ޕޮގްބާ ޔުނައިޓެޑްގައި މަޑުކުރާނެ: އޭޖެންޓް

މެންޗެސްޓާ ޔުނައިޓެޑަށް ކުޅެމުން އަންނަ ފްރާންސްގެ މިޑްފީލްޑަރު ޕައުލް ޕޮގްބާ ޔުނައިޓެޑްގައި މަޑުކުރާނެ ކަމަށް އޭނާގެ އޭޖެންޓް މިނޯ ރައިއޯލާ ބުނެފިއެވެ.

މީޑިއާ ރިޕޯޓުތައް ބުނާގޮތުން މި ޓްރާންސްފާ ބާޒާރުގައި އުމުރުން 27 އަހަރުގެ ޕޮގްބާ ހޯދުމަށް ޔޫރަޕްގެ ބޮޑެތި ކުލަބުތަކުން އަންނަނީ މަސައްކަތް ކުރަމުންނެވެ. އޭގެތެރޭގައި އޭނާގެ ކުރީގެ ކުލަބު ޔުވެންޓަސް އާއި ރެއާލް މެޑްރިޑް އަދި ޕީއެސްޖީވެސް ހިމެނެއެވެ.

ޕޮގްބާ މި ވަގުތު ޔުނައިޓެޑްގެ އެއްބަސްވުމުގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. އެކަމަކު ޔުނައިޓެޑުން ބޭނުންނަމަ އިތުރު އެއް އަހަރަށް ޕޮގްބާގެ އެއްބަސްވުން އައު ކުރުމުގެ ފުރުސަތު އެބައޮތެވެ.

މީގެ ކުރިން ޕޮގްބާ ޔުނައިޓެޑް ދޫކޮށްލަން ބޭނުންވާ ކަމަށް ރިޕޯޓުކުރި ނަމަވެސް، ދާދި ފަހުން ޕޮގްބާގެ އޭޖެންޓް ރައިއޯލާ ބުނީ ޕޮގްބާއަށް ލިބޭ އެއްވެސް ހުށަހެޅުމެއް ޔުނައިޓެޑުން ގަބޫލުނުކުރާނެ ކަމަށާއި، އަންނަ ސީޒަނުގައިވެސް ޕޮގްބާ ޔުނައިޓެޑްގައި މަޑުކުރާނެ ކަމަށެވެ. އަދި ވަރަށް އަވަހަށް ޕޮގްބާގެ އެއްބަސްވުން އައު ކުރުމާ ބެހޭގޮތުން މަޝްވަރާތައް ފަށާނެ ކަމަށްވެސް ވަނީ ބުނެފައެވެ.

ޕޮގްބާ ޔުނައިޓެޑްގައި މަޑުކުރާއިރު، މީގެ ކުރިން ޕޮގްބާއާއެކު ޔުވެންޓަސްއަށް ކުޅުނު މިޑްފީލްޑަރު އަދި މިހާރު އެޓީމުގެ ކޯޗު އަންދްރޭ ޕިރްލޯ އެ ޓީމަށް ގެންދަން އެންމެ ބޮޑަށް ބޭނުންވާ ކުޅުންތެރިއަކީ ޕޮގްބާ ކަމަށް ރިޕޯޓުތައް ބުނެއެވެ.

ޔުނައިޓެޑުން 2010 ވަނަ އަހަރު ކެރިއަރު ފެށި ޕޮގްބާ ހިލޭ ޓްރާންސްފާއެއްގެ ދަށުން ޔުވެންޓަސްއަށް ބަދަލުވީ 2012 ވަނަ އަހަރުއެވެ. އެޓީމުގައި ހޭދަކުރި ހަތަރު ސީޒަނުގައި ޕޮގްބާ ވަނީ 178 މެޗުން 34 ލަނޑު ޖަހާފައެވެ. އޭގެ ފަހުން އަނެއްކާވެސް ޕޮގްބާ އަނބުރާ ޔުނައިޓެޑަށް ބަދަލުވީ 2016 ވަނަ އަހަރު 105 މިލިއަން ޔޫރޯއަށެވެ.

ޕޮގްބާ ވަނީ މިހާތަނަށް ޔުނައިޓެޑާއެކު އިނގިރޭސި ލީގު ކަޕްގެ އިތުރަށް ޔުއެފާ ޔޫރޮޕާ ލީގު ކާމިޔާބުކޮށްފައެވެ.