މަޖިލިސް ޗުއްޓީއަށް ދާނީ ހޯމަ ދުވަހު
ދެވަނަ ދައުރު ނިންމާލުމަށް މަޖިލީހުން ކުރިން ގަސްތުކޮށްފައިވަނީ އޮގަސްޓް މަހުގެ 27 ވަނަ ދުވަހު
ރައްޔިތުންގެ މަޖިލިސް
ރައްޔިތުންގެ މަޖިލީހުގެ ހިނގަމުންމިދާ ދައުރު ނިންމާލާނީ 31 އޮގަސްޓް ވާ ހޯމަ ދުވަހު ކަމަށް ރައްޔިތުންގެ މަޖިލީހުން ބުނެފިއެވެ.
މިއަހަރުގެ ދެވަނަ ދައުރު ނިންމާލުމަށް މަޖިލީހުން ކުރިން ގަސްތު ކޮށްފައިވަނީ އޮގަސްޓް މަހުގެ 27 ވަނަ ދުވަހުއެވެ. އެހެންނަމަވެސް، ބުދަ ދުވަހުގެ ޖަލްސާގައި ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ ޗުއްޓީއަށް ދާން އޮންނަ މަހުގެ އެންމެ ފަހު ހޯމަ ދުވަހު، ޗުއްޓީއަށް ދިއުމަށް މަޖިލީހުގެ ގަވާއިދުން ތަންދޭ ކަމަށެވެ.
އަދި އަންނަ ހޯމަ ދުވަހަކީ މި މަހުގެ އެންމެ ފަހު ދުވަސް ކަމުން ޗުއްޓީއަށް ދިއުމަށް ގަސްތު ކުރައްވަނީ އެދުވަހު ކަމަށާއި އެދުވަހު ޗުއްޓީއަށް ނުގޮސް މަޑުކޮށްލައިފިނަމަ 8 ބިލެއްގެ މަސައްކަތް ނިންމާލެވޭނެ ކަމަށެވެ.
އެހެންކަމުން މި ދައުރު ނިންމާލުމަށްފަހު މަޖިލިސް ޗުއްޓީއަށް ދާނީ ހޯމަ ދުވަހުގެ ޖަލްސާ އަށް ފަހުއެވެ.
މަޖިލިސް ތިން ދައުރަކަށް ބެހިގެންދާއިރު މިހާރު ހިނގަމުން މިދަނީ މިއަހަރުގެ 2 ވަނަ ދައުރެވެ.
2020 ވަނަ އަހަރުގެ ދެވަނަ ދައުރު ނިންމާލުމަށްފަހު ޗުއްޓީއަށް ދިއުމަށް މަސައްކަތް ކުރަމުންދާއިރު، މި ދައުރުގައި ގިނަ މަސައްކަތްތަކެއް މަޖިލީހުން ވަނީ ކޮށްފައެވެ. އޭގެ ތެރޭގައި ފުރަތަމަ ފަހަރަށް ކޮންސިއުމަރ ޕްރޮޓެކްޝަންގެ ގާނޫނެއް ފާސްކުރުމާއި އެއްގަމު ދަތުރުފަތުރުގެ ގާނޫނަށާއި އިމްޕޯޓު އެކްސްޕޯޓުގެ ގާނޫނަށް މުހިއްމު އިސްލާހުތަކެއް ގެނެސްފައިވެއެވެ.
އަދި ކޮވިޑް-19 އާ ގުޅިގެން އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ކައުންސިލްތަކުގެ އިންތިޚާބު ފަސްކޮށް، އިންތިޚާބެއް ބޭއްވެންދެން މިހާރު އޮތް ކައުންސިލްތަކުގެ ދައުރު ދެމިގެންދާ ގޮތަށް ޤާނޫނުއަސާސީ އަށް އިސްލާހު ގެނެސްފައިވަނީ ވެސް މި ދައުރުގައެވެ.
މީގެއިތުރުން ސަރުކާރުގެ މުއައްސަސާތަކާއި މިނިވަން މުއައްސަސާތައް ޖަވާބުދާރީކޮށް ޒިންމާދާރު ކުރުވުމަށް ބޮޑެތި މަސައްކަތްތަކެއް މަޖިލީހުން މި ދައުރުގައި ކޮށްފައިވާކަން ފާހަގަކޮށްލެވެއެވެ. އޭގެތެރެއިން އެންމެ ފާހަގަކޮށްލެވެނީ މަޖިލީހުގެ އެދުމުގެ މަތިން ކޮވިޑާއި ގުޅިގެން ވުޒާރާތަކުން ކުރި ހަރަދުތަކުގެ އޮޑިޓު ކޮމްޕްލަޔަންސް ރިޕޯޓުތައް ހަދާ، އެ ރިޕޯޓުތަކުން ފެންމަތިވި މައްސަލަތައް ބެލުމަށް ކުރަމުންދާ މަސައްކަތްތަކެވެ.
އަދި 19 ވަނަ ރައްޔިތުންގެ މަޖިލީހުގެ ކުރީގެ ދައުރުތަކާއި އެއްގޮތަށް މި ދައުރުގައި ވެސް ޖުޑިޝަރީ އިސްލާހު ކުރުމަށް ގިނަ މަސައްކަތްތަކެއް ކޮށްފައިވެއެވެ.
