އުރީދޫ އަތޮޅު ދުވުމުގައި ބައިވެރިވުމުގެ ފުރުސަތު ހުޅުވާލައިފި
21 އޯގަސްޓު 2020 | ހުކުރު 08:29މި މަހުގެ 27 ވަނަ ދުވަހުގެ ހަވީރު ހައެއްގެ ކުރިން ރެޖިސްޓަރ ވެވޭނެ
އުރީދޫން މިދިޔަ އަހަރު ބޭއްވި \'\'ކަލަރ ރަންގެ\'\' ތެރެއިން
އުރީދޫ އަތޮޅު ދުވުމުގައި ބައިވެރިވުމުގެ ފުރުސަތު ހުކުރު ދުވަހު ހުޅުވާލައިފިއެވެ.
މި އިވެންޓުގައި ބައިވެރިވުމަށްރެޖިސްޓަރކުރަން ޖެހެއެވެ. ރާއްޖޭގެ އެކި ކަންކޮޅުތަކުން ވީހާވެސް ގިނަ މީހުންނަށް ބައިވެރިވުމުގެ ފުރުސަތު ފަހިކޮށްދިނުމުގެ ގޮތުން، މި ރަންގައި ބައިވެރިވުމުގެ ފުރުސަތު ހުޅުވާލާފައިވަނީ މުޅިން ހިލޭއެވެ. ރަންގައި ބައިވެރިވާން ބޭނުންވާ މީހުންނަށް މި މަހުގެ 27 ވަނަ ދުވަހުގެ ހަވީރު ހައެއްގެ ކުރިން ރެޖިސްޓަރ ވެވޭނެއެވެ.
އުރީދޫ އިން ބުނީ، އަތޮޅު ދުވުން ފުރިހަމަ ކުރާ މީހުންނަށް ވަރޗުއަލް މެޑަލް ދޭން ނިންމާފައިވާ ކަމަށެވެ. ފިޒިކަލް މެޑެއްޔަކަށް އަޕްގްރޭޑް ކުރުމުގެ ފުރުސަތުވެސް ދުވުންތެރިންނަށް ލިބިގެންދާނެ ކަމަށް އުރީދޫން ވަނީ ބުނެފައެވެ. އުރީދޫ އަތޮޅު ދުވުމަކީ ރާއްޖޭގެ އެކި ކަންކޮޅުތަކުން ބައިވެރިވެވޭ ގޮތަށް ރޭވިފައިވާ ފުރަތަމަ ވަރޗުއަލް ރަންއެވެ.
އެންމެން އެއްތަންވެގެން އުޅެވެން ނެތް ދުވަސްވަރެއްގައި، މި ދުވުމަކީ، އެކަނިވިޔަސް އަދި އާއިލާ އާއި ރައްޓެހިންނާއެކުގައިވެސް، ގައިދުރުކަމާއެކު ބައިވެރިވެ، މަޖާ ވަގުތުކޮޅެއް ހޭދަކޮށްލެވޭނެ އިވެންޓެކެވެ. ހަ އަހަރުން މަތީގެ ހުރިހާ އެންމެނަށްވެސް ބައިވެރިވެވޭ ފަސް ކިލޯމީޓަރުގެ މި ދުވުމުގައި ބައިވެރިވާ މީހުން، ގޭގައި ހުރެގެންވެސް ނުވަތަ ކައިރީގައިވާ ދުވާ ޓްރެކެއްގައިވެސް މި ދުވުން ފުރިހަމަކުރެވޭނެ ކަމަށް އުރީދޫއިން މައުލޫމާތުދެއެވެ.
ރެޖިސްޓްރޭޝަން ފުރިހަމަ ކުރުމުން ޑިޖިޓަލް ބިބް އަދި ކޮންފަމޭޝަން މެސެޖެއް ލިބޭނެއެވެ. އަދި ރެޖިސްޓަރ ކުރާ ދުވުންތެރިން، ދުވުން ސްޓްރާވާ އެޕް، ގާމިން ކަނެކްޓް، ރަންޓާސްޓިކް، ނައިކް ރަން ކުލަބު ނުވަތަ ރަންކީޕަރ އެޕްލިކޭޝަން މެދުވެރިކޮށް ޓްރެކްކޮށް، ނިންމާފައިވާ ރަން ރޫޓްގެ ސްކީންޝޮޓް، ކޮންފަރމޭޝަން މެސެޖާއެކު ލިބުނު ލިންކަށް އަޕްލޯޑް ކުރުމުން ޑިޖިޓަލް މެޑެއްޔެއް ލިބޭނެ ކަމަށް އުރީދޫން ބުނެއެވެ.
