އަލިފާންގަނޑު ކޮންޓްރޯލް ކުރެވިއްޖެ
28 އޯގަސްޓު 2020 | ހުކުރު 18:50އަލިފާންގަނޑު ކޮންޓްރޯލް ކުރުމަށް އެމްއެންޑީއެފް އަދި އެއާޕޯޓް ފަޔަރ ޓީމުން ވަނީ ހަރަކާތްތެރިވެފައި
ކެފޭ ޓިއޯލޯގައި އަލިފާން ރޯވެ ޖެހިގެން ހުރި ސްޓޭޓް ބޭންކު އޮފް އިންޑިއާ އިމާރާތާއި އަދި އެހެން ބައެއް އޮފީސްތަކަށް ވެސް ގެއްލުންވެފައިވޭ
މާލޭގައި ހުކުރު ދުވަހުގެ ރޭ އަލިފާނުގެ ބޮޑު ހާދިސާއެއް ހިނގައިފި އެވެ.
އެމްއެންޑީއެފުން މައުލޫމާތު ދިން ގޮތުގައި، މި ހާދިސާގެ ރިޕޯޓް ލިބިފައިވަނީ ހުކުރު ދުވަހުގެ ރޭ ގާތްގަނޑަކަށް 9:45 އެހާކަންހާ އިރު އެވެ.
އަލިފާން އެންމެ ފުރަތަމަ ރޯވެފައިވަނީ ކެފޭ ޓިއޯލޯގައި އެވެ. އެތަނުގައި ރޯވި އަލިފާންގަނޑު ކޮންޓްރޯލް ނުކުރެވި އުޅެނިކޮށް، ސްޓޭޓް ބޭންކު އޮފް އިންޑިއާ އިމާރާތާއި، އުރީދޫ އޮފީހާއި އަދި ބައެއް އެހެން ކުންފުނިތަކުގެ އޮފީސް ހިންގާ ގަދަގޭ މުހައްމަދުފުޅު ބިލްޑިންގުގައި އަލިފާން ރޯވި އެވެ.
އާޓީފިޝަލް ބީޗު ކުރިމައްޗަށް ވާ ގޮތަށް ހުރި މި އިމާރާތްތަކުގައި ރޯވި އަލިފާންގަނޑު ކޮންޓްރޯލް ކުރުމަށް އެމްއެންޑީއެފްގެ ފަޔަރ ޓީމުގެ އިތުރުން އެއާޕޯޓްގެ ފަޔަރ ޓީމް ވެސް ވަނީ ހަރަކާތްތެރި ވެފަ އެވެ.
އެސަރަހައްދުގައި ހުރި އިމާރާތްތަކުގައި ދިރިއުޅޭ ފަރާތްތައް އެ އިމާރާތްތަކުން ނެރުމުގެ މަސައްކަތް އެމްއެންޑީއެފް ވަނީ ކުރިއަށް ގެންގޮސްފަ އެވެ. ރޯވި އަލިފާންގަނޑު ކޮންޓްރޯލް ކުރުމަށް އެމްއެންޑީއެފްގެ ފަޔަރ އެންޑް ރެސްކިއު ސަރވިސަސްގެ ފަޔަމަނުން ކުރި މަސައްކަތުން އަލިފާން ނިންވާލާފައިވަނީ ރޭ 12:34 އެހާ އިރު އެވެ. އަލިފާންގަނޑު ކޮންޓްރޯލް ކުރެވުނު އިރު، މިހާދިސާގައި އެއްވެސް މީހަކަށް އަނިޔާވެފައި ނުވި ނަމަވެސް އަލިފާން އެންމެ ފުރަތަމަ ރޯވި ކެފޭ ވަނީ އަނދާ ހުލިވެފަ އެވެ. އަދި އަލިފާނުގެ އަސަރުކުރި އެހެން އިމާރަތްތަކަށް ވެސް ވަނީ ބޮޑެތި ގެއްލުން ލިބިފައެވެ.
އިމާރާތްތަކުން ނެރުނު މީހުން އުފުލުމުގެ މަސައްކަތުގައި މާލެ ސިޓީ ކައުންސިލުން ހަރަކާތްތެރިވެފައިވާއިރު، ބޭނުން ޖެހިއްޖެ ހާލަތެއްގައި ކަލާފާނު ސްކޫލުގައި ވަގުތީ ބޯހިޔާވަހިކަން ފޯރުކޮށްދިނުމަށް ވެސް ވަނީ ތައްޔާރުކޮށްފަ އެވެ.
