މަސްވެރިންނަށް ފައިސާ ނުލިބޭ މައްސަލާގައި މިނިސްޓަރ ޒަހާ މަޖިލީހަށް ހާޒިރު ކުރަނީ
30 އޯގަސްޓު 2020 | އާދީއްތަ 16:02ޒަހާ ވަހީދު ހާޒިރުކޮށް ސުވާލު ކުރަން ދެ މެންބަރަކު ހުށަހެޅުއްވި
ރައްޔިތުންގެ މަޖިލީހުގެ ތަޅުމުގައި މިނިސްޓަރު ޒަހާ ވަހީދު ޖަވާބުދާރީވެވަޑައިގަންނަވަނީ
ސަރުކާރުގެ މަސްވެރި ކުންފުނި، މިފްކޯއަށް މަސްވެރިން ވިއްކި މަހަށް ފައިސާ ނުލިބޭ މައްސަލާގައި ފިޝަރީޒް މިނިސްޓަރު ޒަހާ ވަހީދު ރައްޔިތުންގެ މަޖިލީހުގެ ހޯމަ ދުވަހުގެ ހެނދުނު ބާއްވާ ޖަލްސާއަށް ހާޒިރު ކުރަން ތާވަލުކޮށްފިއެވެ.
މަޖިލީހުގެ ޖަލްސާގެ އެޖެންޑާގައި ވަނީ ދާންދޫ ދާއިރާގެ މެންބަރު ޔައުގޫބް އަބްދުﷲ ކުރައްވާ ސުވާލަކަށް ޖަވާބު ދެއްވުމަށް ފިޝަރީޒް މިނިސްޓަރު ޒަހާ ވަހީދު ހާޒިރުވެވަޑައިގަތުމަށެވެ.
މެންބަރު ޔައުގޫބްގެ ސުވާލަކީ މިފްކޯއަށް މަސްވެރިން ވިއްކާ މަހަށް ފައިސާ ނުދީ ލަސްވަނީ ކީއްވެގެންތޯ އާއި، މަސްވެރިންނަށް ގަވާއިދުން ފައިސާ ދެވޭނެ އިންތިޒާމު ހަމަޖެއްސޭނީ ކިހާ ދުވަހެއްގެ ތެރޭގައިތޯއެވެ.
މީގެ އިތުރުން މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ކުރައްވާ ސުވާލަކަށް ޖަވާބު ދެއްވުން ވެސް މާދަމާގެ ޖަލްސާ އަށް އެޖެންޑާކޮށްފައިވެއެވެ.
އާދަމް ޝަރީފް ކުރައްވާ ސުވާލަކީ ރ. މަޑުއްވަރީގައި އިންޑިއާ ސަރުކާރުގެ އެހީގައި ގާއިމު ކުރުމަށް ހަމަޖެހިފައިވާ އައިސް ޕްލާންޓް ގާއިމު ކުރުމުގެ މަސައްކަތް ލަސްވަނީ ކީއްވެގެންތޯއެވެ. އަދި އައިސް ޕްލާންޓްގެ މަސައްކަތް ނިމި ހިދުމަތް ލިބެން ފަށާނީ ކޮން ތާރީހެއް ގައިތޯއެވެ.
ކޮވިޑް-19 ގެ ބަލިމަޑުކަން ފެތުރެން ފެށި، އިގްތިސާދާއި ދައުލަތުގެ މާލިއްޔަތު ދަށްވާން ފެށި ފަހުން މިފްކޯއަަށް މަސްވެރިން ވިއްކާ މަހަށް ފައިސާ ދިނުން ވަނީ ލަސްވެފައެވެ. މިކަމާ ގުޅިގެން މަސްވެރިން ދަނީ ކަންބޮޑުވުން ފާޅުކުރަމުންނެވެ.
