ކުޑަކުދިންގެ އަދުލުގެ ގާނޫނާއެކު ޖުވެނައިލް ޖަސްޓިސްގެ ހިންގުމަށް ބޮޑެތި ބަދަލުތަކެއް
އެންމެ ފުޅާ ދާއިރާގައި އެ މަސައްކަތް ކުރުމަށް ހުރަސްތަކެއް އެބަހުރި
ޖުވެނައިލް ޖަސްޓިސްގެ ފަރާތުން ބެލެނިވެރިންނަށް ކައުންސިލިންގ ދިނުމަށް ބޭއްވި ޝެޝަންގެ ތެރެއިން
19 ވަނަ ރައްޔިތުންގެ މަޖިލީހުން ފާސްކޮށްފައިވާ ކުޑަކުދިންގެ އަދުލުގެ ގާނޫނަށް ނޮވެމްބަރު މަހު އަމަލު ކުރަން ފެށުމާއެކު ޖުވެނައިލް ޖަސްޓިސްގެ ހިންގުމަށް ބޮޑެތި ބަދަލުތަކެއް އަންނާނެ ކަމަށް އެ އިދާރާއިން ބުނެފިއެވެ.
ރާއްޖެޓިވީގެ ހަބަރުފީތާ ޕްރޮގްރާމުގައި ވާހަކަ ދައްކަވަމުން ޖުވެނައިލް ޖަސްޓިސް ޔުނިޓުގެ ޖުވެނައިލް ޖަސްޓިސް އޮފިސަރ އާއިޝަތު ނިޝާނާ ވިދާޅުވީ، މިހާރު އަމަލު ކުރަމުންދާ ކުޑަކުދިންގެ ގާނޫނުގެ ދަށުން އެންމެ ފުޅާ ދާއިރާގައި އެ މަސައްކަތް ކުރުމަށް ހުރަސްތަކެއް އެބަހުރި ކަމަށެވެ. އެގޮތުން ރަށްރަށުގައި ދިރިއުޅޭ ކުޑަކުދިންނާއި ސީދާ އެ އިދާރާގެ ޓީމުތަކުން ބައްދަލު ކުރުމުގައާއި އެފަދަ ކުދިން ދެނެގަތުމަށް ކުރާ މަސައްކަތުގައި ހުރަސްތަކެއް ހުރި ކަމަށެވެ. އެގޮތުން ތަފާތު އެކި ކުށްތައްކުރާ ކުދިންނަށް ކައުންސިލިންގ ދިނުމާއި އެވެއާނެސް ޕްރޮގްރާމްތައް ހިންގުން އަދި ރިހެބިލިޓޭޝަން ޕްރޮގްރާމުތައް ހިންގުމަށްވެސް ދަތިތަކާ ކުރިމަތިވެފައިވާ ކަމަށެވެ.
ނިޝާނާ ވިދާޅުވީ ކުޑަކުދިންގެ އަދުލުގެ ގާނޫނާއެކު އެ އިދާރާ "ޖުވެނައިލް ޖަސްޓިސް ޔުނިޓް" އިން "ޑިޕާޓްމަންޓް އޮފް ޖުވެނައިލް ޖަސްޓިސް ޔުނިޓް"އަށް ބަދަލުވެ މިހާރު ކުރަމުންދާ މަސައްކަތުގެ އިތުރަށް ގިނަ ކަންތައްތަކެއް އެ ފަރާތަށް ގާނޫނުން ލާޒިމު ކުރާ ކަމަށެވެ. އެގޮތުން ރަށްރަށުގައި އެ ޑިޕާޓްމަންޓުގެ ގޮފިތައް ގާއިމުކުރެވި، ކުށްތަކަށް ހުށަހެޅޭ ކުދިން ބަހައްޓާނެ ފެސިލިޓީތައް ގާއިމު ކުރެވިގެންދާނެ ކަމަށެވެ.
ކުޑަކުދިން މަގުން ކައްސާލައިގެންދަނީ އާއިލާގެ ފަރާތުން އެކުދިންނަށް ދިމާވާ ނޭދެވޭ ކަންތައްތަކެއްގެ ސަބަބުންކަން ފާހަގަކުރައްވާ ނިޝާނާ ވިދާޅުވީ ކުޑަކުދިން ހަރުދަނާ ބައެއްގެ ގޮތުގައި ހެދުމަށް އާއިލާތަކާއި ސަރުކާރުގެ ސިޔާސަތުތައް ބައްޓަންކުރުމުގައި މުހިންމު ދައުރެއް އަދާކުރާ ކަމަށެވެ. އެގޮތުން އާއިލާތަކަށް ދިމާވެފައިވާ ދަތިތަކާއި ގޮންޖެހުންތަކުން ސަލާމަތްކުރުމަށް ސަރުކާރުގެ ސިޔާސަތުތަކަކީ ވަރަށް އިސްދައުރެއް އަދާކުރާ ކަމެއް ކަމަށް އޭނާ ވިދާޅުވިއެވެ.
ޖުވެނައިލް ޖަސްޓިސް ޔުނިޓުން އެންމެ ފަހުން އާންމުކުރި ތަފާސް ހިސާބުގައި މައިގަނޑު ގޮތެއްގައި ފާހަގަކޮށްފައިވަނީ ފުރާވަރުގެ ކުދިން މަގުން ކައްސާލައި ތަފާތު އެކި ކުށްތަކަށް އަރައިގަތުމެވެ. އެގޮތުން ފާއިތުވި 2019 ވަނަ އަހަރު ކުޑަކުދިންގެ ބޮޑު ޕަސެންޓެއް ވަކި ހިސާބަކުން ސްކޫލު ކިޔެވުން ހުއްޓާލުމަށްފަހު އެކި ކުށްތަކަށް އަރައިގަނެފައިވާކަން ޖޭޖޭޔޫގެ ތަފާސް ހިސާބުތަކުން ދައްކައެވެ.
ޖޭޖޭޔޫއިން ފާހަގަކުރާ ގޮތުގައި އެފަރާތުގެ ބެލުމުގެ ދަށުން އެނބުރި މުޖުތަމައުއަށް އަންނަ ކުދިން އަލުން އަނބުރާ ކުރީގެ ދިރިއުޅުމަށް ދާން މެދުވެރިވަނީ އެކުދިންނަށް ރަނގަޅު ފުރުސަތުތައް ލިބެން ނެތުމެވެ. އެގޮތުން ވަޒީފާއެއް ނުލިބުމާއި އާއިލާގެ ފަރާތުން ދޭންޖެހޭ އެއްބާރުލުން ނުލިބުމަކީ ވެސް ކުދިން ކުށްތަކަށް އަރައިގަންނަން މެދުވެރިވާ ސަބަބެއްކަމަށް އެ އިދާރާ އިން ފާހަގަކުރެއެވެ.
