ސީއެސްސީގެ ލިސްޓުގައި މެމްބަރެއްގެ މަސްލަހަތު ހިމެނޭ ނަމެއް ނުހިމެނޭ ކަމަށް ކޮމިޓީން ނިންމައިފި
25 އޯގަސްޓު 2020 | އަންގާރަ 10:09އަންގާރަ ދުވަހުގެ ޖަލްސާގައި މި މައްސަލަ ބެލުމަށް އެދިވަޑައިގެންނެވީ މަޖިލީހުގެ ރައީސް މުހައްމަދު ނަޝީދު
އިމްތިޔާޒު ކޮމިޓީގެ ބައްދަލުވުމުގެ ތެރެއިން
ސިވިލް ސާވިސް ކޮމިޝަން (ސީއެސްސީ)ގެ މެންބަރު ކަމަށް އައްޔަން ކުރަން ރުހުންދިނުމަށް ތަޅުމަށް ފޮނުވުމަށް ކޮމިޓީން ފާސް ކުރި ލިސްޓު އެކުލަވާލުމުގައި މިނިވަން މުއައްސަސާތަކުގެ ކޮމިޓީގެ މެންބަރެއްގެ މަސްލަހަތު ހިމެނިފައިނުވާ ކަމަށް އެ މައްސަލަ ބެލި އިމްތިޔާޒު ކޮމިޓީއިން ނިންމައިފިއެވެ.
ސީއެސްސީގެ މެމްބަރު ކަމަށް ކުރިމަތިލީ 41 ބޭފުޅުންނެވެ. އެބޭފުޅުންގެ ނަންތައް ދިރާސާކުރުމަށްފަހު މިނިވަން މުއައްސަސާތަކުގެ ކޮމިޓީން ވަނީ 13 ބޭފުޅުންގެ ނަން ތަޅުމަށް ފޮނުވުމަށް ފާސްކޮށްފައެވެ. އެއާއެކު އަންގާރަ ދުވަހުގެ ޖަލްސާގައި މަޖިލިސް ރައީސް، ރައީސް މުހައްމަދު ނަޝީދު ވަނީ އެ ލިސްޓް ހޮވުމުގައި ނަންތައް ދިރާސާކުރި މިނިވަން މުއައްސަސާތަކުގެ ކޮމިޓީގެ މެންބަރެއްގެ މަސްލަހަތު ހިމެނޭ ކަމަށް ވިދާޅުވެފަ އެވެ. އަދި އެކަން ބެލުމަށް އިމްތިޔާޒާއި ސުލޫކު ކޮމިޓީއަށް މި މައްސަލަ ފޮނުއްވިއެވެ.
މައްސަލައިގެ ތަފްސީލް ނުދެއްވި ނަމަވެސް ނަޝީދު ފޮނުއްވި މައްސަލަ އަކީ ތިނަދޫ ދެކުނު ދާއިރާގެ މެންބަރު އަބްދުﷲ ސަނީފު ކުރީގެ އަނބިކަނބަލުން ސީއެސްސީ އަށް ރުހުން ދޭން ފޮނުވި ލިސްޓްގައި ހިމެނުނު މައްސަލަކަން ވަނީ އެނގިފައެވެ. ނަމަވެސް އެ ނަމަށް ވޯޓަށް އެހިއިރު ސަނީފް އެ ވޯޓްގައި ބައިވެރިވެ ވަޑައިނުގަންނަވާކަން މި މައްސަލައިގެ ކޮމިޓީ ރިޕޯޓުން އެނގެއެވެ. އަދި މި މައްސަލަ ބެލުމަށް ބޭއްވި އިމްތިޔާޒު ކޮމިޓީގެ ބައްދަލުވުމުގައި ވެސް ސަނީފް ބައިވެރިވެވަޑައެއްނުގަންނަވައެވެ.
މި މައްސަލަ ދިރާސާ ކުރުމަށް އިމްތިޔާޒާއި ސުލޫކު ކޮމިޓީން ބޭއްވި ބައްދަލުވުމުގައި ދަނގެތި ދާއިރާގެ މެމްބަރ މުހައްމަދު ނާޒިމް ވިދާޅުވީ މިކަމުގައި މިފަދަ މައްސަލަތަކުގައި މަސްލަހަތު ހިމެނޭ މެމްބަރުން ކޮމިޓީތަކުން ތަނާޒިލްވާނީތޯ މަޖިލީހުގެ ގަވާއިދަށް ބަދަލު ގެނެވިދާނެ ކަމަށެވެ. މީގެކުރިން ވެސް ކޮމިޓީ މެމްބަރުންގެ މަސްލަހަތު ހިމެނޭ މީހުންގެ ކަންކަން ކޮމިޓީތަކުން ނިންމާފައިވާ ކަމަށް ނާޒިމް ވިދާޅުވިއެވެ. އަދި މި މައްސަލަ އަށް ބަލާއިރު ކުރީގެ އަންހެނުން ނުވަތަ ފިރިމީހާ އެއީ މަސްލަހަތު އޮންނަ މީހުން ކަމަށް ގަވާއިދުގައި ބުނެފައިނުވާ ކަމަށް ނާޒިމް ވިދާޅުވިއެވެ.
މި މައްސަލައާ ގުޅޭގޮތުން މެމްބަރުން ވާހަކަ ދެއްކެވުމަށްފަހު ކޮމިޓީގެ މުގައްރިރު ކުޅުދުއްފުށި އުތުރު ދާއިރާގެ މެމްބަރު ޔާސިރު ޢަބްދުއްލަތީފް ދެ ކަމެއް ފާސްކުރުމަށް ވޯޓަށް އެއްސެވި އެވެ.
މިދެކަންތައް ވަނީ ކޮމިޓީގެ މެމްބަރުންގެ އަޣްލަބިއްޔަތުން ފާސްވެފައެވެ.
މި މައްސަލަ ބެލުމަށް އިމްތިޔާޒު ކޮމިޓީއަށް ފޮނުއްވުމުން މިނިވަން މުއައްސަސާތަކުގެ ކޮމިޓީގެ މުގައްރިރު ރޮޒައިނާ އާދަމް ކުރެއްވި ޓްވީޓެއްގައި ވިދާޅުވެފައިވަނީ ސިވިލް ސަރވިސް ކޮމިޝަނުން ހުސްވެފައިވާ 4 މަގާމަށް ކުރިމަތިލެއްވި 41 ބޭފުޅުންގެ ނަންތައް ދިރާސާ ކުރުމަށްފަހު ޝޯޓް ލިސްޓު ކުރެވުނު 13 ބޭފުޅުންގެ ލިސްޓުގައި އެއްވެސް މަޖިލިސް މެމްބަރެއްގެ މަސްލަހަތު ހިމެނޭ ނަމެއް ނޯންނާނެ ކަމަށެވެ.
