ޑރ. ވަހީދު ގެނައި ޑިމޮކްރަސީ ރައްޔިތުން ބަލައެއް ނުގަނޭ: ހަސަންޓޭ

ކުރީގެ ރައީސް ޑރ މުޙައްމަދު ވަޙީދު ހަސަން މަނިކު ގެނެސްދެއްވި ޑިމޮކްރަސީ ރައްޔިތުން ބަލައިނުގަންނަ ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ އެމްޑީޕީ މެމްބަރު ހަސަން އަހުމަދު (ހަސަންޓޭ) ވިދާޅުވެއްޖެއެވެ.

ހޯމަ ދުވަހު ހަސަންޓޭ ކުރެއްވި ޓްވީޓެއްގައި ވިދާޅުވީ، ރާއްޖޭގެ ޤާނޫނު އަސާސީ އަށް ބަދަލުގެނެސް، ރައްޔިތުން ވޯޓު ދީގެން ވެރިކަން ގެންނަގޮތަށް އަމަލު ކުރަމުންދަނީ ޑރ ވަޙީދު ގެނެސްދެއްވި ޑިމޮކްރަސީ ރައްޔިތުން ބަލައި ނުގަންނާތީ ކަމަށެވެ. އަދި ޤައުމުގެ އަސްކަރިއްޔާ ބޭނުން ކޮށްގެން ގަދަބާރުން ވެރިކަން ބަދަލު ކުރުމަކީ ރާއްޖޭގެ ޤާނޫނު އަސާސީގައި އޮންނަ ކަމެއް ނޫންކަމަށް މެމްބަރު ވިދާޅުވިއެވެ.

ހަސަންޓޭ އެހެން ވިދާޅުވެފައިވާއިރު، ހުކުރު ދުވަހު އިދިކޮޅު ކޯލިޝަނުން ކުރިއަށް ގެންދިޔަ އެއްވުމުގައި ރައީސް ވަޙީދު ބައިވެރިވެވަޑައިގެން އެޗްޕީއޭގެ ޤަވާއިދުތަކާ ޚިލާފުވެވަޑައިގެންފައިވާތީ ގިނަ ބައެއްގެ ފާޑުކިއުންތައް ވަނީ އަމާޒުވެފައެވެ.

ހެލްތް ޕްރޮޓެކްޝަން އެޖެންސީގެ ގައިޑްލައިންތަކާ ހިލާފުވުމުގެ ސަބަބުން ކުރީގެ ރައީސް ވަހީދު ފުލުހުން އޮފީހަށް ހާޒިރު ކުރުމާއި ގުޅިގެން މީޑިއާތަކަށް ދެއްވި އިންޓަވިއުގައި އެމަނިކުފާނު ވިދާޅުވީ، ރައްޔިތުންގެ ހިތްތައް ކެކިއެރުމުންނާއި، ރައްޔިތުންގެ ހިތްހަމަ ނުޖެހުމުން މަގުމައްޗަށް ނުކުންނާނެ ކަމަށެވެ.

ވަހީދު ވިދާޅުވީ ސަރުކާރު ޒިންމާދާރު ކުރުމަށް ބަސް ބުނަން ޖެހޭ ކަމަށާއި، ކަންތައްތައް ގޯހުން ގޯހަށް ދާން ފެށުމުން އިހުތިޖާޖު ކުރާނެ ކަމަށެވެ. އަދި އެއީ ޑިމޮކްރެޓިކް ގައުމެއްގައި ކަން ހިނގާ އުސޫލު ކަމަށް ވަހީދު ވިދާޅުވިއެވެ. އަދި ގައުމަށް ޑިމޮކްރަސީ ގެނައުމަށް ކުރި ހުރިހާ މަސައްކަތެއް ބޭކާރުވީތޯ ވެސް ވަހީދު ވަނީ ސުވާލު އުފައްދަވާފައެވެ.