އަންގާރަ ދުވަހުގެ ޖަލްސާގައި މި މައްސަލަ ބެލުމަށް އެދިވަޑައިގެންނެވީ މަޖިލީހުގެ ރައީސް މުހައްމަދު ނަޝީދު
މަޖިލީހުގެ ރައީސް މުހައްމަދު ނަޝީދު
ސިވިލް ސަރވިސް ކޮމިޝަނުން ހުސްވެފައިވާ 4 މަގާމަށް ކުރިމަތިލެއްވި 41 ބޭފުޅުންގެ ނަންތައް ދިރާސާކުރުމަށްފަހު ޝޯޓްލިސްޓު ކުރެވުނު 13 ބޭފުޅުންގެ ލިސްޓުގައި މަޖިލިސް މެމްބަރެއްގެ މަސްލަހަތު އޮތް ބޭފުޅެއް ހިމެނޭ ކަމަށް ބެލެވޭތީ، އެ މައްސަލަ ބެލުމަށް މަޖިލީހުގެ އިމްތިޔާޒް އަދި ސުލޫކު ކޮމިޓީއަށް ފޮނުވައިފިއެވެ.
އަންގާރަ ދުވަހުގެ ޖަލްސާގައި މި މައްސަލަ ބެލުމަށް އެދިވަޑައިގެންނެވީ މަޖިލީހުގެ ރައީސް މުހައްމަދު ނަޝީދެވެ.
ނަޝީދު ވިދާޅުވީ ސީއެސްސީއަށް ކުރިމަތިލެއްވި ބޭފުޅުންގެ ނަން ދިރާސާ ކޮށް މަޖިލީހުގެ މިނިވަން މުއައްސަސާތަކުގެ ކޮމިޓީން ދިރާސާކޮށް އެކުލަވާލި ލިސްޓުގައި އެ ކޮމިޓީގެ މެމްބަރެއްގެ މަސްލަހަތު ހިމެނޭ ކަމަށް ބެލެވޭ ބޭފުޅެއް ހިމެނޭކަމަށް ގަބޫލުކުރެއްވޭ ކަމަށެވެ.
ރައީސް ނަޝީދު ވިދާޅުވީ ރައްޔިތުން މަޖިލީހަށް ކުރާ އިތުބާރު ބޮޑުވެގެންދާނީ ދެފުށް ފެންނަ ގޮތަށް ވަކި އަތަކަށް ބުރަ ނުވެ، އަމިއްލަ މަސްލަހަތަށް ނުބަލާ، ރާއްޖޭގެ މުއައްސަސާތައް ބިނާކުރުމަށް މަޖިލީހުން މަސައްކަތް ކުރުމުން ކަމަށެވެ. އަދި އެ މުއައްސަސާތަކުގެ މަގާމުތަކަށް ގާބިލު ބޭފުޅުން ކަނޑައެޅުމަކީ 19 ވަނަ ރައްޔިތުންގެ މަޖިލީހުގެ އެންމެ ބޮޑު އެއް ވައުދު ކަން ފާހަގަކުރައްވާ ނަޝީދު ވިދާޅުވީ ސީއެސްސީގެ ލިސްޓުގެ މައްސަލައިގައި އެ ބާވަތުގެ ފުށުއެރުމެއް އުޅޭކަމަށް ފެނިވަޑައިގަންނަވާތީ ވީހާވެސް އަވަހަކަށް އިމްތިޔާޒާއި ސުލޫކު ކޮމިޓީން އެ މައްސަލަ ބައްލަވައި ދެއްވުމަށް އެދިވަޑައިގަންނަވާ ކަމަށެވެ.
ސީއެސްސީގެ ހުސްވެފައިވާ މަގާމުތަކަށް ކުރިމަތިލެއްވި ބޭފުޅުންގެ ނަންތައް ދިރާސާ ކުރުމަށްފަހު މިނިވަން މުއައްސަސާތަކުގެ ކޮމިޓީން އެންމެ ފުރަތަމަ އެކުލަވާލީ 15 ބޭފުޅުންގެ ލިސްޓެކެވެ. އެހެންނަމަވެސް، މި މަގާމުތަކަށް ކުރިމަތިލެއްވި ފަރާތްތަކުގެ ތައުލީމީ ފެންވަރަށް ބެލުމަށްފަހު އެ ލިސްޓު 13 އަށް މަދުކުރެވުނެވެ.
