މާލޭގެ ގެއެއްގެ މަތިން ބެރިއެއް ވެއްޓި މީހަކަށް ވަރަށް ބޮޑަށް އަނިޔާވެއްޖެ
30 އޯގަސްޓު 2020 | އާދީއްތަ 08:08މިހާދިސާ ހިނގާފައިވަނީ އާދިއްތަ ދުވަހުގެ ހެނދުނު 10:40 ހާއިރު
މއ. ގޮމަށީގޭ، މިގޭގެ މަތިން ބެރިއެއް ވެއްޓި މީހަކަށް ވަނީ އަނިޔާވެފައި
މާލޭގެ ގެއެއްގެ މަތިން ކޮންކްރީޓް ބެރިއެއް ވެއްޓި މީހަކަށް ވަރަށް ބޮޑަށް އަނިޔާވެއްޖެއެވެ.
ފުލުހުން ބުނީ އެ މީހާއަށް އަނިޔާވެފައި ވަނީ މއ. ގޮމަށީގޭގެ މަތިން ވެއްޓުނު ކޮންކްރީޓް ބެރިއެއްގެ ބަޔަކުން ޖެހިގެން ކަމަށާއި، މިހާރު އެމީހާއަށް އައިޖީއެމްއެޗްގައި ފަރުވާ ދެމުންދާ ކަމަށެވެ.
މިހާދިސާ ހިނގާފައިވަނީ އާދިއްތަ ދުވަހުގެ ހެނދުނު 10:40 ހާއިރު ކަމަށެވެ.
ފުލުހުން ބުނީ މިހާދިސާއާ ގުޅިގެން އިތުރަށް ބަލަންޖެހޭ ކަންކަން ކަމާ ގުޅުންހުރި އިދާރާތަކުގެ އެހީއާއެކު ބަލަމުންދާ ކަމަށެވެ.
ދޭތެރެދޭތެރެއިން މާލެސިޓީގެ ގެތަކުގެ އަސްކަނިން އެއްޗެހި ވެއްޓި މީހުންނަށް އަނިޔާވެއެވެ. އެހެންކަމުން ބެލްކަނިތަކުގައި މަގުމައްޗަށް އެއްޗެހި ނުވެއްޓޭ ގޮތަށް ނުވަތަ މަގުމައްޗަށް ވާ ގޮތަށް ޕޮޓުފަދަ އެއްޗެހި ނުބެހެއްޓުމަށް މާލެސިޓީ ކައުންސިލުން ވެސް ވަނީ އިލްތިމާސްކޮށްފައެވެ.
