އެތުލެޓިކޯގެ ކޮސްޓާ އާއި އަރިއަސް ކޮވިޑް-19 އަށް ޕޮޒިޓިވް ވެއްޖެ

އެތުލެޓިކޯ މެޑްރިޑަށް ކުޅެމުން އަންނަ ސްޕެއިންގެ ފޯވާޑް ޑިއޭގޯ ކޮސްޓާ އާއި ކޮލަމްބިއާގެ ޑިފެންޑަރު ސަންޓިއާގޯ އަރިއަސް ކޮވިޑް-19 އަށް ޕޮޒިޓިވް ވެއްޖެއެވެ.

ބުރާސްފަތި ދުވަހުގެ ވަގުތެއްގައި އެތުލެޓިކޯއިން ވަނީ އެ ދެ ކުޅުންތެރިން ކޮވިޑް-19 އަށް ޕޮޒިޓިވްވިކަން ކަށަވަރުކޮށްދީފައެވެ.

އެތުލެޓިކޯއިން ކުރި ޓްވީޓެއްގައި ބުނީ ޕްރީ-ސީޒަން ފެށުމުގެ ގޮތުން އެ ކުލަބުގެ ކުޅުންތެރިންނާއި އޮފިޝަލުން ބުރާސްފަތި ދުވަހު ކޮވިޑް-19 އަށް ޓެސްޓު ކޮށްފައިވާ ކަމަށެވެ. އަދި މި ޓެސްޓުތަކުގައި ބައިވެރިނުވާ ކުޅުންތެރިންނަކީ މިވަގުތު އިންޓަނޭޝަނަލް ޑިއުޓީގައި ތިބި ކުޅުންތެރިންގެ އިތުރުން ކޮސްޓާ އާއި އަރިއަސް ކަމަށެވެ. އަދި ކޮސްޓާ އާއި އަރިއަސް ކޮވިޑް-19 އަށް ޕޮޒިޓިވްވީ ޗުއްޓީ ހޭދަކުރަން ގޮސް އުޅުމުގެ ތެރޭގައި ކަމަށާއި، އެ ދެ ކުޅުންތެރިން މިހާރު އައިސޮލޭޓް ކޮށްފައިވާ ކަމަށްވެސް އެތުލެޓިކޯއިން ވަނީ ބުނެފައެވެ.

އެތުލެޓިކޯއިން އެ ކުލަބުގެ ދެ ކުޅުންތެރިން ކަމަށްވާ ކޮސްޓާ އައި އަރިއަސް ކޮވިޑް-19 އަށް ޕޮޒިޓިވް ވިކަން ހާމަކުރި ނަމަވެސް، އެ ދެ ކުޅުންތެރިންގެ ހަށިގަނޑުންވެސް ވައިރަހުގެ އަލާމާތެއް ފެނިފައިނުވާ ކަމަށް ރިޕޯޓުތައް ބުނެއެވެ.

ކުރިއަށް އޮތް އައު ސީޒަނަށް އެތުލެޓިކޯއިން އެ ކުލަބުގެ ޕްރީ-ސީޒަން ހުކުރު ދުވަހު ފަށާއިރު، ފަރިތަކުރުންތަކުގައި ކޮސްޓާ އާއި އަރިއަސްއަށް ބައިވެރިވެވޭނީ ކަރަންޓީން ޕްރޮޓޮކޯލްގެ ދަށުން އައިސޮލޭޝަނުގައި 14 ދުވަސް ހުރުމަށްފަހު ވައިރަހަށް ނެގެޓިވް ވުމުންނެވެ.

ސްޕެނިޝް ލީގުގެ އައު ސީޒަން ފެށުމަށް ތާވަލުކޮށްފައިވަނީ މި މަހުގެ 11 ވަނަ ދުވަހުއެވެ.