ކޮވިޑް-19 އާއި ގުޅިގެން ދައުލަތުގެ ހަރަދު ކުޑަކުރުމަށް އެޅި ފިޔަވަޅުގެ ދަށުން މުސާރަތައް ކުޑަކުރެވުމުން ސަރުކާރަށް 12 މިލިއަން ރުފިޔާ ސަލާމަތް ކުރެވިފައިވާ ކަމަށް ފިނޭންސް މިނިސްޓްރީ އިން ބުނެފިއެވެ.

ސަރުކާރުން ވަނީ ސިޔާސީ މުވައްޒަފުންގެ މުސާރަ އާއި ސަރުކާރު ކުންފުނިތަކުގެ މެނޭޖިން ޑިރެކްޓަރުންގެ މުސާރަ އަދި ސިވިލް ސާވިސް މުވައްޒަފުންގެ ތެރެއިން 20،000 ރުފިޔާއަށް ވުރެން މަތިން އަސާސީ މުސާރަ ލިބޭ ފަރާތްތަކުގެ މުސާރަ ކުޑަކޮށްފައެވެ. އަދި ރައްޔިޔުންގެ މަޖިލީހުގެ ހުއްދައާއިއެކު މަޖިލީހުގެ މެންބަރުންގެ މުސާރަ އާއި ރައީސުލް ޖުމްހޫރިއްޔާގެ މުސާރަ އަދި މިނިވަން މުއްސަސާތަކުގެ މުސާރަތައް ވެސް ކުޑަކޮށްދީފައެވެ.

މިނިސްޓަރުގެ ނައިބާއި އެ ފެންވަރުގެ މަގާމުތަކުން ފެށިގެން މަތީ މަގާމުތަކުގެ ތެރެއިން އަސާސީ މުސާރަ 20،000 ރުފިޔާ އަށް އަށްވުރެ ދަށްވި ނަމަވެސް އެ މަގާމުތަކުގެ އަސާސީ މުސާރައިން 20 އިންސައްތަ އުނިކޮށްފައިވާ އިރު، އާންމު މުވައްޒަފުންގެ ތެރެއިން 20،000 ރުފިޔާ އަށް ވުރެ ދަށުން މުސާރަ ލިބޭ މުވައްޒަފުންގެ މުސާރައިން އެއްވެސް އަދަދެއް އުނިކޮށްފައެއް ނުވެއެވެ.

މުވައްޒަފުންގެ ތެރެއިން 20،001 ރުފިޔާ އާއި 30،000 ރުފިޔާ އާއި ދެމެދުގެ މުސާރަތަކުން 20 އިންސައްތަ އުނިކޮށްފައިވާ އިރު، 30،001 ރުފިޔާ އާއި 60،000 ރުފިޔާ އާއި ދެމެދުގެ މުސާރަތަކުން 30 އިންސައްތަ ވަނީ އުނިކޮށްފައެވެ. އަދި 60،001 ރުފިޔާ އަށް ވުރެ މަތިން މުސާރަލިބޭ މީހުންގެ މުސާރައިން 35 އިންސައްތަ ވަނީ އުނިކޮށްފައެވެ.

ރައްޔިތުންގެ މަޖީލީހުގެ ހުއްދައާއި އެކު މުސާރަ ކުޑަކޮށްފައިވާ ފަރާތްތަކުގެ ތެރެއިން 20،00 ރުފިޔާއާއި 30،000 ރުފިޔާއާ ދެމެދުގެ މުސާރަތަކުން އުނިކޮށްފައި ވަނީ 20 އިންސައްތައެވެ. އަދި 30،001 ރުފިޔާ އާއި 60،000 ރުފިޔާ އާއި ދެމެދުގެ މުސާރަތަކުން 30 އިންސައްތަ އުނިކޮށްފައިވާ އިރު، 60،001 ރުފިޔާ އަށް ވުރެ މަތިން މުސާރަ ލިބޭ މީހުންގެ މުސާރަ އިން އުނިކޮށްފައި ވަނީ 35 އިންސައްތައެވެ. އެހެންނަމަވެސް މަޖިލީހުން މުސާރަ ކުޑަކުރުމުގެ ހުއްދަ ދީފައިވަނީ ޖުލައި މަހުގެ ނިޔަލަށެވެ.

ރާއްޖެއެމްވީ އަށް އެނގިފައިވާގޮތުން ކޮވިޑް-19 އާއި ގުޅިގެން ކުޑަކުރި މުސާރަތައް އޮގަސްޓް މަހުން ފެށިގެން އިޔާދަކޮށްފައިވާ އިރު، ސަރުކާރުން ކުޑަ ކުރި މުސާރަތައް ވެސް ޖުލައި މަހުގެ ނިލަށް ކުޑަ ކުރުމަށް ފަހު އިޔާދަކޮށްފައި ވަނީ މަޖިލީހުން ކުޑަ ކުރި މުސާރަތައް ކުޑަކުރުމަށް ދިން މުއްދަތު ހަމަވުމާ ގުޅިގެންނެވެ.

ހަރަދު ކުޑަ ކުރުމަށް ސަރުކާރުން މުސާރަތައް ކުޑަ ކުރި ނަމަވެސް ނެޝަނަލް ޑިޒާސްޓާ މެނޭޖްމަންޓުގެ މުވައްޒަފުންނާއި ހެލްތު ޕްރޮޓެކްޝަން އެޖެންސީގެ މުވައްޒަފުންގެ އިތުރުން، ސިއްހީ ހިދުމަތްދޭ މަރުކަޒުތަކާއި ހޮސްޕިޓަލްތަކުގެ މުވައްޒަފުންގެ ތެރެއިން ރައީސުލްޖުމްހޫރިއްޔާ އައްޔަން ކުރާ މަގާމުތައް ފިޔަވައި އެހެން މުވައްޒަފުންނާއި އެމްއެންޑީއެފް އަދި މޯލްޑިވްސް ޕޮލިސް ސަރވިސް ގެމުވައްޒަފުންނާއި ނެޝަނަލް އިރމަޖެންސީ އޮޕަރޭޝަން ސެންޓަރުގައި މަސައްކަތް ކުރާ ފަރާތްތަކުގެ ތެރެއިން އެ ފަރާތެއް ނިސްބަތްވާ އިދާރާއަކުން އައްޔަން ކުރުމުގެ ސަބަބުން އެ ސެންޓަރުގައި ދުވާލަކު މަދުވެގެން ހަ ގަޑިއިރު މަސައްކަތް ކުރާ ފަރާތްތަކުގެ މުސާރަ ކުޑަ ކޮށްފައެއް ނުވެއެވެ.