އެންމެ މޮޅު މިޑްފީލްޑަރަކީ ޑިބްރޭނާ: ޒަވީ

މިވަގުތު ދުނިޔޭގައި ހުރި އެންމެ މޮޅު މިޑްފީލްޑަރަކީ މެންޗެސްޓާ ސިޓީއަށް ކުޅެމުން އަންނަ ބެލްޖިއަމްގެ މިޑްފީލްޑަރު ކެވިން ޑިބްރޭނާ ކަމަށް ބާސެލޯނާގެ ލެޖެންޑް ޒަވީ ހެނާންޑޭޒް ބުނެފިއެވެ.

ދުނިޔެ ދުށް އެންމެ މޮޅު އެއް މިޑްފީލްޑަރު އަދި މިހާރު ގަތަރުގެ އަލް ސާދަށް އިރުޝާދު ދެމުން އަންނަ ޒަވީ ބުނީ ހުރިހާ ގޮތަކުން ބެލިނަމަވެސް، ޑިބްރޭނާ އަކީ މިހާރު ހުރި އެންމެ މޮޅު މިޑްފީލްޑަރު ކަމަށާއި، މެޗުތަކުގައި އޭނާ ތަފާތު ދައްކަމުން އަންނަ ކަމަށެވެ. އަދި ޑިބްރޭނާއާ އެއް ފެންވަރުގެ އިތުރު މިޑްފީލްޑަރެއް މިވަގުތު ނެތް ކަމަށާއި، ޒުވާން އުމުރުގައި ޑިބްރޭނާ ދައްކަމުން އަންނަ މޮޅު ކުޅުން ފާހަގަކުރަންޖެހޭ ކަމަށްވެސް ބުންޏެވެ.

މީގެ އިތުރުން ޒަވީ ވަނީ ޑިބްރޭނާއަށް އިރުޝާދު ދެމުން އަންނަ ސިޓީގެ ކޯޗު ޕެޕް ގާޑިއޯލާއަށްވެސް ތާރީފުކޮށްފައެވެ. ޒަވީ ބުނީ މީގެ ކުރިން އޭނާއަށްވެސް އިރުޝާދު ދިން ގަޑިއޯލާއަކީ މިވަގުތު ހުރި އެންމެ މޮޅު ކޯޗު ކަމަށާއި، ފުޓްބޯޅައަށް ގާޑިއޯލާ ގެނަ ބަދަލަށް ތާރީފު ހައްގު ކަމަށެވެ.

ސިޓީގެ ކޯޗު ގާޑިއޯލާ އާއި މިޑްފީލްޑަރު ޑިބްރޭނާއަށް ޒަވީ ތާރީފުކުރިއިރު، ޔޫރަޕްގެ ބޮޑެތި ކުލަބުތަކުން އަންނަނީ އޭނާއަށް ފާރަލަމުންނެވެ. އަދި އުމުރުން 29 އަހަރުގެ ޑިބްރޭނާ މި ނިމުނު ސީޒަނުގެ އިނގިރޭސި ޕްރިމިއާ ލީގުގެ މޮޅު ކުޅުންތެރިޔާގެ މަގާމު ހޯދާފައެވެ. އޭނާ ވަނީ މިދިޔަ ސީޒަނުގެ ޕްރިމިއާ ލީގުގައި ސިޓީއަށް 13 ލަނޑު ޖަހައިދިނުމުގެ އިތުރުން، 20 ލަނޑު ކާމިޔާބުކުރުމަށް އެހީތެރިވެފައެވެ.

ބެލްޖިއަމްގެ ގެންކްއިން 2008 ވަނަ އަހަރު ސީނިއާ ކެރިއަރު ފެށި ޑިބްރޭނާ މީގެ ކުރިން 2012 ވަނަ އަހަރު ވަނީ ޗެލްސީއަށް ބަދަލުވެފައެވެ. އެކަމަކު ޗެލްސީގައި ޑިބްރޭނާ ހޭދަކުރި ދެ ސީޒަނުގައި އޭނާ ކުޅެދީފައިވަނީ އެންމެ ތިން މެޗެވެ. އެއަށްފަހު ލޯނު އެއްބަސްވުމެއްގެ ދަށުން ޖަރުނަމަނުގެ ވާޑާ ބްރެމަން އާއި ވުލްފްސްބާގަށްވެސް ޑިބްރޭނާ ވަނީ ކުޅެދީފައެވެ.

ޑިބްރޭނާ ސިޓީއަށް ބަދަލުވީ 2015 ވަނަ އަހަރުގައެވެ. އެއަށްފަހު މިހާތަނަށް ސިޓީއަށް ކުޅެދިން 222 މެޗުގައި އޭނާ ވަނީ 57 ލަނޑު ކާމިޔާބުކޮށްފައެވެ. އަދި ވަނީ ސިޓީއާއެކު ޕްރިމިއާ ލީގު ދެ ފަހަރު އަދި އެފްއޭ ކަޕް އެއް ފަހަރު ކާމިޔާބުކޮށްފައެވެ.