ރަޝިޔާ އާއި ރާއްޖެ އާ ދެމެދު ދަތުރުތައް ފަށަނީ
ކޮވިޑް-19 އާ ގުޅިގެން ރަޝިޔާގެ ބޯޑަރުތައް ބަންދުކޮށްފައިވަނީ މާރޗް މަހު
ރަޝިޔާގެ ގައުމީ އެއަރލައިން
ރަޝިޔާ އާއި ރާއްޖެ އާ ދެމެދު ވައިގެ ދަތުރުތައް ފެށުމަށް ހަމަޖެހިފައިވާ ކަމަށް އެގައުމުގެ ސަރުކާރުން ހާމަކޮށްފި އެވެ.
ރަޝިޔަން ނިއުސް އެޖެންސީން ބުނެފައިވާ ގޮތުގައި ރަޝިޔާގެ ބޮޑު ވަޒީރު މިޝައިލް މިޝްހުޝްޓިން އަލުން ދަތުރުތައް ފެށުމަށް ނިންމަވާފައިވަނީ މިސްރާއި، ޔުނައިޓެޑް އަރަބް އެމިރޭޓްސް(ޔޫއޭއީ) އަދި ރާއްޖެ އަށެވެ. އެގޮތުން ރާއްޖެއަށް ހަފްތާއަކު ދެ ފްލައިޓް ދަތުރުކުރުމަށް ހަމަޖެހިފައިވާ ކަމަށް ބަޔާނުގައި ބުނެފައިވެ އެވެ. މިސްރަށް ތިން ފްލައިޓް ބޭއްވުމަށް ހަމަޖެހިފައިވާއިރު ޔޫއޭއީއަށް ބޭއްވުމަށް ހަމަޖެހިފައިވަނީ ހަފްތާއަކު ދެ ފްލައިޓެވެ.
ކޮވިޑް-19 އާ ގުޅިގެން ރަޝިޔާގެ ބޯޑަރުތައް ބަންދުކޮށްފައިވަނީ މާރޗް މަހުގެ ފަހުކޮޅެވެ. އޮގަސްޓް މަހުގެ 1 ން ފެށިގެން އިނގިރޭސިވިލާތާއި ޓެންޒޭނިއާ އަދި ތުރުކީ އަށް ދަތުރުކުރަމުންދާއިރު އޮގަސްޓް މަހުގެ 15ން ފެށިގެން ސްވިޒެލެންޑާއި ރަޝިޔާ އާ ދެމެދުވެސް އަންނަނީ ދަތުރުކުރަމުންނެވެ.
ކޮވިޑް-19 އާ ގުޅިގެން ރާއްޖޭގެ ބޯޑަރުތައް ބަންދުކޮށްފައި އޮތުމަށްފަހު އަލުން ހުޅުވާލާފައިވަނީ ޖުލައި މަހުގެ 15 ވަނަ ދުވަހު އެވެ. އޭގެފަހުން މިހާތަނަށް އައިއިރު ރާއްޖެ އައިސްފައިވަނީ 9000 (ނުވަ ހާސް) ފަތުރުވެރިންނެވެ.
ރަޝިއާ އަކީ ރާއްޖެއަށް އެންމެ ގިނައިން ފަތުރުވެރިން އަންނަ ގައުމަށްވާއިރު ފްލައިޓުތައް އަލުން ފެށުމަކީ ޓޫރިސްޓުން އަންނަ މިންވަރު އިތުރު ކުރުމަށް ދިވެހި ސަރުކާރުން ކުރަމުންދާ މަސައްކަތަށް ލިބުނު އިތުރު ބާރަކަށް ވެގެންދާނެ އެވެ.
އަނެއްކޮޅުން ރާއްޖޭގައި ކޮވިޑް-19 ގެ ކޭސްތައް އިތުރުވަމުންދިޔުމާއެކު ޓޫރިޒަމް މިނިސްޓްރީން ބުނީ މި މަހުގެ 10 އިން ފެށިގެން ޓޫރިސްޓުން ރާއްޖެ އަންނައިރު ކޮވިޑަށް ޓެސްޓު ކުރުމަށް ހަދާ ޕީސީއާރު ނެގެޓިވް ސެޓްފިކެޓު ހުށަހަޅަން ޖެހޭނެ އެވެ.
ބޯޑަރާއެކު ގިނަ ރިސޯޓުތަކުގައި މިހާރު އޮޕަރޭޝަންތައް އަލުން ފަށާފައިވާއިރު، އަންނަ އޮކްޓޯބަރ މަހުގެ 15 ވަނަ ދުވަހުން ފެށިގެން ގެސްޓްހައުސްތައް ވެސް އަލުން ހުޅުވާލާނެކަމަށް ސަރުކާރުން ވަނީ ބުނެފަ އެވެ. ނަމަވެސް، ބަލި އެންމެ ބޮޑަށް ފެތުރޭ މާލެ ސަރަހައްދުގެ ގެސްޓްހައުސްތައް އަދި ނުހުޅުވާނެ ކަމަށް ސަރުކާރުން ވަނީ ބުނެފަ އެވެ.
ޓޫރިޒަމް މިނިސްޓަރ ޑރ އަބްދުﷲ މައުސޫމް ވިދާޅުވެފައިވަނީ މިއަހަރުގެ ޑިސެމްބަރު މަސް ވާންވާއިރަށް އެންމެ ދަށްވެގެން 120،000 ފަތުރުވެރިން ދިވެހިރާއްޖެއަށް އަންނާނެކަމަށް ބެލެވޭކަމަށެވެ.
