އައްޑޫގައި ޚާއްސަ އެހީއަށް ބޭނުންވާ އަންހެނަކު ރޭޕް ކުރި ދެމީހުންނަށް ދައުވާ އުފުލައިފި

އައްޑޫ ސިޓީގައި ޚާއްސަ އެހީއަށް ބޭނުންވާ އަންހެނަކު ރޭޕް ކުރި މައްސަލައިގައި ފުލުހުން ހައްޔަރު ކުރި 2 މީހުންގެ މައްޗަށް ދައުވާ އުފުލައިފިއެވެ.

އާދިއްތަ ދުވަހު ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނީ، މި މައްސަލަ އަކީ 31 ޖުލައި 2020 ދުވަހުގެ ފަތިހުގެ ވަގުތެއްގައި އައްޑޫ ސިޓީ ހިތަދޫގައި ނަފްސާނީ ގޮތުން ނުކުޅުދުންތެރިކަމެއް ހުންނަ އަންހެނަކަށް ޖިންސީ އަދި ޖިސްމާނީ އަނިޔާކޮށް އޭނާއާމެދު ގަދަކަމުން ބަދުއަޙްލާޤީ ޢަމަލު ހިންގި މައްސަލައެއް ކަމަށެވެ. އަދި މި މައްސަލައިގައި ދަޢުވާ ކުރުމަށް ސ. ހިތަދޫ މެޖިސްޓްރޭޓް ކޯޓަށް ހުށައަޅާފައިވާ ކަމަށް ޕީޖީ އޮފީހުން ބުނެފައިވެއެވެ.

ޕީޖީ އޮފީހުން ބުނީ، މި މައްސަލައާ ގުޅިގެން ތުހުމަތު ކުރެވޭ ކ. މާލެ، ދަފްތަރު ނަންބަރު 963، މަޚްތޫމް މޫސާ ދީދީގެ މައްޗަށް އުފުލާފައިވަނީ ނުކުޅުދުންތެރިކަމެއް ހުރި މީހަކާއެކު ޖިންސީ އަމަލު ހިންގުމުގެ ކުށުގެ ދައުވާ ކަމަށެވެ. އަދި ދައުވާ ސާބިތުވެއްޖެނަމަ އަންނާނެ އަދަބަކީ 15 އަހަރާއި 20 އަހަރާ ދެމެދުގެ މުއްދަތަކަށް ޖަލަށްލުން ކަމަށް ޕީޖީ އޮފީހުން ބުނެއެވެ.

އޭގެ އިތުރުން، މި މައްސަލައިގައި ތުހުމަތު ކުރެވޭ ސ. ހިތަދޫ، ޒަހާމަންޒިލް، ޢަލީ ޝިމާޢު ޒުބައިރުގެ މައްޗަށް 2 ދައުވާއެއް ވަނީ އުފުލާފައެވެ. އޭގެ ތެރެއިން އެއް ދައުވާ އަކީ ނުކުޅުދުންތެރިކަމެއް ހުރި މީހަކާ އެކު ޖިންސީ އަމަލު ހިންގުމުގެ ކުށުގެ ދަޢުވާއެވެ. އަދި މި ދައުވާ ސާބިތުވެއްޖެ ނަމަ 15 އަހަރާއި 20 އަހަރާ ދެމެދުގެ މުއްދަތުގެ ޖަލު ޙުކުމެއް އަންނާނެ ކަމަށް ޕީޖީ އޮފީހުން ބުނެއެވެ.

އޭނާގެ މައްޗަށް އުފުލާފައިވާ ދެވަނަ ދައުވާ އަކީ ބަނގުރާ ބުއިމުގެ ކުށުގެ ދަޢުވާއެވެ. އެގޮތުން މި ދައުވާތައް ސާބިތުވެއްޖެ ނަމަ އަންނާނެ އަސާސީ އަދަބަކީ 1 މަހާއި 6 ދުވަހަށް ޖަލަށްލުމާއެކު 40 އެތިފަހަރުން ޖަލްދުކުރުން ކަމަށް ޕީޖީ އޮފީހުން ވަނީ ބުނެފައެވެ.