ބަޔާން ދޫކޮށްލަން ތިއާގޯ ބޭނުންވޭ: ރުމެނިގާ

ބަޔާން މިއުނިކް ދޫކޮށްލަން ސްޕެއިންގެ މިޑްފީލްޑަރު ތިއާގޯ އަލްކަންޓާރާ ބޭނުންވާ ކަމަށް ބަޔާންގެ ޗެއާމަން ކާލް-ހެއިންޒް ރުމެނިގާ ވިދާޅުވެއްޖެއެވެ.

ކުރިން ބާސެލޯނާއަށް ކުޅުނު އުމުރުން 29 އަހަރުގެ ތިއާގޯ ގަތުމުގެ ރޭހުގެ އެންމެ ކުރީގައި އުޅެނީ ލިވަޕޫލެވެ. އެކަމަކު މީގެ ކުރިން ޕީއެސްޖީ އާއި މެންޗެސްޓާ ސިޓީންވެސް ވަނީ ތިއާގޯއަށް ޝައުގުވެރިކަން ފާޅުކޮށްފައެވެ.

ރިޕޯޓުތައް ބުނާ ގޮތުން ތިއާގޯ ވިއްކާލަން އެންމެ ފުރަތަމަ ބަޔާނުން ކީ އަގަކީ 40 މިލިޔަން ޔޫރޯއެވެ. އެކަމަކު ތިއާގޯގެ އެއްބަސްވުމުގައި ބާކީ އެންމެ އަހަރެއް އޮތުމާއެކު 40 މިލިޔަން ޔޫރޯ ދައްކަން ލިވަޕޫލުން ދެކޮޅު ހެދުމުން، ބަޔާނުން އެ އަގު 25 މިލޔަން ޔޫރޯއަށް ވަނީ ކުޑަކޮށްފައެވެ.

ދާދި ފަހުން މީޑިއާއަށް ދިން އިންޓަވިއުއެއްގައި ބަޔާންގެ ޗެއާމަން ރުމެނިގާ ވިދާޅުވީ އެ ކުލަބު ދޫކޮށްލަން ތިއާގޯ ބޭނުންވާ ކަމަށާއި، ބަޔާނުން އުންމީދުކުރަނީ ކުރިއަށް އޮތް ދުވަސްތަކުގެ ތެރޭގައި ތިއާގޯއަށް ހުށަހެޅުމެއް ލިބޭނެ ކަމަށެވެ.

މި ޓްރާންސްފާ ބާޒާރުގައި ތިއާގޯ ބަޔާން ދޫކޮށްލާނެ ކަމަށް ބެލެވޭއިރު، 2013 ވަނަ އަހަރު 25 މިލިޔަން ޔޫރޯއަށް ބަޔާނަށް ބަދަލުވި ތިއާގޯ އަންނަނީ އެ ކުލަބުގެ މެދުތެރޭގައި މޮޅު ކުޅުމެއް ދައްކަމުންނެވެ. އެގޮތުން ބަޔާންގައި މިހާތަނަށް ހޭދަކުރި ހަތް ސީޒަނުގައި ތިއާގޯ ވަނީ 235 މެޗު ކުޅެދީ 31 ލަނޑު ކާމިޔާބުކޮށްފައެވެ. އަދި ވަނީ ބަޔާނާއެކު ޖަރުމަން ލީގު ހަތް ފަހަރު އަދި ޔުއެފާ ޗެމްޕިއަންސް ލީގު އެއް ފަހަރު ކާމިޔާބުކޮށްފައެވެ.

ތިއާގޯ ހޯދުމަށް ލިވަޕޫލުން މަސައްކަތް ކުރަމުން އަންނައިރު، އޭނާގެ އިތުރުން ލިވަޕޫލުން ފާރަލަމުން އަންނަ ކުޅުންތެރިންގެ ތެރޭގައި ލީޑްސް ޔުނައިޓެޑަށް މިދިޔަ ސީޒަނުގައި ކުޅުނު ޒުވާން ޑިފެންޑަރު ބެން ވައިޓް އާއި ވަޓްފޯޑްގެ އިސްމާއިލް ސާ ހިމެނެއެވެ. ލިވަޕޫލުން ވަނީ މި ޓްރާންސްފާ ބާޒާރުގައި އޮލިމްޕިއާކޯސްގެ ޑިފެންޑަރު ކޮސްޓަސް ޓިމިސްކަސްގެ ސޮއި ހޯދާފައެވެ.