ކޮވިޑް-19 އާއި ގުޅިގެން އެންމެ ބޮޑު ހަރަދެއް ކުރީ އެންޑީއެމްއޭ އިން

ކޮވިޑް-19 އާއި ގުޅިގެން ސަރުކާރުން ކުރަމުން އަންނަ ކަންތައްތަކުގެ ތެރެއިން އެންމެ ބޮޑު ހަރަދެއް ކޮށްފައި ވަނީ ނެޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ) އިން ކަމަށް ފިނޭންސް މިނިސްޓްރީ އިން ހާމަކޮށްފިއެވެ.

ފިނޭންސް މިނިސްޓްރީ އިން އާންމު ކޮށްފައިވާ 'ވީކްލީ ކޮވިޑް-19 ސްޓެޓިސްޓިކްސް' އިން ދައްކާ ގޮތުން، އެންޑީއެމްއޭ އިން ވަނީ އޮގަސްޓް 13 ވަނަ ދުވަހުގެ ނިޔަލަށް ކޮވިޑް-19 އާއި ގުޅިގެން 725.1 މިލިއަން ރުފިޔާ ހަރަދުކޮށްފައެވެ. އެގޮތުން އެންޑީއެމްއޭ އިން ކޮށްފައިވާ ހަރަދުތަކުގެ ތެރެއިން 84.1 މިލިއަން ރުފިޔާ ހަރަދުކޮށްފައި ވަނީ ޑިޒާސްޓަރ މެނޭޖްމަންޓް ފަންޑުން ކަމަށް ފިނޭންސްގެ ތަފާސްހިސާބުތަކުން ދައްކައެވެ.

Advertisement

ތަފާސްހިސާބުތައް ދައްކާގޮތުން، ހެލްތު މިނިސްޓްރީ އިން ވަނީ 169 މިލިއަން ރުފިޔާ ކޮވިޑް-19 އާއި ގުޅިގެން ހަރަދުކޮށްފައެވެ. ހައުސިން އަދި ޕްލޭނިން މިނިސްޓްރީ އިން 37.3 މިލިއަން ރުފިޔާ ހަރަދުކޮށްފައިވާ އިރު، ފޮރިން މިނިސްޓްރީ އިން ހަރަދުކޮށްފައި ވަނީ 3.9 މިލިއަން ރުފިޔާއެވެ.

އޭގެ އިތުރުން، ޖެންޑަރ މިނިސްޓްރީ އިން ކޮވިޑް-19 އާއި ގުޅިގެން ކުރި ކަންކަމަށް ދެ މިލިއަން ރުފިޔާ ހަރަދުކޮށްފައިވާ އިރު، އެޑިއުކޭޝަން މިނިސްޓްރީ އިން ހަރަދުކޮށްފައި ވަނީ 2.8 މިލިއަން ރުފިޔާއެވެ.

ކޮވިޑް-19 އާއި ގުޅިގެން ސަރުކާރުން މިހާތަނަށް ކޮށްފައިވާ ހަރަދުތަކުގެ ތެރެއިން، އިންދިރާ ގާންދީ މެމޯރިއަލް ހޮސްޕިޓަލް މެދުވެރިކޮށް 63.8 މިލިއަން ރުފިޔާ ހަރަދުކޮށްފައިވާ ކަމަށް ފިނޭންސް އިން ބުނެއެވެ. މޯލްޑިވްސް ނެޝަނަލް ޑިފެންސް ފޯސް އިން ކޮވިޑް-19 އާއި ގުޅިގެން 13.3 މިލިއަން ރުފިޔާ ހަރަދުކޮށްފައިވާ އިރު، ފުލުހުންގެ އިދާރާ އިން ވަނީ 2.1 މިލިއަން ރުފިޔާ ހަރަދުކޮށްފައެވެ.

އެންސްޕާ އިން 4.8 މިލިއަން ރުފިޔާ ހަރަދުކޮށްފައިވާ ކަމަށް ފިނޭންސް އިން ބުނެފައިވާއިރު، އިމިގްރޭޝަނުން ހަރަދުކޮށްފައި ވަނީ އަށް ލައްކަ ރުފިޔާއެވެ. އަދި ނެޝަނަލް ޑްރަގް އެޖެންސީ އިން ވަނީ ހަތަރު ލައްކަ ރުފިޔާ ހަރަދުކޮށްފައެވެ. ކޮވިޑް-19 އާއި ގުޅިގެން ސަރުކާރުން ވަނީ މިހާތަނަށް އެއް ބިލިއަނަށް ވުރެ ގިނަ ރުފިޔާ ހަރަދުކޮށްފައި ކަމަށް ފިނޭންސް މިނިސްޓްރީ އިން ބުނެއެވެ.