ޝިޕިންގ އެޖެންޓުން ދިވެހި ވިޔަފާރިވެރިންގެ އަތުން އަހަރަކު 100 މިލިއަން ޑޮލަރުން ނަގަމުންދޭ: ސަވާދު
23 އޯގަސްޓު 2020 | އާދީއްތަ 11:46ކޮންމެ އަހަރު ގާތްގަނޑަކަށް 60،000 އާއި 65،000 އާދެމެދު ކޮންޓެއިނާ ރާއްޖެއަށް އާދޭ
ރާއްޖޭގެ މައި ވިޔަފާރި ބަނދަރު
ރާއްޖޭގައި ޝިޕިންގ އެޖެންޓް، ފްރައިޓް ފޮވާޑުން ދިވެހި ވިޔަފާރިވެރިން އަތުން އަހަރަކު 100 މިލިއަން ޑޮލަރު ނަގަމުންދާ ކަމަށާއި މިކަން ހުޓުވުމަކީ މިހާރުން މިހާރަށް ކުރަންވެއްޖެ ކަމެއްކަމަށް ލިއޯ ކުންފުނީގެ މެނޭޖިންގ ޑިރެކްޓަރ އަބްދުﷲ ސަވާދު ވިދާޅުވުވެއްޖެ އެވެ.
ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަދައްކަވަމުން ލިއޯ ޓްރޭޑިންގ މެނޭޖިންގ ޑިރެކްޓަރ އަބްދުﷲ ސަވާދު ވިދާޅުވީ، ޝިޕިންގ އެޖެންޓް، ނުވަތަ ފްރައިޓް ފޮވާޑުން ދިވެހި ވިޔަފާރިވެރިންގެ އަތުން، އެކި ނަންނަމުގައި ފީތައް ނަގަމުންދާއިރު، އަހަރަކަށް ބަލާއިރު 100 މިލިއަން ޑޮލަރު ނަގަމުންދާ ކަމަށެވެ. އެއީ މިހާރުން މިހާރަށް ހުއްޓުވަން ޖެހޭ މުހިއްމު ކަމެއް ކަމަށާއި، ސަރުކާރުން ބައެއް ތަކެތީގެ ޑިއުޓީ މައާފްކޮށްދީ އަދި ބައެއް ތަކެތިން ޑިއުޓީ ކުޑަކޮށްދިން ނަމަވެސް، އޭގެން ދިވެހި ރައްޔިތުންނަށް މާބޮޑު އަސަރެއް ނުކުރާ ކަމަށް އޭނާ ވިދާޅުވި އެވެ. އަދި މުދަލު އަގުބޮޑުވުން ނޫން ކަމެއް ނުވެ، އެފައިސާ އަކީ ރާއްޖެއިން ބޭރަށް ފޮނުވޭ ޑޮލަރު ކަމަށް ވެސް ސަވާދު ވިދާޅުވިއެވެ.
ސަވާދު ވިދާޅުވީ، ފްރައިޓް ފޯވާޑުން ބުނާ ފީ ދެއްކުމުން ނޫނީ، ޑެލިވަރީ އޯޑަރ އެކުންފުނިތަކުން ދޫނުކުރާނެ ކަމަށެވެ. އަދި، ޑެލިވަރީ އޯޑަރާނުލާ އެމްޕީއެލްއިން މުދާ ދޫނުކުރާނެ ކަމަށާއި، އެމުދާ ނުނެރި ނުވަތަ ކްލިއަރ ކުރަންޖެހޭ މުއްދަތުގައި ކްލިއަރ ނުކުރާނަމަ ޑެމަރޭޖް އަރަމުންދާނެ ކަމަށެވެ. އެހެންކަމުން ފްރައިޓް ފޮވާޑުން ބުނާ އަދަދަށް ފައިސާ ދެއްކުން ނޫންގޮތެއް ދިވެހި ވިޔަފާރިވެރިންނަށް ނެތް ކަމަށް ވެސް ސަވާދު ވިދާޅުވި އެވެ.
ސަވާދު ވިދާޅުވީ، ޝިޕިންގ އެޖެންޓްގެ ގޮތުގައި ހަރަކާތްތެރިވާ ކުންފުނިތަކަކީ ދިވެހިންގެ ބަޔަކު އަޑީގައި ތިބެގެން ލަންކާ ބަޔަކު ހިންގާ ކުންފުނިތަކެއް ކަމަށެވެ. އެހެންކަމުން އެފައިސާ ވަރަށް ބޮޑު ޕަސެންޓަކީ ރާއްޖެއިން ބޭރަށް ބޭރުވާ ފައިސާ ކަމަށާއި، އަދި އެއީ ގަވާއިދާ ހިލާފަށް ނަގަމުންދާ އިތުރު ފީތަކެއް ކަމަށް ވެސް ސަވާދު ވިދާޅުވި އެވެ. ގިނަ ޝިޕިންގ އެޖެންޓްކަން ކުރާ ކުންފުނިތަކަކީ އެއްބަޔަކު ހިންގާ ކުންފުނިތަކެއް ކަމަށާއި އެގޮތުން ހައެއްކަ ކުންފުނި އެއްބަޔެއްގެ ނަންމަތީ އޮންނަކަން ފާހަގަކުރެވިފައިވާ ކަމަށް ސަވާދު ވިދާޅުވި އެވެ.
ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ އަހުމަދު އާދިލް ވެސް ވިދާޅުވެފައިވަނީ، ރާއްޖޭގައި ހަރަކާތްތެރިވާ ޝިޕިން އެޖެންޓް، ފުރައިޓް ފޯވަޑް ކުންފުނިތަކުގެ 90 އިންސައްތަ ފަރާތްތަކަކީ ދިވެއްސެއްގެ ނަމުގައި ބޭރު މީހުން ހިންގާ ކުންފުނިތައް ކަމަށެވެ. އަދި ޤަވާއިދު އެކުލަވާލުމުގެ ކުރިން އެފަރާތްތަކުން ދިޔައީ ފުރައިޓް ފޯވަޑިންގެ ހިދުމަތް ދިނުމުގައި ގިނަ ފީތަކާއި، ބޮޑެތި އަގުތަކެއް ނަގަމުންކަމަށް އާދިލް ވަނީ ފާހަގަ ކުރައްވާފަ އެވެ.
މީގެއިތުރުން އަދިލް ވެސް ވިދާޅުވީ، ގެންނަ މުދަލުގެ އަގަށްވުނެ، ބޮޑު ޗާޖެއް ފްރައިޓް ފޮވާޑުން ނަގަމުންދާ ކަމަށެވެ. އެގޮތުން މުދަލުގެ އަގަކީ 500 ޑޮލަރު ކަމަށްވާނަމަ، ބައެއް ފަހަރު 1000 ޑޮލަރު އެކިއެކި ފީތަކުގެ ގޮތުގައި ފްރައިޓް ފޮވާޑުން ނަގަމުންދާ ކަމަށް އާދިލް ވެސް ވަނީ ފާހަގަ ކުރައްވާފަ އެވެ.
