މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ އިމާރަތް ހެދުމުގެ މަސައްކަތަށް ހުޅުވާލުމުން އެންމެ ކުޑަ އަގެއް ހުށައެޅި އެސްޖޭ ކޮންސްޓްރަކްޝަން ޕްރައިވެޓް ލިމިޓެޑަށް އެ މަސައްކަތް އެވާރޑް ނުކުރި ސަބަބު ފިނޭންސް މިނިސްޓްރީން ހާމަކޮށްފިއެވެ.
ނޭޝަނަލް ޓެންޑަރ ބޯޑު މެދުވެރިކޮށް އިމާރާތްކުރުމުގެ މަސައްކަތްތައް އެވޯޑް ކުރުމުގައި އަމަލު ކުރާނެ އުސޫލާއި ޙަވާލާދީ ފިނޭންސް މިނިސްޓްރީން ބުނީ، މިނިސްޓްރީ އޮފް ޑިފެންސްގެ އިމާރާތް ހެދުމަށް ހުޅުވާލެވުނު ޓެންޑަރގެ މަސައްކަތް ކުންފުންޏަކާ ހަވާލު ކުރިއިރު ބެލިފައިވަނީ އައު އުސޫލަށް ކަމަށެވެ. އެގޮތުން މި ޓެންޑަރގައި އެންމެ ކުޑަ އަގެއް ހުށަހަޅާފައިވަނީ އެސްޖޭ ކޮންސްޓްރަކްޝަން ޕްރައިވެޓް ލިމިޓެޑަށް ނަމަވެސް، އެ ބިޑް އެވޯޑް ކޮށްފައިވަނީ ދެވަނައަށް އެންމެ ކުޑަ އަގު ހުށަހެޅި ރެއިންބޯ ކޮންސްޓްރަކްޝަން ޕްރައިވެޓް ލިމިޓެޑަށެވެ.
ކުންފުނިތަކަށް އެއްފަހަރާ ޓެންޑަރތަކުގައި މަސައްކަތް ކުރެވޭނޭވީ ވަކި އަދަދުތަކަކަށް ކަމަށާއި ޖުމްލަ ފައިސާގެ އަދަދަށް ބަލާއިރު، މި އުސޫލުގެ ދަށުން އެސްޖޭ ކޮންސްޓްރަކްޝަންއަށް އެއްފަހަރާ މަސައްކަތް ކުރެވޭނީ 300 މިލިއަން ރުފިޔާއާ ހަމައަށް ކަމަށް މިނިސްޓްރީން ބުނެއެވެ. އަދި އެ ކުންފުންޏަށް އެއްފަހަރާ މަސައްކަތް ކުރެވޭނެ ޓެންޑަރތަކުގެ އަދަދަކީ ގިނަ ވެގެން 8 އެވެ. ނަމަވެސް، އެވަގުތު އެ ކުންފުނިން 310 މިލިއަން ރުފިޔާގެ މަޝްރޫޢުގައި ސޮއި ކޮށްފައިވާއިރު، އެއީ ޖުމްލަ 11 ޕްރޮޖެކްޓް ކަމަށް މިނިސްޓްރީން ބުނެއެވެ.
އެއާއެކު މި އުސޫލުގެ ދަށުން ދެވަނައަށް އެންމެ ކުޑަ އަގެއް ހުށަހެޅި ރެއިންބޯ ކޮންސްޓްރަކްޝަން ޕްރައިވެޓް ލިމިޓެޑަށް މި ބިޑް ކާމިޔާބުވީކަމަށް ފިނޭންސުން ބުންޏެވެ.
ސަރުކާރުގެ މި ސިޔާސަތަކީ ޕްރޮކިއުމަންޓް ޕޮލިސީ ބޯޑުން 1 އޭޕްރީލް 2020 ގައި ގެޒެޓް ކުރެވި ނޭޝަނަލް ޓެންޑަރ ބޯޑުން އަމަލު ކުރުމަށް ލާޒިމު ކޮށްފައިވާ އުސޫލެއް ކަމަށް މިނިސްޓްރީން ބުނެއެވެ. އަދި މި އުސޫލުގެ ބޭނުމަކީ ނޭޝަނަލް ޓެންޑަރއިން އެވޯޑް ކުރާ މަޝްރޫޢުތައް އަވަސްމިނެއްގައި ކުރިއަށް ގެންދިޔުމާއި، ގިނަ ކުންފުނިތަކަށް މަސައްކަތް ހަވާލު ކުރެވޭނެ ގޮތަށް ނިޒާމު ބައްޓަން ކުރުން ކަމަށްވެސް މިނިސްޓްރީން މައުލޫމާތު ދެއެވެ.
މިނިސްޓްރީން ބުނީ، މިކަމާ ގުޅޭ ގޮތުން މޯލްޑިވްސް ކޮންސްޓްރަކްޝަން އިންޑަސްޓްރީގެ ޖަމްއިއްޔާ މަސީ އަދި މިނޫންވެސް މިކަމާ ގުޅޭ އެހެނިހެން ފަރާތްތަކާވެސް މަޝްވަރާ ކުރެވި ޚިޔާލު ހޯދިފައިވާ ކަމަށެވެ.
