ކްރިމިނަލް ކޯޓަށް ފުރަތަމަ ފަހަރަށް އަންހެން ފަނޑިޔާރަކު އައްޔަން ކުރައްވައިފި
އައްޔަނު ކުރެވުނު 2 ފަނޑިޔާރުންނާއެކު މިހާރު ކްރިމިނަލް ކޯޓުގައި 11 ފަނޑިޔާރުން މަސައްކަތް ކުރައްވާނެ
ކްރިމިނަލް ކޯޓަށް އަލަށް އައްޔަންކުރެއްވި ފަނޑިޔާރަށް ފަނޑިޔާރުކަމުގެ ފަތްކޮޅު އަރުވަނީ
ކްރިމިނަލް ކޯޓުގެ ހުސްވެފައިވާ ފަނޑިޔާރުކަމުގެ މަގާމަށް ދެ ބޭފުޅުން އައްޔަން ކުރައްވައިފިއެވެ.
ޖުޑިޝަލް ސާވިސް ކޮމިޝަން (ޖޭއެސްސީ) އިން ނެރުނު ބަޔާނެއްގައި ބުނީ ކްރިމިނަލް ކޯޓަށް ފަނޑިޔާރުން ހޯދުމަށް ކޮމިޝަނުން ކުރި އިޢުލާނުގެ ދަށުން ކްރިމިނަލް ކޯޓަށް ކުރިމަތިލާފައިވާ ފަރާތްތަކާ "ފަނޑިޔާރުން ޢައްޔަން ކުރުމުގައި ކޮމިޝަނަށް ލަފާދޭ ކޮމިޓީ" އިން އިންޓަރވިއު ކުރުމަށްފަހު ކޮމިޝަނަށް ހުށަހަޅާފައިވާ ރިޕޯޓުގައި "ހައިލީ ރިކޮމެންޑް" ކުރާކަމަށް ފާހަގަކޮށްފައިވާ ކ.މާލެ މ.ގުލްޝަން، އަލްއުސްތާޛް ދީބަޔާޒް ފަހުމީ އާއި ސ.ހުޅުދޫ ހެޕީ ޑްރީމް، އަލްއުސްތާޛު މުޙައްމަދު މިޞްބާޙު ކްރިމިނަލް ކޯޓުގެ ފަނޑިޔާރުކަމަށް ޢައްޔަން ކުރުމަށް ފެންނަކަމަށް ނިންމުމާ ގުޅިގެން މިއަދު އެ ދެބޭފުޅުން ފަނޑިޔާރުކަމުގެ ހުވާ ކުރައްވާފައިވާ ކަމަށެވެ.
އަލްއުސްތާޛު ދީބަޔާޒް ފަހުމީ އަކީ ޤާނޫނީ ރޮނގުން ބެޗްލަރ އޮފް ލޯ (އޮނަރސް) މެލޭޝިއާ އިންޓަރނޭޝަނަލް އިސްލާމިކް ޔުނިވަރސިޓީ އިން ހާސިލް ކުރެއްވުމަށްފަހު، މާސްޓަރ އޮފް ލޯ ނިއުޒިލޭންޑްގެ ޔުނިވަރސިޓީ އޮފް އެންޓަރބަރީ އިން ހާސިލް ކުރައްވާފައިވާ ބޭފުޅެކެވެ. މީގެ އިތުރުން އެބޭފުޅާ އަކީ ޖިނާއީ އަދުލުގެ ނިޒާމުގައި ގިނަގުނަ މަސައްކަތްތަކެއް ކުރައްވާ 17 އަހަރު ދުވަހުގެ ތަޖުރިބާ ހުރި ބޭފުޅެކެވެ. އަލްއުސްތާޛު ދީބަޔާޒް ފަހުމީ އަކީ ކްރިމިނަލް ކޯޓަށް ޢައްޔަނު ކުރި ފުރަތަމަ އަންހެން ފަނޑިޔާރެވެ.
އަލްއުސްތާޛު މުޙައްމަދު މިޞްބާޙު އަކީ ޤާނޫނާ ޝަރީޢާގެ ރޮނގުން މިސްރުގެ އަލް އަޒްހަރު ޔުނިވަރސިޓީ އިން ބެޗްލަރއޮފް ޝަރީޢާ އެންޑް ލޯ ފުރިހަމަ ކުރެއްވުމަށްފަހު، ޤާނޫނީ ދާއިރާގެ 6 އަހަރު ދުވަހުގެ ތަޖުރިބާ ހުރި ބޭފުޅެކެވެ. ޤާނޫނީވަކީލުކަމުގައި ގިނަ އަހަރުތަކެއްގެ ޕަބްލިކް ޕްރޮސެކިއުޓަރއެއްގެ ގޮތުގަ އާއި ޕްރައިވެޓް ޕްރެކްޓިސްގެ އިތުރުން، މި ދާއިރާ އިން ކިޔަވާދިނުމުގެ ތަޖުރިބާ ވެސް ހުރި ބޭފުޅެކެވެ.
މިއަދު އައްޔަނު ކުރެވުނު 2 ފަނޑިޔާރުންނާއެކު މިހާރު ކްރިމިނަލް ކޯޓުގައި 11 ފަނޑިޔާރުން މަސައްކަތް ކުރައްވާނެއެވެ.
