އިހަވަންދޫ އަށް ބިދޭސީން އެތެރެ ކުރުމަށް އަމަލު ކުރާނެ ގޮތުގެ ޚާއްސަ އުސޫލެއް އެކުލަވާލައިފި
3 ސެޕްޓެމްބަރު 2020 | ބުރާސްފަތި 17:00ކައުންސިލްގެ ހުއްދައާ ނުލާ ބިދޭސީން ރަށަށް ނޭރުވޭނެ
ހއ. އިހަވަންދޫ، ހުރިހާ ފަރާތްތަކުން ވެސް އުސޫލާ އެއްގޮތަށް އަމަލު ކުރުމަށް ކައުންސިލުން އެދިފައިވޭ
ހއ. އިހަވަންދޫއަށް ބިދޭސީން އެތެރެ ކުރުމަށް އަމަލު ކުރާނެ ގޮތުގެ ޚާއްސަ އުސޫލެއް އެކުލަވާލައިފިއެވެ.
އިހަވަންދޫ ކައުންސިލުން ބުނީ ރަށުގެ އިޖުތިމާއީ ހަމަޖެހުން ހިފެހެއްޓުމަށާއި އިގުތިސާދީ ފުއްދުންތެރިކަން ގާއިމު ކުރުމަށާއި އާއްމު އިޖުތިމާއީ މައްސަލަތައް ކުޑަކުރުމަށް، ރަށުގެ ވެއްޓަކީ ބެލެހެއްޓެނިވި ތަނެއްގެ ގޮތުގައި ހެދުމަކީ މުހިއްމު އިސްކަމެއް ދީގެން ކުރަންޖެހޭ ކަމެއް ކަމަށް ފެންނަ ކަމަށެވެ.
ކައުންސިލުން ބުނީ ރަށުގެ އާއްމު މަސްލަހަތާއި ގުޅުން ހުރި މައްސަލަތަކަށް އަވަސް ފިޔަވަޅު އެޅޭނެ ނިޒާމެއް ގާއިމު ކުރުމަށް ބިދޭސީން ރަށަށް އެތެރެ ކުރުމާއި އަދި ރަށުގައި ގެންގުޅޭ ބިދޭސީންނާއި މެދު އަމަލުކުރާނެ ގޮތުގެ އުސޫލުތައް ކަނޑައަޅާފައިވާ ކަމަށެވެ. އަދި އެފަދަ ކަންކަމާއި ޚިލާފުވާ ފަރާތްތަށް، "ދިވެހިރާއްޖޭގެ އިދާރީ ދާއިރާތައް ލާމަރުކަޒު ކުރުމާއި ގުޅޭ ޤާނޫނު" ގެ 143 ވަނަ މާއްދާގެ ދަށުން ކައުންސިލުން ކުރި އަމުރަކާ ޚިލާފުވެއްޖެ ކަމަށް ކަނޑައަޅާ ޖޫރިމަނާ ކުރުމަށް ކައުންސިލްގެ 03 ވަނަ ދައުރުގެ 112 ވަނަ އާންމު ޖަލްސާ އިން ނިންމާފައިވާ ކަމަށް ކައުންސިލުން ބުނެއެވެ.
ކައުންސިލުން ބުނީ ރަށަށް ބިދޭސީން އެތެރެ ކުރަން ބޭނުންވާ ފަރާތްތަކުން ކައުންސިލަށް ހުށަހަޅާ ހުއްދަ ހޯދުމަށްފަހު ނޫނީ ރަށަށް ބިދޭސީން އެތެރެ ނުކުރެވޭނެ ކަމަށާއި، ބިދޭސީން ރަޖިސްޓަރީ ވުމަށް އެދޭ ފޯމު ކައުންސިލްގެ އިދާރާއިން ލިބޭނެ ކަމަށެވެ. ކައުންސިލްގެ ހުއްދަނެތި ގަވާއިދާ ހިލާފަށް ބިދޭސީން ގެންނަ އުޅަނދުފަހަރުގެ ވެރިފަރާތް އަދި ކެޕްޓަން އުސޫލުގެ ދަށުން ޖޫރިމަނާ ކުރާނެ ކަމަށް ކައުންސިލުން ބުނެއެވެ.
ބިދޭސީން ރަށުގައި އުޅުމުގެ ހުއްދަ ދެވިފައިވާކަން އަންގާދޭ ކާޑެއް ހައްދަން ޖެހޭކަން ފާހަގަކޮށް ކައުންސިލުން ބުނީ ރަށުގައި ބިދޭސީން ގެންގުޅޭ ފަރާތްތަކުން ކާޑު ހެއްދުމަށް ކައުންސިލް އިދާރާގައި ރަޖިސްޓަރީ ކުރުމުން ކާޑު ލިބޭނެ ކަމަށެވެ. އަދި މިކާޑަކީ ކޮންމެ 6 މަހަކުން މުއްދަތު ހަމަވާ ގޮތަށް ހައްދައިދޭ ކާޑެއް ކަމަށާއި، މިކާޑު ހެއްދުމުގެ ފީއެއްގެ ގޮތުގައި 150 ރުފިޔާ ނަގާނެ ކަމަށް ކައުންސިލުން ބުނެއެވެ.
މީގެ އިތުރުން ކައުންސިލުން ބުނީ ގަވާއިދާ ޚިލާފަށް ބިދޭސީން ގެންގުޅޭ ފަރާތްތަކާއި އަދި ގަވާއިދާ ޚިލާފަށް ރަށަށް އައިސްފައިވާ ބިދޭސީން ދެނެގަނެ އެ ފަރާތްތަށް ފޮނުވާލުމުގެ މަސައްކަތް އިހަވަންދޫ ޕޮލިސް ސްޓޭޝަނުން ކުރިއަށް ގެންދާނެ ކަމަށެވެ.
ކައުންސިލުން ބުނީ އުސޫލާ ހިލާފުވާނަމަ އެ ފަރާތެއް ޖޫރިމަނާ ކުރާނެ ކަމަށެވެ. އެގޮތުން ފުރަތަމަ ފަހަރަށް ނަމަ -/1000 ރުފިޔާއިން، ދެވަނަ ފަހަރަށް ނަމަ -/2500 ރުފިޔާއިން އަދި ތިންވަނަ ފަހަރަށް ނުވަތަ އިތުރުވާ ކޮންމެ ފަހަރަކު -/5000 ރުފިޔާއިން ޖޫރިމަނާ ކުރާނެ ކަމަށް ކައުންސިލުން ބުނެއެވެ.
ކައުންސިލުން ބުނީ ސެޕްޓެމްބަރު 06 ވާ އާދިއްތަ ދުވަހުން ފެށިގެން މި އުސޫލާ އެއްގޮތަށް ހުރިހާ ފަރާތްތަކުން އަމަލު ކުރަމުން ގެންދިއުމަށް އެދޭ ކަމަށެވެ.
