ވެސްޓަޔަރ ފިހާރައިގައި އަލިފާނުގެ ހާދިސާއެއް ހިނގައިފި
30 އޯގަސްޓު 2020 | އާދީއްތަ 09:07އަލިފާނުގެ ހާދިސާ ހިނގީ މިއަދު މެންދުރު 13:08 ގައި
އަލިފާން ނިއްވުމަށް އެމްއެންޑީއެފުގެ ފަޔަރ ފައިޓަރެއް ހަރަކާތްތެރިވަނީ
ހ. ޑޮނީބޯލްގޭގެ ތިރީގައި ހުރި ވެސްޓަޔަރ ފިހާރާގައި އަލިފާނުގެ ހާދިސާއެއް ހިނގައިފިއެވެ.
މި އަލިފާނުގެ ހާދިސާ ހިނގާފައިވަނީ އާދިއްތަ ދުވަހު މެންދުރުފަހު 13:08 ހާއިރުއެވެ.
ޖަނަވަރީ މަގާއި މަޖީދީ މަގު ގުޅޭ ކަންމަތީގައި ހުރި މި ފިހާރައިގައި އަލިފާން ރޯވުމާއެކު އެމްއެންޑީއެފްގެ ފަޔަރ އެންޑް ރެސްކިއުގެ ޓީމުން ވަނީ ރޯވި އަލިފާންގަނޑު މާގިނައިރުތަކެއް ނުވެ ނިއްވާލާފައެވެ. ރޯވި ފިހާރަ ހުންނަ އިމާރާތާ ޖެހިގެން އިތުރު ފިހާތަކެއް ހުރިއިރު، އޭގެން އެއްވެސް ތަނަކަށް ގެއްލުމެއް ލިބިފައިވާ ކަމަކަށް ރަސްމީ އެއްވެސް އިދާރާއަކުން ހާމަކޮށްފައެއް ނުވެއެވެ.
މި އަލިފާނުގެ ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ. ނަމަވެސް ފިހާރަ ވަނީ ބޭނުން ނުކުރެވޭ ވަރަށް އަނދާ ހުލިވެފައެވެ. އެ ފިހާރާގައި އަލިފާން ރޯވާން ދިމާވީ ކޮން ސަބަބަކާ ހުރެކަން އަދި އެނގިފައެއް ނުވެއެވެ.
ފިހާރާގައި އަލިފާން ރޯވުމާއެކު ޖަނަވަރީ މަގުގެ ބޮޑު ބަޔަކަށް ވަނީ ދުމުގެ އަސަރުކޮށްފައެވެ. އެހެންކަމުން ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން ވަނީ ދުމުން ރައްކާތެރިވުމަށް ދުމުގެ އަސަރު ކުރާ ހިސާބަށް އާންމު ފަރާތްތަކުން ނުދިއުމަށް އިލްތިމާސްކޮށްފައެވެ.
