އިންޑިއާއިން ބުނަނީ މާލީ އެހީއަށް ސަރުކާރުން ޙިޔާނަތްތެރި ނުވާނެކަމުގެ އިތުބާރު އެބައޮތްކަމަށް!
އެ ފައިސާ ބޭނުންކުރަންވީ ކޮން މަޝްރޫއަކަށްކަން ކަނޑައަޅާނީ އެ ޤައުމަކުން
ރައީސް އިބްރާޙިމް މުޙައްމަދު ސޯލިހު ބޮޑުވަޒީރު ނަރެންދުރަ މޯދީއާ ބައްދަލު ކުރައްވަނީ
އިންޑިއާއިން އެކި ބޭނުންތަކުގައި ރާއްޖެއަށް ފޯރުކޮށްދޭ މާލީ އެހީއަށް ސަރުކާރުން ޙިޔާނަތްތެރިނުވާނެކަމުގެ އިތުބާރު އެބައޮތްކަމަށް އިންޑިއާއިން ރާއްޖެއަށް ކަނޑައަޅާފައި ހުންނަވާ ހައިކޮމިޝަނަރ ސަންޖޭ ސުދީރު ވިދާޅުވެއްޖެއެވެ.
ރާއްޖެޓީވީން ގެނެސްދޭ "މޯލްޑިވްސް ވީކްލީ"އަށް ދެއްވި ޚާއްސަ އިންޓަރވިއުއެއްގައި ސަންޖޭ ވިދާޅުވީ، ޤައުމުތަކާ ގުޅުން ބަދަހިކޮށް އެހީތެރިކަން ފޯރުކޮށްދޭއިރު، އެ ގުޅުން ބިނާވަނީ އިތުބާރުގެ މައްޗަށް ކަމަށެވެ. އެއާއެކު ރާއްޖެއަށް އެހީތެރިކަން ފޯރުކޮށްދެނީ ރާއްޖޭގެ ލީޑަރޝިޕާއި ސަރުކާރަށް ފުރިހަމަ އިތުބާރު އޮތުމުން ކަމަށް ސަންޖޭ ވިދާޅުވިއެވެ.
އޭގެއިތުރުން، އިންޑިއާއިން ދޭ އެހީތަކަކީ ވަކި ޝަރުތުތަކެއް ކޮށްފައި ވެދޭ އެހީތެރިކަމެއް ނޫންކަން ފާހަގަކުރައްވައި ސަންޖޭ ވިދާޅުވީ، ފައިސާ ދޫކުރުމަށްފަހު، އެ ފައިސާ ބޭނުންކުރަންވީ ކޮން މަޝްރޫއަކަށްކަން ކަނޑައަޅާނީ އެ ޤައުމަކުން ކަމަށެވެ. އަދި އެކަމުގައިވެސް ސަރުކާރަށް އިތުބާރު ކުރައްވާކަމަށް ސަންޖޭ ވިދާޅުވިއެވެ.
ސަންޖޭ ވިދާޅުވީ، ފައިސާގެ މިފަދަ މުއާމަލާތްތަކުގެ ތެރެއިން އުފެދޭ ކޮރަޕްޝަނާއި، ޙިޔާނަތް ފަދަ ކަންކަމާ ގުޅިގެން އަމަލު ކުރާނެ ނިޒާމެއް ރާއްޖޭގައިވެސް ޤާއިމުވެފައިވާ ކަމަށާއި، އެ މަންޒަރު ފެނިވަޑައިގެންފައިވާ ކަމަށެވެ. އަދި އިންޑިއާއިން ވެދޭ އެހީތެރިކަންވެސް އެންމެ ރަނގަޅު ގޮތުގައި ބޭނުން ކުރެއްވުމަށް ސަންޖޭ ވަނީ އެދިވަޑައިގެންފައެވެ.
އިންޑިއާއިން އެކި ގޮތްގޮތުން ރާއްޖެއަށް އެހީތެރިކަން ފޯރުކޮށްދެމުން ގެންދާއިރު، އެ ޤައުމުން ވަނީ 800 މިލިއަން ޑޮލަރުގެ ކްރެޑިޓް ލައިންއެއް ރާއްޖެއަށް ދިނުމަށް ނިންމާފައެވެ. އަދި ރާއްޖޭގައި ހިންގާ އުމްރާނީ ތަރައްގީގެ އެންމެ ބޮޑު މަޝްރޫއުކަމަށްވާ "ގްރޭޓަރ މާލެ ކަނެކްޓިވިޓީ ޕްރޮޖެކްޓް" ގެ ދަށުން މާލެ، ވިލިގިނލި، ތިލަފުށި އަދި ގުޅީފަޅު ގުޅާލުމުގެ މަޝްރޫޢަށް އެހީދިނުމަށްވެސް އިންޑިޔާއިން ވަނީ އެއްބަސްވެފައެވެ.
އިންޑިއާއިން ގެންގުޅޭ "ނެއިބަރ ހުޑް ފަރސްޓް" ޕޮލިސީއަށްވެސް ސަންޖޭ ވަނީ އަލިއަޅުވާލައްވާފައެވެ. އެގޮތުން ސަންޖޭ ވިދާޅުވީ، އެ ޕޮލިސީގެ ޙަޤީޤީ މާނައަކީ ދުނިޔޭގެ މަޝްރަޙުގައި ކޮންމެ ކަމެއް ހިނގި ނަމަވެސް، އެކަމަށް އަވައްޓެރި ޤައުމުތަކަށް އެހީތެރިވުމަކީ އިންޑިއާއިން އެންމެ އިސްކަމެއްގެ ގޮތުގައި ކުރާނެ އެއްކަންތައް ކަމަށެވެ. އަދި ކޮވިޑް-19 ގެ ބަލިމަޑުކަމުގެ ތެރޭގައިވެސް އަވައްޓެރި ޤައުމުތަކުގެ މެދުގައި އޮތް ބަދަހި ގުޅުން ފެނިގެން ގޮސްފައިވާއިރު، އަވައްޓެރި ޤައުމުތަކަށް އެހީވުމަށް އެންމެ ކުރީ ސަފުގައި އިންޑިއާއިން މަސައްކަތް ކުރާނެ ކަންވެސް ފެނިގެންދިޔަ ކަމަށް އޭނާ ވިދާޅުވިއެވެ.
