ކާފިއުގެ ވަގުތު އިތުރުކުރުމުގެ އިޝާރާތެއް ޓެގް ޓީމުން ދީފި

ކޮވިޑް-19 އާއި ގުޅިގެން ގްރޭޓަރ މާލެ ސަރަހައްދުގައި އަޅާފައިވާ ފިޔަވަޅުތައް ހާލަތަށް ބަލާފައި ހަރުކަށި ކުރުމުގެ ގޮތުން ކާފިއުގެ ވަގުތު އިތުރުކުރުމުގެ އިޝާރާތެއް ޓެކްނިކަލް އެޑްވައިޒަރީ ގްރޫއްޕު (ޓެގް) އިން ހާމަކޮށްފިއެވެ.

އަންގާރަ ދުވަހުގެރޭ ހެލްތް އެމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓެގް ޓީމުގައި ހިމެނިވަޑައިގަންނަވާ ޑރ. އަހުމަދު ޝަހީދު ވިދާޅުވީ ފިޔަވަޅުތައް އަޅަމުން ދަނީ ކޮންމެ ހަފްތާއަކު ވެސް ހާލަތަށް ބެލުމަށްފަހުގައި ކަމަށެވެ. އެގޮތުން އެންމެ ފަހުން އެޅި ފިޔަވަޅަކީ ކާފިއު އިއުލާން ކުރުން ކަމަށާއި، އެހެންކަމުން ހިސާބުތަކަށް ބަލާ އިތުރަށް ގޯސް ވެއްޖެނަމަ ކާފިއު ގަޑި ނުވަތަ މަގުމައްޗަށް މީހުން ނުކުމެ އުޅުން މަނާ ގަޑިތައް މިއަށްވުރެ އިތުރުކުރަން ޖެހިދާނެ ކަމަށެވެ. މީގެ އިތުރުން އަދި އޮފީސްތައް ބަންދުކުރުން ކަހަލަ އިތުރު ފިޔަވަޅުތައް ގެނެވޭނެ ކަމަށް ޑރ. ޝަހީދު ވިދާޅުވިއެވެ.

ޑރ. އަހުމަދު ޝަހީދު ވިދާޅުވީ ކޮވިޑް-19ގެ ހާލަތު ދެނެގަތުމަށްޓަކައި ކޮންމެ ހަފްތާއަކު ވެސް ހިސާބު ހަދާ އެކުލަވާލާ ސްކޯއެއް އިންނާނެ ކަމަށެވެ. އަދި މީގައި ބަލާ އެކިއެކި ޕެރަމީޓާރސްތަކެއް ހުންނަ ކަމަށާއި، އޭގެ ތެރޭގައި އެކިއެކި ކޮމްޕޯނަންޓްސް ތަކަށް ސްކޯ ދީފައި އޭގެ ޖުމްލަ ހިސާބު ކޮންމެ ހަފްތާއަކު ހަދާނެ ކަމަށެވެ.

ޑރ. ޝަހީދު ވިދާޅުވީ ބަލަމުންދާނީ ޓޯޓަލް ސްކޯއަކަށް އެކަނި ނޫން ކަމަށާއި، މީގެ ތެރޭގައި ވަރަށް ކަންބޮޑުވުން ހުރި ސްކޯއެއް ހުރެއްޖެނަމަ، އެގެ ތެރޭގައި މަރުވާ މީހުންގެ އަދަދަށް ބަލާ އިރު، އެ އަދަދު މައްޗަށް ގޮސްފިއްޔާ ނުވަތަ ބެޑް ކެޕޭސިޓީ މައްޗަށް ގޮސްފިއްޔާ ވެސް އިތުރު ފިޔަވަޅު އަޅާނެ ކަމަށެވެ.

ޑރ. ޝަހީދު ވިދާޅުވީ ލޮކްޑައުންއަކީ އެންމެ ފަހުގެ ނިންމުމެއްގެ ގޮތަށް ނިންމާނެ ނިންމުމެއް ކަމަށާއި، މަސައްކަތް ކުރަނީ ލޮކްޑައުންއަކަށް ނުގޮސް ވޭތޯ ކަމަށެވެ. އަދި ލޮކްޑައުންއަކާއި އެކި ދިމާވާ ވަރަށް ބޮޑު ދަތިތަކެއް ހުންނަ ކަމަށާއި، އޭގެ ތެރޭގައި އިގްތިސާދީ ގޮތުން ދިމާވާ ދަތިތަކާއި، އަދި ކޮވިޑް ނޫން މީހުންނަށް ފަރުވާ ދިނުމުގައި ދިމާވާ ދަތިތައް ހުންނަ ކަމަށެވެ. އެހެންކަމުން އެންމެ ފަހުގެ ނިންމުމެއްގެ ގޮތުން ލޮކްޑައުން ކޮންސިޑަރ ކުރާނެ ކަމަށާއި، އަދަދުތަކަށް ބަލާ އިރު ސްކޯ މިހާރު މިހުރީ ވަރަށް ކަންބޮޑުވާ ހިސާބެއްގައި ކަމަށެވެ.