އައްޑޫސިޓީގައި ދޮންދީނީގެ އާބާދީ ބެލުމަށް ސާވޭއެއް ކުރިއަށް ގެންދަނީ!
5 ސެޕްޓެމްބަރު 2020 | ހޮނިހިރު 11:49މިއީ ދޮންދީނީގެ އާބާދީ ބެލުމަށް ފުރަތަމަ ފަހަރަށް ކުރިއަށް ގެންދާ ސަރވޭ
ދޮންދީނިއަކީ ރާއްޖޭގައި ހިމާޔަތް ކޮށްފައިވާ ދޫންޏެއް
އައްޑޫ ސިޓީގައި ދޮންދީނީގެ އާބާދީ ބެލުމަށް ސާވޭއެއް ކުރިއަށް ގެންދަން ނިންމާފައިވާ ކަމަށް އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އިން ބުނެފި އެވެ.
މިއީ ދޮންދީނީގެ އާބާދީ ބެލުމަށް ފުރަތަމަ ފަހަރަށް ކުރިއަށް ގެންދާ ސަރވޭއެކެވެ.
އީޕީއޭ އިން ބުނީ ދޮންދީނީގެ އާބާދީ ބަލަން ހަދާ ސިޓިޒަން ސައިންސް ސާވޭގައި އެއްވެސް ތަޖުރިބާއެއް ނެތް ނަމަވެސް ބައިވެރިވެވޭނެ ކަމަށެވެ.
އެގޮތުން ސާވޭގައި ބައިވެރިވުމަށް އޮންލައިންކޮށް ފޯމް ފުރުމަށް ވަނީ އެދިފައެވެ.
ސާވޭގައި ބައިވެރިވާން ބޭނުންވާ ފަރާތްތަކަށް މިހާރު އެފުރުސަތު ވަނީ ހުޅުވާލާފައެވެ.
އީޕީއޭ، އާއި އައްޑޫ ނޭޗާ ޕާކް އަދި އައްޑޫ ސިޓީ ކައުންސިލް ގުޅިގެން ކުރިއަށްގެންދާ މިސާރވޭ މިމަހުގެ 15ން 30ގެ ނިޔަލަށް ކުރިއަށް ގެންދާނެއެވެ.
އައްޑޫ ސިޓީގެ ދޮންދީނީގެ އާބާދީ ދެނެގަތުމަށް ސާވޭއެއް ކުރިއަށް ގެންދަން ނިންމާފައިވާއިރު މިއީ ރާއްޖޭގައި ހަމައެކަނި އައްޑު އަތޮޅުގައި އުޅޭ ޚާއްސަ ދޫންޏެކެވެ. ގައިގައި ހުންނަ ފަތުގައި ސާފު ހުދުކުލަ ހުންނަ މި ދޫނީގެ ތުމުގައި ހުންނަނީ ކަޅު ކުލައެވެ. މިދޫންޏަކީ ކުދިމަސް ކައި އުޅޭ ދޫންޏެކެވެ. އަދި މިދޫނި ނިދާ ދިރިއުޅެ ހަދަނީ ގަހުގެ އޮފީގައެވެ.
ގާތްގަނޑަކަށް 18 އަހަރު ދިރިއުޅޭ މިދޫންޏަކީ ހިމާޔަތް ކުރެވިފައިވާ ދޫންޏެކެވެ.
