ނޫސްވެރިންގެ ޖަމިއްޔާގެ ރައީސަކަށް ހަމްދޫން، ނައިބު ރައީސަކަށް ރިފްޝާން
5 ސެޕްޓެމްބަރު 2020 | ހޮނިހިރު 16:45ޖުމްލަ 6 މެމްބަރެއް އިންތިހާބުކޮށްފައިވޭ
މޯލްޑިވްސް ޖާރނަލިސްޓް އެސޯސިއޭޝަން (އެމްޖޭއޭ)ގެ ހިންގާ ކޮމިޓީ
މޯލްޑިވްސް ޖާރނަލިސްޓް އެސޯސިއޭޝަން (އެމްޖޭއޭ) ގެ ހިންގާ ކޮމިޓީގެ އިންތިހާބު ބާއްވައިފިއެވެ.
ރާއްޖޭގެ ހުރިހާ މީޑިޢާތަކެއްގެ ނޫސްވެރިން ހިމެނޭ ގޮތުން ހިންގާ މި ޖަމިއްޔާއަށް މެމްބަރުން އިންތިހާބު ކޮށްފައިވަނީ އާދީއްތަ ދުވަހު މެސެޖިން އެޕް، ޓެލެގްރާމް މެދުވެރިކޮށެވެ.
ޖުމްލަ 6 މެމްބަރެއް އިންތިހާބު ކޮށްފައިވާއިރު ރައީސަކަށް އިންތިހާބު ވެފައިވަނީ މިހާރު ނޫހުގެ ނޫސްވެރިޔާ މުހައްމަދު ހަމްދޫންއެވެ. އަދި ނައިބު ރައީސް އަކަށް އަލީ ރިފްޝާން އިންތިހާބު ވެފައިވާއިރު ހިންގާ ސެކަރެޓަރީ އަކަށް އަހުމަދު ނާއިފް ވަނީ އިންތިހާބުވެފައެވެ. މީގެއިތުރުން ހަޒާންދާރަކަށް ނާޒިމް ހަސަން އިންތިހާބުވިއިރު އާންމު މެމްބަރުންގެ ތެރެއިން އިންތިހާބު ވެފައިވާ ދެ މެމްބަރުންނަކީ މުހައްމަދު ޖުނައިދު ސަލީމް އާއި ފާތުމަތު ސާޔާ އަހުމަދެވެ.
އެމްޖޭއޭ އިން ނެރުނު ބަޔާނެއްގައި ބުނީ އަލަށް އިންތިހާބުވި ހިންގާ ކޮމެޓީން ރާއްޖޭގެ ނޫސްވެރިންގެ ހައްގަށް ވަކާލާތުކޮށް، މިނިވަން ނޫސްވެރިކަން ދިރުވައި ދަމަހައްޓައި، ކުރިއެރުވުމަށް މަސައްކަތް ކުރާނެ ކަމަށް އުއްމީދު ކުރާ ކަމަށެވެ.
2009 ވަނަ އަހަރު އުފަންވި އެމްޖޭއޭއިން ވަނީ ދިވެހި ނޫސްވެރިކަމަށް ދިމާވި އެތަކެއް ގޮންޖެހުމަކަށް މީގެ ކުރިން އެޑްރެސްކޮށް އަޑުއުފުލާ އެކަމުގައި ގިނަ ކާމިޔާބީތަކެއް ވެސް ހާސިލު ކޮށްފައެވެ. އަދި ދިވެހި ނޫސްވެރިންނަށް ތަމްރީނާއި ކިޔެވުމުގެ ގިނަ ފުރުސަތުތަކެއް ވެސް ވަނީ ހޯދައިދީފައެވެ. މި ޖަމިއްޔާގެ މަސައްކަތް އަލުން ފަށާފައި މިވަނީ ގިނަ އަހަރުތަކެއްގެ މެދުކެނޑުމަކަށް ފަހުއެވެ.
