ބާސެލޯނާ ދޫކޮށްލަން އެ ކުލަބުގެ ކެޕްޓަން ލިއޮނެލް މެސީ ނިންމައި، އެކަން މަގުފަހުކޮށްދިނުމަށް މެނޭޖުމަންޓުގައި އެދެފިއެވެ.

އަންގާރަ ދުވަހުގެ ވަގުތެއްގައި މެސީ ވަނީ ކުލަބު ދޫކޮށްލަން ނިންމައި، އެކަން ބާސާގެ މެނޭޖުމަންޓަށް އަންގާފައެވެ. މެސީ ބާސާ ދޫކޮށްލަން ނިންމިކަން އެ ކުލަބުން ވަނީ "އެސޯސިއޭޓެޑް ޕްރެސް" އަށް ކަށަވަރުކޮށްދީފައެވެ. އެއާއެކު ބާސާގެ ބޯޑު މެންބަރުން ކުއްލި ބައްދަލުވުމެއް އަންގާރަ ދުވަހުގެރޭ ބޭއްވި ކަމަށް ރިޕޯޓުތައް ބުނެއެވެ.

ރިޕޯޓުތައް ބުނާ ގޮތުން މެސީ ބާސާގެ މެނޭޖްމަންޓަށް ފޮނުވި ލިޔެކިޔުންތަކުގައި އެދެފައިވަނީ މި ޓްރާންސްފާ ބާޒާރުގައި އެ ކުލަބު ދޫކޮށް ދެވޭ ގޮތަށް އޭނާގެ އެއްބަސްވުން ބަދަލު ކޮށްދިނުމަށެވެ.

ބާސާއާއެކު މެސީ ހަދާފައިވާ އެއްބަސްވުން އަންނަ އަހަރުގެ ހޫނު މޫސުމުގައި ހަމަވަން އޮތްއިރު، މިހާރު އޮތް ގޮތުންނަމަ މި ޓްރާންސްފާ ބާޒާރުގައި މެސީ ގެންދަން ބޭނުންވާ ކްލަބަކުން، އެއްބަސްވުން އުވާލަން 700 މިލިޔަން ޔޫރޯ ދައްކަން ޖެހޭނެއެވެ. އެހެންކަމުން މެސީ ވަނީ އެއްބަސްވުން ބަދަލުކޮށް، މި ޓްރާންސްފާ ބާޒާރުގައި ހިލޭ އެ ކުލަބު ދޫކޮށް ދިޔުމުގެ ފުރުސަތު ތަނަވަސްކޮށްދިނުމަށް އެދެފައެވެ.

ކުލަބު ދޫކޮށްލަން މެސީ އެދުމާ ގުޅިގެން ބާސާގެ ބޯޑު މެންބަރުން ކުއްލި ބައްދަލުވުމެއް ބޭއްވިއިރު، ކުރިއަށް އޮތް ދުވަސްތަކުގައި މިކަމާ ދޭތެރޭ ބޯޑުން ވަކިގޮތެއް ނިންމާނެ ކަމަށް ރިޕޯޓުތައް ބުނެއެވެ. ބާސާ ދޫކޮށްލަން މެސީ ބޭނުންވާކަން ހާމަކުރިއިރު، އަންގާރަ ދުވަހުގެ ވަގުތެއްގައި ބާސާގެ ކުރީގެ ކެޕްޓަން ކާލްސް ޕުޔޯލް ވަނީ މެސީގެ ނިންމުމަށް ސަޕޯޓް ދޭނެ ކަމަށް ބުނެ ޓްވީޓެއް ކޮށްފައެވެ.

ރިޕޯޓުތައް ބުނާ ގޮތުން މެސީ ބާސާ ދޫކޮށްލަން ބޭނުންވާ އެންމެ ބޮޑު އެއް ސަބަބަކީ އެ ކުލަބުގެ ރައީސް ޖޯސެފް މާރިއާ ބާޓޮމެއޫގެ ނިންމުންތަކާ މެދު ހިތްހަމަނުޖެހޭތީއެވެ. އަދި ބާސާގެ ރައީސްގެ މަގާމުގައި ބާޓޮމެއޫ ހުރިހާ ދުވަހަކު މެސީއަށް ބާސާގައި ކުރިމަގެއް ނެތް ކަމަށް އޭނާ ގަބޫލުކުރާ ކަމަށްވެސް ބުނެއެވެ. އެކަމަކު މީގެ ކުރިން ބާސާގެ ރައީސް ޖޯސެފް މާރިއާ ބާޓޮމެއޫ ވަނީ މެސީ ބާސާ ދޫކޮށް ނުދާނެ ކަމަށް ވިދާޅުވެފައެވެ.

މެސީ ބާސާ ދޫކޮށްލާނެ ކަމަށް ބެލެވޭއިރު، ބާސާގެ ކޯޗުގެ މަގާމާ ދާދި ފަހުން ހަވާލުވި ރޮނާލްޑް ކޫމަން ވަނީ އޭނާގެ އުންމީދަކީ ގިނަ އަހަރުތަކެއް ވަންދެން މެސީއާއެކު މަސައްކަތްކުރުން ކަމަށް ބުނެފައެވެ.

ބާސާގެ ސީނިއާ ޓީމުން 2004 ވަނަ އަހަރު ކެރިއަރު ފެށި މެސީއަކީ ބާސާގެ ތާރީޚުގައި އެޓީމަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އެގޮތުން މިހާތަނަށް 634 ލަނޑު މެސީ ކާމިޔާބުކޮށްފައިވާއިރު، އޭނާ ވަނީ ބާސާއާއެކު ސްޕެނިޝް ލީގު 10 ފަހަރު ހޯދާފައެވެ. އަދި ޗެމްޕިއަންސް ލީގު ހަތަރު ފަހަރު ހޯދާފައި ވާއިރު، މެސީ ވަނީ މިހާތަނަށް ދުނިޔޭގެ އެންމެ މޮޅު ކުޅުންތެރިޔާއަށްދޭ ބަލޮންޑޯ އެވޯޑް ހަ ފަހަރު ހޯދާފައެވެ. މެސީ އަކީ މި އެވޯޑް އެންމެ ގިނައިން ހޯދި ކުޅުންތެރިޔާއެވެ.