78 ސަފާރީއެއްގެ އޮޕަރޭޝަން ފަށަން ހުއްދަ ދީފި

ބޯޑަރު ހުޅުވާލި ފަހުން 78 ސަފާރީ އުޅަނދެއް އޮޕަރޭޓް ކުރުމުގެ ހުއްދަ ފަތުރުވެރިކަމާ ބެހޭ ވުޒާރާއިން ދީފިއެވެ.

ނޭޝަނަލް ބޯޓިންގ އެސޯސިއޭޝަނުން ވަނީ ހުއްދު ދޫކޮށްފައިވާ އުޅަނދުތަކާއި، އެ އުޅަނަދުތަކުގެ އޮޕަރޭޝަން ފަށައިގަންނަ ތާރީޚު އާންމުކޮށްފައެވެ. ހުއްދަ ދޫކޮށްފައިވާ އުޅަނދުތަކުގެ ތެރެއިން އޮގަސްޓު މަހުގެ 20 ވަނަ ދުވަހާ ހަމައަށް އޮޕަރޭޝަންތައް ފަށާފައިވަނީ 65 އުޅަނދެއްގައެވެ.

ހުއްދަ ދޫކުރި އުޅަނދުތަކުގެ ތެރެއިން ބައެއް އުޅަނދުތަކުގެ އޮޕަރޭޝަން މި މަހުގެ ފަހުކޮޅުގެ އިތުރުން އަންނަ މަހު އެކެއްގައި ފަށަން ހަމަޖެހިފައިވާ ކަމަށް ބޯޓިންގ އެސޯސިއޭޝަނުން މައުލޫމާތުދެއެވެ.

ކޮވިޑް-19 އާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ރާއްޖޭގެ ބޯޑަރު ބަންދުކޮށްފައި އޮތް އޮތުން ނިމުމަކަށްގެނެސް، ބޯޑަރުތައް އަލުން ހުޅުވާލީ ޖުލައި މަހުގެ 15 ވަނަ ދުވަހުއެވެ. ބޯޑަރު ހުޅުވާލިތާ 37 ދުވަސް ވެފައިވާއިރު މިހާތަނަށް މިހާތަނަށް 5000ށްވުރެ ގިނަ ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.

އެޗްޕީއޭއިން ވަނީ ރިސޯޓްތަކާއި ސަފާރީތަކުގައި އަމަލުކުރާނެ ގޮތުގެ އުސޫލެއް އާއްމުކޮށްފައެވެ. ސަފާރީ ބޯޓުތަކުގެ ކްރޫއިންނާއި ފަތުރުވެރިން އެއްވެސް ގޮތަކައް މީހުން އުޅޭ ރައްރަށައް ނުފޭބުމާއި، ރައްރަށުން މީހުން ބޯޓުތަކައް ނޭރުވުމަށް ބޯޓިންގ އެސޯސިއޭޝަނުން ދަނީ އިލްތިމާސް ކުރަމުންނެވެ.

ބޯޓުތަކުން ފުރާ ފަތުރުވެރިންނައް ބޭނުންވާ ޕީސީއާރް ޓެސްޓް އެޗްޕީއޭއިން އަންގާފައިވާ ޕްރޮޓޮކޯލްގެ ތެރެއިން ސަރަހައްދީ މަރުކަޒުުތައް މެދުވެރިކޮއް ހެދުމަށް ބޯޓިންގ އެސޯސިއޭޝަނުން ވަނީ މަގުފަހިކޮށްދީފައެވެ. އަދި ހުޅުމާލޭ ޖެޓީ ސަރަހައްދުގައި ސާމްޕަލް ނެގޭނޭ ޚިދުމަތްވެސް ވަނީ ގާއިމު ކޮށްފައެވެ.