ސުއަރޭޒްގެ އެއްބަސްވުން އުވާލާނަމަ ބާސާއިން 14 މިލިޔަން ޔޫރޯ ދައްކަން ޖެހޭނެ

ބާސެލޯނާއަށް ކުޅެމުން އަންނަ އުރުގުއޭގެ ފޯވާޑް ލުއިސް ސުއަރޭޒްގެ އެއްބަސްވުން އުވާލާނަމަ ބާސާއިން 14 މިލިޔާން ޔޫރޯ ދައްކަން ޖެހޭނެ ކަމަށް ރިޕޯޓުތައް ބުނެފިއެވެ.

ރިޕޯޓުތައް ބުނާ ގޮތުން ބާސާއިން އަންނަ ސީޒަން ފެށުމުގެ ކުރިން ސުއަރޭޒް ވިއްކާލުމަށް ދަނީ މަސައްކަތް ކުރަމުންނެވެ. އެކަމަކު އޭނާ ވިއްކާލާނަމަ ނުވަތަ އޭނާގެ އެއްބަސްވުން އުވާލާނަމަ، ބާސާއިން ސުއަރޭޒްއަށް 14 މިލިޔަން ޔޫރޯ ދައްކަން ޖެހޭނެ ކަމަށްވެސް ރިޕޯޓުތައް ބުނެއެވެ.

ބާސާއިން އުމުރުން 33 އަހަރުގެ ފޯވާޑް އެހެން ކުލަބަކަށް ވިއްކާލުމަށް އުޅޭ ކަމުގެ އަޑު ފެތުރިފައިވީ ނަމަވެސް، ބާސާގެ ފަރިތަކުރުންތަކުގައި ސުއަރޭޒް ބައިވެރިވާނެ ކަމަށް ރިޕޯޓުތައް ބުނެއެވެ.

ސުއަރޭޒް ވިއްކާލުމަށް ބާސާއިން އަމާޒުހިފާފައިވާ ކަމަށް ރިޕޯޓުތައް ބުނިއިރު، އެ ކްލަބުން ސުއަރޭޒް ވިއްކާލަނީ އޭނާގެ އުމުރު ދޮށިވުމާއި، އިންޓައަށް ކުޅެމުން އަންނަ ލަޓާރޯ މާޓިނޭޒް ގަތުމަށް ކަމަށް ރިޕޯޓުތައް ބުނެއެވެ.

އެކަމަކު ބާސާއިން އެ ޓީމުގައި ތިބި ދުވަސްވީ ކުޅުންތެރިން ވިއްކާލަން އުޅޭކަމަށް ދެކެވޭ ވާހަކައާ ގުޅޭގޮތުން އަލަށް ކޯޗުގެ މަގާމާ ހަވާލުވި ރޮނާލްޑް ކޫމަން ބުނީ އުމުރުން ދޮށިވުމަކީ މައްސަލައެއް ނޫން ކަމަށާއި އޭނާގެ މަސައްކަތުގައި ބައިވެރިވާން އެދޭ ކުޅުންތެރިއެއްނަމަ، މަސައްކަތްކުރާނަަމަ ފުރުސަތު ދޭނެ ކަމަށެވެ.

ސުއަރޭޒް ހޯދުމަށް އޭނާގެ ކުރީގެ ކުލަބު އަޔަކްސްގެ އިތުރުން ޔުވެންޓަސް އާއި އިންޓަ މަޔާމީންވެސް އަންނަނީ މަސައްކަތް ކުރަމުންނެވެ. އެގޮތުން ސުއަރޭޒް ހޯދުމަށް އަޔަކްސްއިން 15 މިލިޔަން ޕައުންޑް ޚަރަދުކުރަން ތައްޔާރަށް އޮތް ކަމަށްވެސް ރިޕޯޓުތައް ބުނެއެވެ.

ބާސާއާއެކު ގިނަ ކާމިޔާބީތަކެއް ހޯދާފައިވާ ސުއަރޭޒް ބާސާއަށް ބަދަލުވީ 2014 ވަނަ އަހަރު 65 މިލިޔަން ޕައުންޑަށެވެ. އޭނާ ވަނީ މިހާތަނަށް ބާސާއަށް ކުޅެދިން 283 މެޗުގައި 198 ލަނޑު ކާމިޔާބުކޮށްފައެވެ. އަދި ސުއަރޭޒް ވަނީ ބާސާއާއެކު ސްޕެނިޝް ލީގު ހަތަރު ފަހަރު އަދި ޔުއެފާ ޗެމްޕިއަންސް ލީގު އެއް ފަހަރު ކާމިޔާބުކޮށްފައެވެ.