދާއިމީ ކޮމެޓީއެއް
ޖިނާއީ އިޖުރާއަތުގެ ގާނޫނަށް ސަރުކާރުގެ ފަރާތުން ހުށަހެޅި 130 މާއްދާގެ މައްޗަށް އެކުލެވޭ އިސްލާހު ގެނައުމުގެ ބިލް ރައްޔިތުންގެ މަޖިލީހުން ފާސްކޮށްފި އެވެ.
ރައްޔިތުންގެ މަޖިލީހުން އާދިއްތަ ދުވަހު ބޭއްވި ޖަލްސާގައި ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލް، ޖުޑީޝަރީ ކޮމެޓީން ނިންމި ގޮތުގެ ރިޕޯޓަށް ހުށަހެޅި އިސްލާހުތަކާއެކު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 59 މެމްބަރުންގެ އިއްތިފާގުން ނެވެ.
ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ދެ ބިލެއް ހުށަހަޅާފައި ވެއެވެ. އެއީ، ހިންނަވަރު ދާއިރާގެ މެމްބަރު ޖީހާން މަހްމޫދު ހުށަހެޅުއްވި ބިލަކާއި ސަރުކާރުގެ ފަރާތުން މަތިވެރި ދާއިރާގެ މެމްބަރު ހަސަން ޒަރީރު ހުށަހެޅުއްވި ބިލެކެވެ.
ޖީހާން މަހްމޫދު ހުށަހަޅުއްވާފައިވާ ބިލްގައި ހިމަނާފައިވަނީ، އެންމެ މާއްދާއެކެވެ. އެއީ ޖިނާއީ ބޮޑު ކުށެއްގެ ގޮތުގައި ކުޑަކުދިންނަށް ޖިންސީ ގޯނާކުރުން ހިމެނުމުގެ ގޮތުން، ޖިނާއީ އިޖުރާއަތުގެ ގާނޫނުގެ 22 ވަނަ މާއްދާއަށް ހުށަހަޅާފައިވާ އިސްލާހެކެވެ.
ސަރުކާރުގެ ފަރާތުން ހަސަން ޒަރީރު ހުށަހަޅުއްވާފައިވާ ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލްގައި 130 މާއްދާ އެކުލެވިގެންވާއިރު، އެ ގާނޫނުގެ 22 ވަނަ މާއްދާގައި، ޖިނާއީ ބޮޑު ކުށެއްގެ ގޮތުގައި ކުޑަކުދިންނަށް ޖިންސީ ގޯނާކުރުމުގެ ކުށް ހިމެނުމަށްވެސް އިސްލާހު ހުށަހަޅުއްވާފައި ވެއެވެ.
އެހެންކަމުން، ޖީހާން ހުށަހެޅުއްވި އިސްލާހު، ސަރުކާރުގެ ފަރާތުން ޒަރީރު ހުށަހެޅުއްވި އިސްލާހު ގެނައުމުގެ ބިލްގައި ހިމެނޭތީ، ކޮމެޓީން ނިންމީ ދެ ބިލް އެއްކޮށްލައިގެން ކުރިއަށް ގެންދިއުމަށެވެ.
ޖިނާއީ އިޖުއާރަތުގެ ގާނޫނަކީ 213 މާއްދާގެ މައްޗަށް އެކުލެވޭ ޖިނާއީ އަދުލުގެ ނިޒާމުގެ އެންމެ މުހިއްމު އެއް ގާނޫނެވެ.
ޖިނާއީ އަދުލުގެ ނިޒާމު އިތުރަށް ހަރުދަނާ ކުރުމުގެ ގޮތުން، އެގާނޫނަށް 130 މާއްދާ ހިމެނޭ އިސްލާހު ގެނައުމުގެ މި ބިލް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅުއްވާފައިވަނީ 17 މާރޗް 2020 ވަނަ ދުވަހު ބޭއްވި މަޖިލީހުގެ ޖަލްސާާގަ އެވެ.
