އޮޕަރޭޓް ކުރުމުގެ ހުއްދަ 95 ސަފާރީއަކަށް ދީފި
76 ސަފާރީއަކުން ދަނީ މިހާރު ހިދުމަތްދެމުން
ސަފާރީތަކެއް
ޓޫރިޒަމް މިނިސްޓްރީ އިން ސަފާރީތައް އޮޕަރޭޓް ކުރުމަށް ދޫކުރާ ހުއްދަ، މިހާރު 95 ސަފާރީއަކަށް ދީފައިވާ ކަމަށް ނެޝަނަލް ބޯޓިން އެސޯސިއޭޝަން އޮފް މޯލްޑިވްސް އިން ބުނެފިއެވެ.
ބޯޓިން އެސޯސިއޭޝަނުން ބުނީ އޮޕަރޭޓް ކުރުމަށް ހުއްދަ ދީފައިވާ ސަފާރީތަކުގެ ތެރެއިން 76 ސަފާރީއަކުން މިހާރު ވެސް ފަތުރުވެރިންނަށް ހިދުމަތްދޭ ކަމަށެވެ. އަދި ސެޕްޓެމްބަރު މަހު 17 ސަފާރީއަކުން ހިދުމަތްދޭން ފަށާނެ ކަމަށާއި އޮކްޓޫބަރު މަހު ދެ ސަފާރީއެއް އޮޕަރޭޓް ކުރަން ފަށާނެ ކަމަށް އެންބީއޭއެމް އިން ބުނެއެވެ.
ފަތުރުވެރިންނަށް ހިދުމަތް ދިނުމުގެ ހުއްދަ ސަފާރީތަކަށް ދޭއިރު، ސަރުކާރުން ކަނޑައަޅާފައިވާ މިންގަނޑުތަކަށް ފެތޭތޯ ބަލާއިރު، އޮޕަރޭޓް ކުރުމުގެ ހުއްދަ އަށް އެދި ޓޫރިޒަމް މިނިސްޓްރީއަށް ޑިކްލެރޭޝަން ފޯމާއި ސަފާރީގެ އޮޕަރޭޓިން ލައިސަންސް އާއި، މީރާގެ ޓެކްސް ކްލިއަރެންސް ފޯމް ހުށައަޅަން ޖެހެއެވެ. އަދި ސަފާރީ އިން ސަލާމަތާއި ރައްކާތެރިކަމުގެ މިންގަނޑުތައް ގެންގުޅޭނެ ގޮތުގެ ޕްލޭންއެއް ވެސް މިނިސްޓްރީ އަށް ހުށަހަޅަން ޖެހެއެވެ.
ސަފާރީތަކުން ފަތުރުވެރިންނަށް ހިދުމަތް ދިނުމަށް ފަށާފައިވާއިރު، ރާއްޖެ އަންނަ ފަތުރުވެރިންގެ ރައްކާތެރިކަން ކަށަވަރު ކުރުމަށް ވަނީ ގިނަ މަސައްކަތްތަކެއް ކޮށްފައެވެ. އެގޮތުން ސަފާރީގައި ޗުއްޓީ ހޭދަކުރަން އަންނަ ފަތުރުވެރިންގެ ޕީސީއާރު ޓެސްޓު ހެދުމުގެ އިންތިޒާމް ހުޅުމާލޭގައި ވަނީ ހަމަޖައްސާފައެވެ. އަދި ސަފާރީތަކުން މީހުން އުޅޭ ރަށްރަށަށް ފޭބުން މަނާކޮށްފައިވާއިރު، ރަށްރަށުން މީހުން ސަފާރީތަކަށް އެރުން ވެސް ވަނީ މަނާކޮށްފައެވެ.
