އެމްއެމްއޭގެ ޑެޕިއުޓީ ގަވަރުނަރުގެ މަގާމަށް އިމާދު އައްޔަން ކުރަން ކޮމެޓީން ފާސްކޮށްފި
30 އޯގަސްޓު 2020 | އާދީއްތަ 10:42ކޮމެޓީގައި ބައިވެރިވެވަޑައިގެންނެވި 10 މެމްބަރުންގެ އިއްތިފާގުން ވަނީ އިމާދަށް ރުހުންދިނުމަށް ފާސްކޮށްފައި
އެމްއެމްއޭގެ ގަވަރުނަރު އަލީ ހާޝިމްއާއެކު އަހުމަދު އިމާދު: ޑެޕިއުޓީ ގަވަރުނަރުގެ މަގާމަށް އިމާދު އައްޔަން ކުރަން މާލިއްޔަތު ކޮމެޓީން ވަނީ ރުހުންދީފައި
މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ޑެޕިއުޓީ ގަވަރުނަރުކަމުގެ މަގާމަށް އަހުމަދު އިމާދު އައްޔަނު ކުރުމަށް ރައްޔިތުންގެ މަޖިލީހުގެ މާލިއްޔަތު ކޮމެޓީން ފާސްކޮށްފި އެވެ.
އާދިއްތަ ދުވަހު، މާލިއްޔަތު ކޮމެޓީން ބޭއްވި ބައްދަލުވުމުގައި އެކޮމެޓީން ވަނީ އިމާދުއާ ބައްދަލުކޮށް، އިންޓަވިއު ކުރައްވާފަ އެވެ. އިންޓަވިއު ކުރެއްވުމަށްފަހު، އެކޮމެޓީގައި ބައިވެރިވެވަޑައިގެންނެވި 10 މެމްބަރުންގެ އިއްތިފާގުން ވަނީ އެމްއެމްއޭގެ ޑެޕިއުޓީ ގަވަރުނަރުގެ މަގާމަށް އިމާދު އައްޔަން ކުރުމަށް ފެންނަ ކަމަށް ފާސްކޮށްފަ އެވެެ.
އެމްއެމްއޭގެ މަނިޓަރީ ޕޮލިސީ ރިސާޗް އެންޑް ސްޓެޓިސްޓިކްސް ޑިވިޝަންގެ އެގްޒެކްޓިވް ޑިރެކްޓަރގެ މަގާމު އަދާ ކުރައްވަމުން ގެންދަވާ އިމާދަކީ އެސީއެމްޑީއޭގެ ބޯޑް މެމްބަރެއްގެ ގޮތުގައި މިހާރުވެސް މަސައްކަތްކުރައްވާ ބޭފުޅެކެވެ.
އޭނާ ގެންދަވަނީ 2000 ވަނަ އަހަރުން ފެށިގެން އެމްއެމްއޭގައި މަސައްކަތް ކުރައްވަމުންނެވެ. އަދި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގައި ވެސް މަސައްކަތްކުރައްވާފައިވެއެވެ.
އެމްއެމްއޭގެ ޑެޕިއުޓީ ގަވަރުނަރުކަމުގެ މަގާމު ހުސްވެފައިވަނީ، ކުރިން އެ މަގާމުގައި ހުންނެވި އައިޝަތު ޒާހިރާ މަގާމުން ރިޓަޔާ ކުރެއްވުމާ ގުޅިގެންނެވެ. އޭނާ ވަނީ 2 ދައުރު އެމަޤާމު ފުރުއްވާފައެވެ.
އިމާދު ވަނީ، އިނގިރޭސީވިލާތުން އިކޮނޮމިކްސް އަދި ފައިނޭންސް ދާއިރާއިން މާސްޓާސް ޑިގްރީ ހާސިލް ކުރައްވާފައެވެ. އަދި މެލޭޝިއާއިންވެސް އޭނާ ވަނީ ހަަމަ އެ ދާއިރާތަކުން މަތީ ތަޢުލީމް ހާސިލުކުރައްވާފައެވެ.
