ވަސީލަތްތަކާއިއެކު ސިއްހީ ހިދުމަތްތެރިންވެސް އިތުރު ކުރުން މުހިއްމު: ޑރ. މުރާދު
121 ސިއްހީ ހިދުމަތްތެރިން ޕޮޒިޓިވްވެފައިވޭ
ހޯމަ ދުވަހު އެޗްއީއޯސީ ގައި ބޭއްވި ޕްރެސްކޮންފަރެންސް ގައި ޑރ. މުރާދު ބައިވެރިވެވަޑައިގަންނަވަނީ | އެޗްއީއޯސީ
ކޮވިޑް-19ގެ ބަލި މީހުންނަށް ފަރުވާދޭން ބޭނުންވާ ވަސީލަތްތައް އިތުރުކުރުމާއެކު ސިއްހީ ހިދުމަތްތެރިންވެސް އިތުރުކުރުން މުހިއްމު ކަމަށް ދެކިވަޑައިގަންނަވާކަމަށް އައިޖީއެމްއެޗްގެ އެތެރެ ހަށީގެ ޑރ. މޫސާ މުރާދު ވިދާޅުވެވެއްޖެ އެވެ.
ހޯމަ ދުވަހު ހެލްތް އިމަރޖެންސީ އޮޕަރޭޝަން ސެންޓަރު (އެޗްއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ކޮވިޑުގެ ބަލި މީހުންނަށް ފަރުވާ ދިނުމުގެ ކަންތައްތައް ބަލަމުންދާ އައިޖީއެމްއެޗްގެ ކްލިނިކަލް އެޑްވައިޒަރީ ގްރޫޕް ގައި ހިމެނިވަޑައިގަންނަވާ ޑރ. މޫސާ މުރާދު ވިދާޅުވީ، ކޮވިޑުގެ ބަލި މީހުންނަށް ފަރުވާދޭ ފެސިލިޓީސް ތަކުގައި މިހާރުވެސް ގިނަ އަދަދެއްގެ ސިއްހީ ހިދުމަތްތެރިން މަސައްކަތްކުރާކަމަށެވެ. އަދި ގިނަ އަދަދެއްގެ ބަޔަކު ޕޮޒިޓިވްވެ އެޑްމިޓްކުރަން ޖެހުމަކީ ސިއްހީ ހިދުމަތްތެރިންނަށް ދިމާވާނެ ބޮޑު ގޮންޖެހުމެއް ކަމަށް މުރާދު ވިދާޅުވި އެވެ.
މިހާތަނަށް ސިއްހީ އެހީތެރިންގެ ތެރެއިން 121 ފަރާތެއް ޕޮޒިޓިވްވެފައިވާކަން ޑރ. މުރާދު ހާމަކުރެއްވި އެވެ. ޑރ. މުރާދު ވިދާޅުވީ، ސިއްހީ ހިދުމަތްތެރިން ޕޮޒިޓިވްވީމާ އެހެން މީހުންނެކޭ އެއް ފަދައިން އެ މީހުންވެސް އެކަހެރި ކުރަން ޖެހޭ ކަމަށާއި، އޭގެ ސަބަބުން އެ މީހުންގެ ބަދަލުގައި އެހެން ބަޔަކު ގެންނަން ޖެހޭ ކަމަށެވެ.
ޑރ. މުރާދު ވިދާޅުވީ ރާއްޖެއިން ކޮވިޑު ފެނުނު ހިސާބުން ފެށިގެން ކޮވިޑު މެނޭޖް ކުރުމަށް ފެސިލިޓީސް ތަކާއި އެތަންތަނަށް ސާމާނު ހޯދަ އެކަންތައްތައް ކުރެވިގެން ހިނގައްޖެ ކަމަށެވެ. އެކަމަކު އެފަދަ ވަސީލަތްތައް ހޯދުމާއި އެކީ އިންސާނީ ވަސީލަތްތަކަކީ ކޮވިޑު މެނޭޖްމެންޓަށް މާ މުހިއްމު ބައެއް ކަމަށް ޑރ. މުރާދު ވިދާޅުވިއެވެ.
މުރާދު ވިދާޅުވި ގޮތުގައި އިންސާނީ ވަސީލަތްތައް ފުރިހަމަ ކުރުމަކީ ފަސޭހަ ކަމެއް ނޫނެވެ. އޭނާ ވިދާޅުވީ، މިހާރު ހުރި އިންސާނީ ވަސީލަތްތައްކުގެ ބޭނުން މިވަގުތު ހިފާއިރު ކޭސްތައް ގިނަވެގެންދާ ކަމަށް ވަަނާމަ މިހާރު ތިބި މީހުންނަށް އެކަމުގެ ބުރަ ބޮޑުވެގެންދާނެ ކަމަށެވެ.
އާދޭހާއެކު ޑރ. މުރާދު ވަނީ ބަލި ކޮންޓްރޯލް ކުރަން އާއްމުންގެ އެހީތެރިކަމަށް އެދިވަޑައިގެންނެވިއެވެ. ޑރ. ވިދާޅުވީ ކޭސްތައް މަދު ކުރެވޭނީ އަޅާފައިހުރި ފިޔަވަޅުތަކަށް އާއްމުން އެއްބާރުލުން ލިބޭ ވަރަކުން ކަމަށެވެ. ކޭސްތައް ގިނަވާ ވަރަކަށް އައިސީޔޫ އަށް ލާން ޖެހޭ މިހުން ގިނަވެ ވެންޓިލޭޓަރަށްލާ ކޮންމެ ބަލި މީހަކަށް ދެ ނަރުހުންނާއި ޑޮކްޓަރުން ބޭނުންވާ ކަމަށެވެ.
މި ފަހަކަށް އައިސް ކޭސްތަކުގެ އަދަދު އިތުުރުވަމުންދާތީވެ ސިއްހީ މާހިރުން ދަނީ އިންތިހާ އަށް ކަންބޮޑުވުން ފާޅުކުރަމުންނެވެ.
