ފުލުހުންނަށް ތަމްރީނާއި ގާބިލުކަން ހޯދައި ދިނުމަކީ ސަރުކާރުގެ އެންމެ އިސް ވާޖިބު: ފޮރިން މިނިސްޓަރު
1 ސެޕްޓެމްބަރު 2020 | އަންގާރަ 13:19ފުލުހުންނަށް ބޭނުންވާ ތަމްރީނާއި ގާބިލުކަން ހޯދައިދިނުމަކީ ސަރުކާރުގެ އެންމެ އިސް ވާޖިބު
މިނިސްޓަރ އޮފް ފޮރިންގ އެފެއާޒް އަބްދުﷲ ޝާހިދު
ފުލުހުންނަށް ބޭނުންވާ ތަމްރީނާއި ގާބިލުކަން ހޯދައި ދިނުމަކީ ސަރުކާރުގެ އެންމެ އިސް ވާޖިބު ކަމަށާއި އެކަމަށް ރައީސް އިބްރާހީމް މުހައްމަދު ސޯލިހުގެ ސަރުކާރުން ހާއްސަ އިސްކަމެއް ދެއްވަމުން ގެންދަވާކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ދ. ވާނީ ޕޮލިސް އެކަޑަމީގެ ދެވަނަ ފިޔަވަހީގެ މަސައްކަތް ނިންމުން ފާހަގަކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ ޝާހިދު ވިދާޅުވީ މިނިވަން ޑިމޮކްރެޓިކް މުޖްތަމައެއްގައި ގާނޫނާއި ގަވައިދުތައް ނަގަހައްޓައި ތަންފީޒުކޮށް ހިންގުމަކީ އެންމެ މުހިއްމު އެއް އަސާސް ކަމަށެވެ. އަދި އެކަންކަން ކުރުމުގައި އެންމެ އިސް ސަފުގައި ތިއްބަވާނީ ފުލުހުން ކަމަށް މިނިސްޓަރު ވިދާޅުވިއެވެ.
އައްޑޫ ސިޓީގައި އިންޑިއާ ސަރުކާރުގެ ހިލޭ އެހީގެ ދަށުން ހަދަމުންދާ ޕޮލިސް ޓްރެއިނިންގ ސެންޓަރާ ބެހޭގޮތުން ވާހަކަ ދައްކަވަމުން މިނިސްޓަރު ޝާހިދު ވިދާޅުވީ އެތަނުގެ އެއްބަސްވުމުގެ އެމްއޯޔޫގައި އިންޑިއާ ސަރުކާރާއި ދިވެހި ސަރުކާރާ ދެމެދު އެންމެ ފުރަތަމަ ސޮއި ކުރެވުނީ 2012 ވަނަ އަހަރުގެ ސެޕްޓެމްބަރު މަހުގެ ތެރޭގައި ކަމަށެވެ.
މިނިސްޓަރު ޝާހިދު ވަނީ މި މަޝްރޫއާ ގުޅިގެން ކުރީގެ ސަރުކާރުތަކުން ކުރެއްވި މަސައްކަތްތަކުގެ މައުލޫމާތު ހިއްސާ ކުރައްވާ އޭރުގެ ސަރުކާރުތަކުގެ ހޯމް މިނިސްޓަރުންނަށް ޝުކުރު ދަންނަވާފައެވެ.
އިންޑިއާ ސަރުކާރުގެ ހިލޭ އެހީގެ ދަށުން ދ.ވާނީގައި ތަރައްގީ ކޮށްފައިވާ ޕޮލިސް ޓްރެއިނިންގ ސެންޓަރަކީ އިންޑިއާގެ އެކްސްޓަރނަލް އެފެއާޒް މިނިސްޓަރ ރާއްޖެއަށް ކުރެއްވި ޒިޔާރަތުގައި ދެއްވި 106 މިލިއަން ރުފިޔާގެ އެހީގެ ދަށުން ކުރިއަށް ގެންދިޔަ މަޝްރޫއެކެވެ. އަދި ދ. ވާނީގައި ހެދި ޕޮލިސް އެކަޑަމީގެ ދެވަނަ ފިޔަވައްސަކީ 8 މިލިއަން ރުފިޔާ ހަރަދުކޮށްގެން ހަދާފައިވާ ތަނެއްކަން ފާހަގަކޮށްލެވެއެވެ.
