ދައުލަތުގެ ހަރަދު 15 ބިލިއަން ރުފިޔާ އަށް ވުރެން މައްޗަށް
ރިކަރެންޓް އެކްސްޕެންޑިޗާގެ ގޮތުގައި 10.6 ބިލިއަން ރުފިޔާ ހަރަދުކޮށްފައިވޭ
ފިނޭންސް މިނިސްޓްރީ ހުންނަ އިމާރާތް
އަހަރުގެ މިހާތަނަށް އައި އިރު، ދައުލަތުގެ ހަރަދު 15 ބިލިއަން ރުފިޔާއަށް ވުރެ މައްޗަށް އަރާފައިވާ ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
ފިނޭންސް މިނިސްޓްރީ އިން އާންމުކޮށްފައިވާ ވީކްލީ ފިސްކަލް ޑިވެލޮޕްމެންޓް ރިޕޯޓް ދައްކާ ގޮތުން އޮގަސްޓް މަހުގެ 13 ވަނަ ދުވަހުގެ ނިޔަލަށް ސަރުކާރުން ވަނީ 15.2 ބިލިއަން ރުފިޔާ ހަރަދުކޮށްފަ އެވެ.
އެގޮތުން ރިކަރެންޓް އެކްސްޕެންޑިޗާގެ ގޮތުގައި 10.6 ބިލިއަން ރުފިޔާ ހަރަދުކޮށްފައިވާ ކަމަށް ފިނޭންސް އިން ބުނެއެވެ.
ސަރުކާރުން މުސާރަ އާއި އިނާޔަތް އަދި ޕެންޝަނަށް 5.7 ބިލިއަން ރުފިޔާ ހަރަދުކޮށްފައި ވާއިރު، އެޑްމިނިސްޓްރޭޓިވް އަދި އޮޕަރޭޝަނަލް އެކްސްޕެންސް ތަކަށް ސަރުކާރުން ވަނީ 4.8 ބިލިއަން ރުފިޔާ ހަރަދުކޮށްފައެވެ.
ފިނޭންސްގެ ތަފާސްހިސާބުތައް ދައްކާ ގޮތުން ސަރުކާރުން ވަނީ ކެޕިޓަލް އެކްސްޕެންޑިޗާގެ ގޮތުގައި 4.7 ބިލިއަން ރުފިޔާ ހަރަދުކޮށްފައެވެ.
އެގޮތުން ޑިވެލޮޕްމެންޓް ޕްރޮޖެކްޓްތަކާއި އިންވެސްޓްމެންޓް އައުޓްލޭސް އަށް 1.3 ބިލިއަން ރުފިޔާ ހަރަދު ކޮށްފައިވާ އިރު، ބިމާއި އިމާރާތްތަކަށް އިގަސްޓް 13 ވަނަ ދުވަހުގެ ނިޔަލަށް ހަރަދުކޮށްފައި ވަނީ 1.2 ބިލިއަން ރުފިޔާ އެވެ. އިންފްރާސްޓްރަކްޗާ އެސެޓްތަކަށް ސަރުކާރުން 1.1 ބިލިއަން ރުފިޔާ ހަރަދުކޮށްފައިވާ އިރު، ކެޕިޓަލް އިކުއިޕްމެންޓް އަށް ހަރަދުކޮށްފައި ވަނީ 168.7 މިލިއަން ރުފިޔާ އެވެ. އަދި ލެންޑިންގްސްގެ ގޮތުގައި 810 މިލިއަން ރުފިޔާ ވަނީ ހަރަދުކޮށްފައެވެ.
ފާއިތުވި އަހަރުގެ މި މުއްދަތުގައި ސަރުކާރުން ވަނީ 15.3 ބިލިއަން ރުފިޔާ ހަރަދުކޮށްފައި ކަމަށް ފިނޭންސްގެ ތަފާސް ހިސާބުތައް ދައްކައެވެ.
ކޮވިޑް-19 އާއި ގުޅިގެން ސަރުކާރުގެ ހަރަދުތައް ކުޑަކުރާނެ ކަމަށް ބުނެފައިވާ އިރު، އޮގަސްޓް 13 ވަނަ ދުވަހުގެ ނިޔަލަށް ސަރުކާރުން ވަނީ ކޮވިޑް-19 އާއި ގުޅިގެން 1.1 ބިލިއަން ރުފިޔާ ހަރަދުކޮށްފައެވެ.
