ހިތްތައް ކެކިއެރުމުން މަގުމައްޗަށް ނުކުންނާނެ، ކުރިއަށް އޮތްތަނުގައި ބޮޑު މަންޒަރު ދައްކާނަން: ވަހީދު

ރައްޔިތުންގެ ހިތްތައް ކެކިއެރުމުން މަގުމައްޗަށް ނުކުންނާނެ ކަމަށާއި، ކުރިއަށް އޮތްތަނުގައި ބޮޑު މަންޒަރު ސަރުކާރަށް ދައްކާނެކަމުގެ އިންޒާރު ކުރީގެ ރައީސް ޑރ. މުހައްމަދު ވަހީދު ހަސަން މަނިކު ދެއްވައިފިއެވެ.

ހެލްތް ޕްރޮޓެކްޝަން އެޖެންސީގެ ގައިޑްލައިންތަކާ ހިލާފުވުމުގެ ސަބަބުން ރައީސް ވަހީދު ފުލުހުން އޮފީހަށް ހާޒިރު ކުރުމާއި ގުޅިގެން މީޑިއާތަކަށް ދެއްވި އިންޓަވިއުގައި ވިދާޅުވީ އެޗްޕީއޭގެ އެންގުންތަކާ ހިލާފު ވާގޮތަށް އަމަލު ކޮށްފައިވާ ކަމަށް ބުނެ ފުލުހުން ސުވާލު ކުރި ކަމަށެވެ. ނަމަވެސް މައްސަލައާ ގުޅިގެން ކުރިއަށްދާން ނިންމީ ގާނޫނީ ވަކީލެއް ކަނޑައެޅުމަށްފަހު ކަމަށްވާތީ އެއްވެސް ޖަވާބެއް ދީފައިނުވާނެ ކަމަށެވެ.

Advertisement

ވަހީދު ވިދާޅުވީ ރައްޔިތުންގެ ހިތްތައް ކެކިއެރުމުންނާއި، ރައްޔިތުންގެ ހިތްހަމަ ނުޖެހުމުން މަގުމައްޗަށް ނުކުންނާނެ ކަމަށެވެ. އެއީ އެހެން ބަޔަކު ހިތްވަރު ދީގެން ރައްޔިތުން ކުރާ ކަމެއް ނޫން ކަމަށް ވަހީދު ވިދާޅުވިއެވެ.

ވަހީދު ވިދާޅުވީ ސަރުކާރު ޒިންމާދާރު ކުރުމަށް ބަސް ބުނަން ޖެހޭ ކަމަށާއި، ކަންތައްތައް ގޯހުން ގޯހަށް ދާން ފެށުމުން އިހުތިޖާޖު ކުރާނެ ކަމަށެވެ. އަދި އެއީ ޑިމޮކްރެޓިކް ގައުމެއްގައި ކަން ހިނގާ އުސޫލު ކަމަށް ވަހީދު ވިދާޅުވިއެވެ.

ރާއްޖެ މީގެ 20 އަހަރުގެ ފަހަތަށް ދިޔައީތޯ ސުވާލު ކުރައްވައި ވަހީދު ވިދާޅުވީ އެމަނިކުފާނު މީގެ 20 އަހަރު ކުރިން ވެސް ފުލުސް އޮފީހަށް ހާޒިރު ކުރީ ވެސް މިފަދަ މައްސަލައެއްގައި ކަމަށެވެ. އެގޮތުން މިއީ އަދައިގެން ކަމެއް ނޫން ކަމަށާއި، ގައުމަށް ޑިމޮކްރަސީ ގެނައުމަށް ކުރި ހުރިހާ މަސައްކަތެއް ބޭކާރުވީތޯ ވެސް ވަހީދު ވަނީ ސުވާލު އުފައްދަވާފައެވެ.

މީގެ އިތުރުން ވަހީދު ވިދާޅުވީ ފުލުސް އޮފީހަށް ހާޒިރު ކުރަނީ ސަރުކާރު ނާގާބިލްވެ އެކަންތައް ފޫ ބެއްދުމަށް ރައްޔިތުންގެ ނަޒަރު އެހެން ދިމާލަކަށް ގެންދިއުމަށް ކަމަށެވެ. އަދި މައްސަލައެއްވާނަމަ ޝަރީއަތަށް ދިއުމަށް ވެސް ވަހީދު ވަނީ ގޮވާލައްވާފައެވެ.

މިހާރުގެ ރައްޔިތުންގެ މަޖިލީހުން އެމަނިކުފާނަށް ބޭ އަދަބީ ބަހުން އެއްޗެހި ގޮވާކަން ފާހަގަކުރައްވައި ވަހީދު ވިދާޅުވީ މިއަދު ގައުމު ދާ މިސްރާބާ މެދު މެމްބަރުން ވިސްނަން ޖެހޭ ކަމަށާއި، ޒިންމާދާރު ކުރުމަށް ކުރަންޖެހޭ މަސައްކަތްތައް ކުރާނެ ކަމަށެވެ. މެމްބަރުންގެ އިތުރުން ސަރުކާރުގެ އެކި މަގާމުތަކުގައި ތިބި ބޭފުޅުންނަކީ ރައްޔިތުންގެ މުސާރަ ނަންގަވާ ބޭފުޅުންނަށްވާތީ ޒިންމާދާރު ކުރުމަށް ކުރަންޖެހޭ މަސައްކަތްތައް ކުރުމަކީ ވެސް ޒިންމާއެއްގެ ގޮތުގައި ވަހީދު ސިފަކުރެއްވިއެވެ.

ރައީސުލްޖުމްހުރިއްޔާ އިބްރާހިމް މުހައްމަދު ސޯލިހަށް ވަރަށް ވަރުގަދަ ރައްދެއް ދެއްވައި ވަހީދު ވިދާޅުވީ ހިތްޕުޅާ ވެވަޑައިނުގެންނެވި ނަމަވެސް މިއަދު ހުންނެވީ އިދިކޮޅު ސިޔާސީ ޕާޓީއާ ގުޅިގެން ކަމަށެވެ. އެހެންކަމުން އެ ޕާޓީން ކުރަމުންދާ މަސައްކަތްތަކުގައި ބައިވެރިވެ، ބަސް ބުނާނެ ކަމަށް ވަހީދު ވިދާޅުވިއެވެ.

ވަހީދު ވިދާޅުވީ ރައީސް ސޯލިހު އަކީ މިއަށްވުރެ ފުދޭ މީހަކަށް ވާން ޖެހޭ ކަމަށާއި، ހިތްވަރު ހުރި މީހަކަށް ވާންޖެހޭ ކަމަށެވެ. އެންމެ ފަހަރަކު އަގައިން ބުނެގެން ފުލުސް އޮފީހަށް ދަމަން ފެށުމުން ރައީސް ސޯލިހުގެ ގޮތެއް ފޮތެއް ނެތްކަން ހާމަވާ ކަމަށް ވަހީދު ވިދާޅުވިއެވެ.

ވަހީދު ވިދާޅުވީ ޕީޕީއެމް-ޕީއެންސީ ހުކުރު ދުވަހު ސަރުކާރާ ދެކޮޅަށް އެއްވި އެއްވުމަކީ ކުޑަ މަންޒަރެއް ކަމަށާއި، ކުރިއަށް އޮތްތަނުގައި މާބޮޑެތި މަންޒަރުތައް ދައްކާނެ ކަމަށެވެ. އަދި މިއީ ސިޔާސީ ގޮތުން ކުރާ ކަމެއްގެ ގޮތުގައި ވަހީދު ވަނީ ސިފަ ކުރައްވާފައެވެ.