ސީއެސްސީ ލިސްޓުގައި މެމްބަރެއްގެ މަސްލަހަތު ހިމެނޭ ނަމެއް ނޯންނާނެ: ކޮމިޓީ މުގައްރިރު
25 އޯގަސްޓު 2020 | އަންގާރަ 06:21އަންގާރަ ދުވަހުގެ ޖަލްސާގައި މި މައްސަލަ ބެލުމަށް އެދިވަޑައިގެންނެވީ މަޖިލީހުގެ ރައީސް މުހައްމަދު ނަޝީދު
މިނިވަން މުއައްސަސާތަކުގެ ކޮމިޓީގެ މުގައްރިރު ރޮޒެއިނާ އާދަން
ސިވިލް ސަރވިސް ކޮމިޝަނުން ހުސްވެފައިވާ 4 މަގާމަށް ކުރިމަތިލެއްވި 41 ބޭފުޅުންގެ ނަންތައް ދިރާސާ ކުރުމަށްފަހު ޝޯޓް ލިސްޓު ކުރެވުނު 13 ބޭފުޅުންގެ ލިސްޓުގައި އެއްވެސް މަޖިލިސް މެމްބަރެއްގެ މަސްލަހަތު ހިމެނޭ ނަމެއް ނޯންނާނެ ކަމަށް މިނިވަން މުއައްސަސާތަކުގެ ކޮމިޓީގެ މުގައްރިރު ރޮޒެއިނާ އާދަމް ވިދާޅުވެއްޖެއެވެ.
ރޮޒެއިނާ މިހެން ވިދާޅުވީ ސީއެސްސީއިން ހުސްވެފައިވާ 4 މަގާމަށް ކުރިމަތިލެއްވި ބޭފުޅުންގެ ނަންތައް ދިރާސާ ކުރުމަށްފަހު ޝޯޓް ލިސްޓު ކުރެވުނު 13 ބޭފުޅުންގެ ލިސްޓުގައި މަޖިލިސް މެމްބަރެއްގެ މަސްލަހަތު އޮތް ނަމެއް ހިމެނޭ ކަމަށް ބެލެވޭތީ، އެ މައްސަލަ ބެލުމަށް މަޖިލީހުގެ އިމްތިޔާޒް އަދި ސުލޫކު ކޮމިޓީއަށް ރައްޔިތުންގެ މަޖިލީހުގެ ރައީސް ފޮނުއްވާފައި ވަނިކޮށެވެ.
ރޮޒެއިނާ ކުރެއްވި ޓުވީޓެއްގައި ވިދާޅުވީ ކޮމިޓީން ތަޅުމަށް ފޮނުވީ އިންޓަރވިއު ކުރެވުނު ބޭފުޅުންގެ ތެރެއިން އެންމެ ގާބިލު 13 ބޭފުޅުން ކަމަށެވެ. އަދި ކޮމިޓީ މަރުހަލާގަ މަސްލަހަތު އޮތް އެއްވެސް މެމްބަރަކު އެ މެމްބަރަކާއި ގުޅުން ހުރި ފަރާތެއްގެ އިންޓަރވިއުގައި ބައިވެރިވެ ވޯޓު ދެއްވާފައި ނުވާނެ ކަމަށެވެ. އަދި މި މައްސަލަ ބެއްލެވުމަށް ރޮޒެއިނާ ވަނީ މަރުހަބާ ވިދާޅުވެފައެވެ.
އަދި ވަކި މެމްބަރަކަށް ވޯޓު ނުދެއްވިގެން އެއްވެސް ނަމެއް ތަޅުމަށް ފޮނުވުމަށް ނިންމިފައި ނުވާނެ ކަމަށާއި ކޮމިޓީގެ މެމްބަރުން މަސައްކަތް ކުރައްވާފައިވަނީ ވަރަށް އިންސާފުވެރިކަމާއި އެކު ކަމަށް ވިދާޅުވިއެވެ. ރޮޒެއިނާ ވިދާޅުވީ ސީއެސްސީގެ މެމްބަރު ކަމަށް ގާބިލު ނޫން އެއްވެސް ބޭފުޅެއްގެ ނަން ތަޅުމަށް ފޮނުވާފައިނުވާނެ ކަމަށެވެ.
ސީއެސްސީގެ ހުސްވެފައިވާ މަގާމުތަކަށް ކުރިމަތިލެއްވި ބޭފުޅުންގެ ނަންތައް ދިރާސާ ކުރުމަށްފަހު މިނިވަން މުއައްސަސާތަކުގެ ކޮމިޓީން އެންމެ ފުރަތަމަ އެކުލަވާލީ 15 ބޭފުޅުންގެ ލިސްޓެކެވެ. އެހެންނަމަވެސް، މި މަގާމުތަކަށް ކުރިމަތިލެއްވި ފަރާތްތަކުގެ ތައުލީމީ ފެންވަރަށް ބެލުމަށްފަހު އެ ލިސްޓު 13 އަށް މަދު ކުރެވުނެވެ.
