އިތުރު 125 މީހަކު ކޮވިޑް-19ށް ޕޮޒިޓިވްވެއްޖެ
106 މީހުން ޕޮޒިޓިވްވެފައި ވަނީ މާލެ ސަރަހައްދުން
ސާމްޕަލް ނެގުމުގައި އާރްއާރް ޓީމުން ހަރަކާތްތެރިވަނީ
ރާއްޖެ އިން އިތުރު 125 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން މައުލޫމާތުދޭ ގޮތުގައި ހޮނިހިރު ދުވަހު ޕޮޒިޓިވްވި މީހުންގެ ތެރެއިން 106 މީހުން ޕޮޒިޓިވްވެފައި ވަނީ މާލެ ސަރަހައްދުންނެވެ. އަދި އަތޮޅުތެރޭގެ ރަށްތަކުން ޕޮޒިޓިވްވެފައި ވަނީ 19 މީހުންނެވެ. އޭގެތެރެއިން 112 މީހުންނަކީ ދިވެހިން ކަމަށާއި 13 މީހުންނަކީ ބިދޭސީން ކަމަށް އެޗްޕީއޭ އިން ބުނެއެވެ.
ރާއްޖެ އިން ޕޮޒިޓިވްވި މީހުންގެ ޖުމްލަ އަދަދު މިހާރު 8486ށް އަރާފައިވާ އިރު، ބައްޔަށް ފަރުވާ ހޯދަމުން ދަނީ 2629 މީހުންނެވެ. އަދި ބަލިޖެހުނު 5822 މީހުން ވަނީ ބަލިން ރަނގަޅުވެފައެވެ.
ކޮވިޑް-19 އަށް ފަރުވާ ހޯދަމުންދާ މީހުންގެ ތެރެއިން 168 މީހަކަށް ހޮސްޕިޓަލްގައި އެޑްމިޓްކޮށްގެން ފަރުވާދެމުންދާ އިރު، 1235 މީހުން ތިބީ މިވަގުތު އައިސޮލޭޝަން ފެސިލިޓީތަކުގައެވެ.
އެޗްޕީއޭ އިން ވަނީ މިހާތަނަށް 119،460 ސާމްޕަލް ނަގާފައެވެ.
