ދިވެހިރާއްޖޭގެ ކަނޑުމަހުގެ މެނޭޖްމަންޓް ޕްލޭންއަށް އާންމުންގެ ހިޔާލު ހުށަހެޅުމުގެ ފުރުސަތު މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެފްރިކަލްޗަރ އިން ހުޅުވާލާފިއެވެ.
މަސްވެރިކަމުގެ އެކި މެނޭޖްމަންޓް ޕްލޭންތަކަށް ފިޝަރީޒް މިނިސްޓްރީ އިން އަންނަނީ އާންމުންގެ ހިޔާލު ހޯދުމަށް ހުޅުވާލަމުންނެވެ. މިނިސްޓްރީ އިން ބުނީ ކަނޑުމަހުގެ މެނޭޖްމަންޓް ޕްލޭން އަށް އާންމުންގެ ހިޔާލު ހުށަހެޅުމަށް ފުރުސަތު މި މަހުގެ 9 ވަނަ ދުވަހުގެ ނިޔަލަށް ހުޅުވާލާފައިވާ ކަމަށެވެ. އަދި ހިޔާލު ހުށަހެޅުމަށް ބޭނުންވާ ފަރާތްތަކުން މިނިސްޓްރީ އިން ކަނޑައަޅާފައިވާ ފޯމު ފުރުމަށް ފަހު މިނިސްޓްރީ އިން ކަނޑައަޅާފައިވާ އީމެއިލް އަށް މެއިލް ކުރުމަށް ވަނީ އަންގާފައެވެ.
ފިޝަރީޒް މިނިސްޓްރީ އިން ވަނީ މީގެ ކުރިން ވެސް އެ މިނިސްޓްރީއިން ހަދަމުންދާ އިތުރު ޕްލޭންތަކަށް ވެސް އާންމުންގެ ހިޔާލު ހޯދުމަށް ހުޅުވާލާފައެވެ. އެގޮތުން ދިވެހިރާއްޖޭގެ ފާނަ މެނޭޖްކުރުމުގެ ޕްލޭން އާއި ދިވެހިރާއްޖޭގެ ހުއިފިލަނޑާ މެނޭޖްކުރުމުގެ ޕްލޭންގެ އިތުރުން ދިވެހިރާއްޖޭގެ ހިބަރު މަސްވެރިކަން މެނޭޖްކުރުމުގެ ޕްލޭން ހިމެނެއެވެ. މި ޕްލޭންތަކަށް ހިޔާލު ހުށަހެޅުމުގެ ޕްލޭން މި މަހުގެ ހަވަނަ ދުވަހުގެ ނިޔަލަށް ވަނީ ހުޅުވާލާފައެވެ.
މި ސަރުކާރު އައި ފަހުން ރާއްޖޭގެ މަސްވެރިކަން ކުރިއަރުވާ ޒުވާން މަސްވެރިން މަސްވެރިކަމުގެ ސިނާއަތަށް ނެރުމަކީ ސަރުކާރުގެ އަމާޒެވެ. އަދި މަސްވެރިންނަށް އިތުރު ފުރުސަތުތައް ހޯދައިދިނުމާއި، މަސްވެރިކަމުގެ ސިނާއަތް ކުރިއެރުވުމަށް އާންމުންގެ ހިޔާލު ފިޝަރީޒް މިނިސްޓްރީ އިން އަންނަނީ މަސައްކަތް ކުރަމުންނެވެ.
