ސަފާރީގައި އަންހެނަކަށް ޖިންސީ ގޯނަކުރި މައްސަލާގެ ތަހުގީގު ނިންމާ ދައުވާކުރަަން ފޮނުވަނީ
3 ސެޕްޓެމްބަރު 2020 | ބުރާސްފަތި 08:30މައްސަލާގައި 11 މީހުންގެ ބަޔާން ނެގި ކަމަށް ފުލުހުން ވަނީ ބުނެފައި
ސަފަރީގައި އަންހެނަކަށް ޖިންސީ ގޯނާކުރި ކަމަށް ބުނާ މައްސަލާއަ ގުޅޭ ގޮތުން ފުލުހުން ރައްޔިތުންގެ މަޖިލީހުގެ ޖެންޑާ ކޮމިޓީ އަށް މައުލޫމާތު ދިނުމުގެ ތެރެއިން
ހުޅުމާލޭ ފަޅުތެރޭގައި އަޅާފައި އޮތް ސަފާރީއެއް ގައި ހުރި ކެންޔާގެ އަންހެނަަކަށް ޖިންސީ ގޯނާކުރި މައްސަލާގެ ތަހުގީގުގެ ބޮޑުބައި ނިމިފައިވާ ކަމަށާއި، އެ މައްސަލާގައި ޝާމިލްވާ މީހުންނަށް ދައުވާކުރަން ޕްރޮސެކިއުޓާ ޖެނެރަލް (ޕީޖީ) އަށް ފޮނުވުމުގެ މަސައްކަތް ކުރަމުންދާ ކަމަށް ފުލުހުން ބުނެފިއެވެ.
ފުލުހުން ހާމަކޮށްފައިވާ ގޮތުން އުމުރުން 27 އަހަރުގެ ކެންޔާ އަންހެނަކަށް ސަފާރީގައި ޖިންސީ ގޯނާކުރި މައްސަލަ އެ އިދާރާއަށް ރިޕޯޓުކުރީ ޖޫން މަހުގެ 26 ވަނަ ދުވަހުގެ ފަތިހު 05:00 ހާއިރުއެވެ.
ފުލުހުންގެ މީޑީއާ އޮފިޝަލް ރާއްޖެ.އެމްވީ އަށް ވިދާޅުވީ، މަސައްކަތްކުރަނީ ވީހާވެސް އަވަހަކަށް ދައުވާކުރަން ފޮނުވަން ކަމަށެވެ.
ޖިންސީ ގޯނާކުރި ކަމުގެ ތުހުމަތު ގައި ދިވެހި ދެ ފިރިހެނަކު ހައްޔަރު ކުރުމަށްފަހު އެ ދެ މީހުން ދޫކޮށްލިއެވެ. އެ ދެ މީހުންނަކީ ސިޔާސީ ނުފޫޒުން ދޫކޮށްލާފައިވާ މީހުން ކަމަށް ތުހުމަތުތަކެއް ކުރެވެއެވެ. ދޫކޮށްލި މީހުންގެ ތެރޭގައި ރައްޔިތުންގެ މަޖިލީހުގެ އެމްޑީޕީ މެމްބަރެއްގެ ފިރިކަލުންވެސް ހިމެނެއެވެ.
އެ މައްސަލައާ ގުޅިގެން ފުލުހުން އެންމެ ފަހުން ޕްރެސްއެއް ބާއްވާފައިވަނީ ޖުލައި މަހުގެ ކުރީކޮޅުއެވެ. އެ ޕްރެސް ބްރީފިން ގައި ފުލުހުން ބުނެފައިވަނީ ޖިންސީ ގޯނާ އަށްވުރެ ބޮޑުކަމެއް ސަފާރީގައި ހިނގާފައިވާ ކަމަށް ބެލެވޭ ކަމަށެވެ. އެ މައްސަލަ އާއި ގުޅިގެން 11 މީހެއްގެ ބަޔާން ނަގައި ވިކްޓިމްގެ ފޯނު ސަފާރީ އޮތް ސަރަހައްދުން ހޯދާފައިވާ ކަމަށް ފުލުހުން ވަނީ ބުނެފައެވެ.
ރައްޓެއްސެއްގެ ދައުވަތަކަށް ސަފާރީ އަށް ދިޔަ އެ އަންހެން މީހާއާ އެކު ސަފާރީ ތެރޭގައި ހަތް މީހަކު ތިބިކަމަށްވެސް ފުލުހުން ވަނީ ބުނެފައެވެ.
