ސިއްހީ ކުއްލި ނުރައްކަލުގެ ހާލަތު އުވާލުމުން އަސާސީ ޕެންޝަނަށް ކުރިމަތި ނުލެވި ތިބި ފަރާތްތަކަށް އެފުރުސަތު ހުޅުވާލާ އުމުރު ފުރޭ ދުވަހުން ފެށިގެން ފައިސާ ދޭގޮތަށް އުމުރުން ދުވަސްވީ މީހުންގެ އަސާސީ ޕެންޝަން ދިނުމުގެ ގަވާއިދަށް އިސްލާހު ގެނެސްފިއެވެ.

އުމުރުން ދުވަސްވީ މީހުންގެ އަސާސީ ޕެންޝަން ދިނުމުގެ ގަވާއިދަށް ގެނައި އިސްލާހު ގެޒެޓްކޮށްފައިވާއިރު، މި ގަވާއިދަށް ގެނެސްފައިވާ އިސްލާހަކީ މި ގަވާއިދުގެ 14 ވަނަ މާއްދާގެ (ނ) ގެ ފަހަތަށް އަކުރެއް އިތުރު ކުރުމެވެ.

މި ގަވާއިދުގެ 14 ވަނަ މާއްދާގެ (ނ) ގައި ބުނެފައިވަނީ ޤާނޫނު ނަންބަރު 2009/8 (ދިވެހިރާއްޖޭގެ ޕެންޝަނާބެހޭ ޤާނޫނު) ގެ ދަށުން އުމުރުން ދުވަސްވީ މީހުންގެ އަސާސީ ޕެންޝަންގެ ފައިސާ، މި ގަވާއިދުގައިވާ ގޮތުގެ މަތިން، އެކައުންޓަށް ޖަމާކުރެވޭނީ، މި ގަވާއިދުގައި ވާގޮތުގެ މަތިން އަސާސީ ޕެންޝަނަށް އެދި ޕެންޝަން އޮފީހަށް ޕެންޝަނަށް އެދި ހުށަހަޅާ ފޯމު ހުށަހެޅުމުންނެވެ. މިގޮތުން، އަސާސީ ޕެންޝަން ޙައްޤުވާ އުމުރު ހަމަވެފައިވީ ނަމަވެސް، އަސާސީ ޕެންޝަނަށް އެދި ހުށަހަޅާފައިނުވާނަމަ، ފާއިތުވެފައިވާ މުއްދަތުގެ އަސާސީ ޕެންޝަންގެ ފައިސާ ޖަމާކުރެވޭނީ، އަސާސީ ޕެންޝަނަށް އެދި ފޯމު ހުށަހެޅި ތާރީޚުން ފެށިގެން ފާއިތުވެފައިވާ 1 އަހަރު ދުވަހުގެ މުއްދަތަށް ކަމަށެވެ.

ނަމަވެސް 14 ވަނަ މާއްދާގެ (ނ) ގެ ފަހަތަށް އަކުރެއް އިތުރުކޮށްފައިވަނީ ކޮވިޑް-19 އާއި ގުޅިގެން އިއުލާންކޮށްފައިވާ ސިއްހީ ކުއްލި ނުރައްކަލުގެ ހާލަތުގެ ސަބަބުން ބައެއް ފަރާތްތަކަށް މި ގަވާއިދުގެ 14 ވަނަ މާއްދާގެ (ނ) ގައި ބުނެފައިވާ ފަދައިން ފޯމް ހުށަހެޅުމުގެ ފުރުސަތު ލިބިފައި ނުވާތީއެވެ.

ގަވާއިދު އިސްލާހުކޮށް އިތުރު ކުރި އަކުރުގައި ބުނެފައިވަނީ މި ގަވާއިދުގެ 14 ވަނަ މާއްދާގެ (ނ) ގައި އެހެން ބުނެފައިވީ ނަމަވެސް، އާންމު ޞިއްޙަތުގެ ކުއްލި ނުރައްކަލުގެ ހާލަތު އިޢުލާނުކުރި ތާރީޚު ކަމުގައިވާ 12 މާރިޗު 2020 އިން ފެށިގެން އެ ހާލަތު އުވާލާ ފަހުން 30 ދުވަސް ހަމަވާ ތާރީޚުގެ ނިޔަލަށް، އަސާސީ ޕެންޝަން ޙައްޤުވާ އުމުރު ފުރޭ ފަރާތްތަކުގެ ތެރެއިން އަސާސީ ޕެންޝަން ލިބުމަށް އެދި ފޯމު ހުށަހެޅިފައި ނުވާ ފަރާތަކުން، އެ ހާލަތު އުވައިލާ ތާރީޚުން ފެށިގެން 3 މަސްދުވަހުގެ ތެރޭގައި އަސާސީ ޕެންޝަނަށް އެދި ފޯމު ހުށަހަޅައިފިނަމަ، އެ ފަރާތަކަށް އަސާސީ ޕެންޝަން ޙައްޤުވާ އުމުރު ފުރުނު މަހުން ފެށިގެން އަސާސީ ޕެންޝަނުގެ ފައިސާ ޖަމާކުރެވޭނެ ކަމަށެވެ. އަދި 12 މާރިޗު 2020 ގައި އިޢުލާނު ކުރި، އާންމު ޞިއްޙަތުގެ ކުއްލި ނުރައްކަލުގެ ހާލަތު އުވާލުމުން، މި މާއްދާގެ ދަށުން ޝަރުޠު ހަމަވާ މުއްދަތުތައް ބަޔާންކޮށް ޕެންޝަން އޮފީހުން އާންމުކޮށް އިޢުލާނު ކުރަންވާނެ ކަމަށް ވެސް ބުނެފައިވެއެވެ.