ވަގުތީ ބޯހިޔާވަހިކަން ފޯރުކޮށްދޭނީ ހާލަތު އެސެސް ކުރުމަށްފަހު: އެންޑީއެމްއޭ
އަލިފާންގަނޑު ނިމުމުން އެންޑީއެމްއޭގެ ސްޓާފުންނާއި ސިފައިން އިމާރާތްތައް އެސެސްކުރާނެ
އެސްބީއައި އިމާރާތުގައި ހިނގި އަލިފާނުގެ ހާދިސާގެ ތެރެއިން
ހުކުރު ދުވަހުގެރޭ ކެފޭ ޓިއޯލޯގައި އަލިފާން ރޯވެ އެ އަލިފާނުގެ އަސަރު ކޮށްފައިވާ އާއިލާތަކަށް ވަގުތީ ބޯހިޔާވަހިކަން ފޯރުކޮށްދޭނީ ހާލަތު އެސެސް ކުރުމަށްފަހު ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނެފިއެވެ.
ރާއްޖެޓީވީއަށް ދެއްވި އިންޓަވިއުއެއްގައި އެންޑީއެމްއޭގެ ޗީފް އެގްޒެކިއުޓިވް ހިސާން ހަސަން ވިދާޅުވީ، ހާދިސާގައި އަސަރު ކުރި އާއިލާތަކަށް ބޯހިޔާވަހިކަން ފޯރުކޮށްދޭނީ އަލިފާންގަނޑު ނިވުމުން އެންޑީއެމްއޭގެ ސްޓާފުން އަދި ސިފައިން އިމާރާތްތަކަށް ގޮސް ކުރާ އެސެސްމެންޓެއްގެ ފަހުން ކަމަށެވެ.
ކަލާފާނު ސްކޫލުގައި ބޯހިޔާވަހިކަން ފޯރުކޮށްދިނުމަށް ތައްޔާރީތައް ވެފައިވާ ކަމަށް ފާހަގަކުރައްވާ ހިސާން ވިދާޅުވީ، އެ ސްކޫލަށް ބަދަލުކުރަން ޖެހޭ މީހުން ކަށަވަރު ކުރުމަށް ފަހު އެމީހުންނަށް ބޯހިޔާވަހިކަން ފޯރުކޮށްދިނުމުގު މަސައްކަތް ކުރާނެ ކަމަށެވެ. އިމާރާތްތަކުން ނެރުނު މީހުން އަލިފާންގަނޑު އެއްކޮށް ނިއްވާލެވެންދެން އެ ސަރަހައްދުގައި ބަހައްޓާފައިވެސް ވެއެވެ.
ހިސާން ވަނީ މި ހާދިސާ އާއި ގުޅިގެން ނެޝެނަލް އެމަރޖެންސީ އޮޕަރޭޝަން ސެންޓަރު އަލުން އެކްޓިވޭޓްކޮށް އެކުގައި މަސައްކަތް ކުރާ އިދާރާތަކުގެ މަސައްކަތް މިހާރު ފަށާފައިވާ ކަމަށް ވެސް ވިދާޅުވެފައެވެ.
