އީސީގެ މެމްބަރުންނާއި މުވައްޒަފުންނަށް ބިރު ނުދެއްކުމަށް އިލްތިމާސްކޮށްފި
31 އޯގަސްޓު 2020 | ހޯމަ 11:51މުވައްޒަފުންގެ ގާނޫނީ ޒިންމާ އަދާކުރަމުންދަނީ ގާނޫނުއަސާސީ އާއި ކޮމިޝަނުގެ ގާނޫނުގައިވާ ގޮތުގެ މަތިން
އިލެކްޝަން ކޮމިޝަނުން ބޭއްވި ނޫސްވެރިންގެ ބައްދަލުވުމެއްގެ ތެރެއިން
ސޯޝަލް މީޑީއާ އާއި އެހެނިހެން ގޮތްގޮތަށް އިލެކްޝަން ކޮމިޝަން (އީސީ)ގެ މެމްބަރުންނާއި މުވައްޒަފުންނަށް ހަޑިހުތުރު ބަހުން މުއާމަލާތްކޮށް ބިރު ނުދެއްކުމަށް އެކޮމިޝަނުން އިލްތިމާސްކޮށްފިއެވެ.
އީސީން ނެރިފައިވާ ބަޔާނުގައި ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 167 ވަނަ މާއްދާގެ ދަށުން، އެކޮމިޝަނަކީ ވަކިފަރާތަކަށް ބުރަނުވާ، މުސްތަގިއްލު މުއައްސަސާއެއް ކަމަށެވެ. އަދި ކޮމިޝަނުގެ ވާޖިބުތަކާއި މަސްއޫލިއްޔަތުތައް އަދާކުރަން ވާނީ ގާނޫނު އަސާސީއާއި އިލެކްޝަންސް ކޮމިޝަނުގެ ގާނޫނު އެއްގޮތްވާ ގޮތުގެ މަތިން ބަޔާންކޮށްފައިވާއިރު، ކޮމިޝަނުގެ މެންބަރުންނާއި މުވައްޒަފުންގެ ގާނޫނީ ޒިންމާ އަދާކުރަމުންދަނީ ގާނޫނުއަސާސީ އާއި ކޮމިޝަނުގެ ގާނޫނުގައިވާ ގޮތުގެ މަތިން ކަމަށް އީސީން ބުނެއެވެ.
އީސީން ބުނީ ސިޔާސީ ޕާޓީގެ ގާނޫނުގެ ދަށުން ރާއްޖޭގައި އުފައްދާ ސިޔާސީ ޕާޓީތައް ރަޖިސްޓަރީ ކުރުމާއި، ޕާޓީތަކުގެ ދަފްތަރު ބެލެހެއްޓުމާއި، ޕާޓީތައް ރެގިއުލޭޓް ކޮށް، ޕާޓީތަކާމެދު ފިޔަވަޅު އެޅުމުގެ ގާނޫނީ ޒިންމާއާ ހަވާލުވެ ތިބެ، ކޮމިޝަންގެ މެންބަރުންނާއި މުވައްޒަފުން ސިޔާސީ ޕާޓީތަކާމެދު އަމަލުކުރަމުންދަނީ ހަމަހަމަކަމާއެކު ކަމަށެވެ. އަދި ވަކި ސިޔާސީ ފިކުރަކަށް ތަފާތުކުރުމެއް ނެތި ކަމަށް ބަޔާނުގައި ބުނެފައިވެއެވެ.
އީސީން ބުނީ އިންތިޚާބުގެ ކަންކަން ކުރުމާއި، އެކަންތައްތައް ހިންގުމާއި، ބެލެހެއްޓުމާއި، އެކަންތައް މަގުފަހިކުރުމާއި އަދި އިންތިޚާބުތައް ހިނގަނީ އިންސާފުވެރިކަމާއެކު، ބިރުވެރިކަމެއް، ބިރުދެއްކުމެއް، ތަޅާފޮޅުމެއް، ނުރަނގަޅު ނުފޫޒެއް، އަދި ކޮރަޕްޝަނެއް ނެތި މިނިވަންކަމާއެކު ކަމަށެވެ. އަދި ރައްޔިތުންނަށް ވޯޓުލުމުގެ ހައްގު ފުރިހަމައަށް އަދާކުރެވޭ ގޮތަށްކަން ކަށަވަރު ކުރުމަކީ ވެސް ކޮމިޝަނުން އަބަދު ވެސް ޔަގީން ކުރާ ކަމެއް ކަަމަށް އީސީން ބުނެއެވެ.
އީސީން ބުނީ ގާނޫނު އަސާސީ އާއި ގާނޫނުތަކާ އެއްގޮތަށް ކޮމިޝަނުގެ މެންބަރުންނާއި މުވައްޒަފުން އަމަލުކުރަމުންދާއިރު، ސޯޝަލް މީޑީއާ އާއި އެހެނިހެން ގޮތްގޮތަށް ކޮމިޝަނުގެ މެންބަރުންނާއި މުވައްޒަފުންނަށް ބިރުދައްކައި، ހަޑިހުތުރު ބަހުން މުއާމަލާތް ކުރުމަކީ ގަބޫލުކުރެވޭނެ ކަމެއް ނޫންކަމަށް ކަމަށެވެ.
އެހެންކަމުން މިފަދަ ކަންކަން ހުއްޓާލުމަށް ކޮމިޝަނުން ވަނީ އިލްތިމާސް ކޮށްފައެވެ.
