މޮރިޝަސްގެ ފަރަށް ބޯޓު އެރިއިރު ފަޅުވެރިން ތިބީ އުފަންދުވަސް ފާހަގަކުރަން!

މިދިޔަ މަހުގެ 25 ވަނަ ދުވަހު މޮރިޝަސްގެ ފަރަށް ކާގޯ ބޯޓެއް އަރައި، އެއިން އެތައް ހާސް ޓަނެއްގެ ތެޔޮ ލީކުވަމުންދާއިރު، ބޯޓު ފަރަށް އެރިއިރު އޭގެ ފަޅުވެރިން ތިބީ އުފަންދުވަހެއް ފާހަގަކުރަން ކަމަށް މީޑިއާ ރިޕޯޓްތައް ބުނެފިއެވެ.

މި ބޯޓުގެ ކެޕްޓަން ވަނީ މި މައްސަލައިގައި ހައްޔަރުކޮށްފައެވެ. ބޯޓުގެ ކެޕްޓަންއާއި އޭނާގެ ދަށުން ހުންނަ މީހާ އަންގާރަ ދުވަހު ޚާއްސަ ކޯޓު އަމުރެއްގެ ދަށުން ހައްޔަރު ކޮށްފައިވާއިރު ތަހުގީގަށް ބޯޓުގެ އިތުރު ފަޅުވެރިންވެސް ހާޒިރު ކުރުމަށް ނިންމާފައިވާކަމަށް މޮރިޝަސްގެ ފުލުހުން ވަނީ ބުނެފައެވެ. ބޯޓުގެ ކެޕްޓަނަކީ އިންޑިއާ މީހެކެވެ.

މިހާތަނަށް މި ހާދިސާއާއި ގުޅިގެން ހާމަކޮށްފައިވާ މައުލޫމާތުތަކަށް ބަލާއިރު ބޯޓު ފަރަށް އެރިވަގުތު ބޯޓުގެ ފަޅުވެރިން ތިބީ އުފަންދުވަސް ފާހަގަކުރަން ކަމަށް މީޑިއާ ރިޕޯޓްތައްވަނީ ބުނެފައެވެ. މިދިޔަ ޖުލައި މަހުގެ 25 ވަނަ ދުވަހު ބޯޓު ފަރަށް އަރައި ލިބުނު ގެއްލުންތަކުގެ ސަބަބުން ބޯޓުން ބައެއް ހަލާކުވެ މި މަހުގެ 6 ވަނަ ދުވަހުން ފެށިގެން ފަރުމައްޗަށް ތެޔޮ ދަނީ އެޅެމުންނެވެ. މިއާއެކު މޮރިޝަސްގެ ސަރުކާރުން ވަނީ ތިމާވެށީގެ ނުރައްކަލުގެ ހާލަތެއް އަތުވެއްޖެ ކަމަށް އިއުލާންކޮށްފައެވެ.

ބޯޓުން ބޭރުވަމުންދާ ތެޔޮ ފަރުމަތީގެ ބޮޑު ސަރަހައްދަކަށް ފެތުރިފައިވާއިރު، މިކަމުގެ ސަބަބުން މަހުގެ ދިރުންތަކާއި ކަނޑުގެ އެހެން ދިރުންތަކަށް ގެއްލުން ލިބިފައިވެއެވެ. ސައިންސްވެރިން ބުނެފައިވަނީ މިއީ މިހާތަނަށް ތިމާވެށީގެ ގޮތުން ލިބުނު އެންމެ ބޮޑު ގެއްލުން ކަމަށެވެ. މިކަމާއި ގުޅިގެން އެމަރޖެންސީ ކުރޫން ވަނީ ބޯޓުގައި ބާކީ ހުރި ތެޔޮ ފަރުމައްޗަށް ބޭރުވުމުގެ ކުރިން ތެޔޮތައް ނަގާފައެވެ.

މި ބޯޓުގެ ބްލެކް ބޮކްސް ދިރާސާ ކުރުމުގެ މަސައްކަތް ކުރަމުންދާއިރު، ސިންގަޕޫރުން ބުރަޒިލްއަށް ދަތުރުކުރަމުން ދިޔަ އެ ބޯޓު މޮރިޝަސްގެ ފަރާއި އެހާ ކައިރިން ދަތުރުކުރަން ޖެހުނީ ކީއްވެގެން ކަމާއިމެދު އޭގެ ފަޅުވެރިންނާއި ދަނީ ސުވާލު ކުރަމުންނެވެ.

މޮރިޝަސްގެ މެރިޓައިމް އޮފިޝަލަކާއި ހަވާލާދީ މީޑިއާތަކުގައި ރިޕޯޓްކޮށްފައިވާގޮތުން، ބޯޓުގައި އުފަންދުވަސް ފާހަގަކުރި މައްސަލައިގައި ފަޅުވެރިންނާއި ދަނީ ސުވާލު ކުރެވެމުންނެވެ. އެގޮތުން ޕާޓީ ބޭއްވި ގަޑިއަކީ ބޯޓު ފަރަށް އެރި ވަގުތު ކަމެއް ސީދާ އަދި ސާފު ނުވާ ކަމަށް އޮފިޝަލް ބުނެފައިވެއެވެ.

ބޯޓު ފަރަށް އެރި މައްސަލައިގައި ހައްޔަރުކުރި އިންޑިއާއަށް ނިސްބަތްވާ 58 އަހަރުގެ ކެޕްޓަން ސުނިލް ކުމާރު ނަންދޭޝްވަރާއި ފަސްޓް އޮފިސަރުގެ މައްޗަށް ވަނީ ނުރައްކާތެރިކަމާއެކު ދުއްވި ކަމުގެ ދައުވާ އުފުލާފައެވެ. އަދި އެ ދެމީހުން ވަނީ ޕޯޓް ލުއިސްގެ ކޯޓަށް ހާޒިރުކޮށްފައެވެ.

ބޯޓުން ތެޔޮ ބޭރުވެ ގެއްލުންތައް ލިބެމުންދާއިރު، އެ ބޯޓާ މެދު ހަދާނެ ގޮތެއް ކަމާބެހޭ ފަރާތްތަކުން ދަނީ ބަލަމުންނެވެ. އެގޮތުން ގްރީން ޕީސް އެފްރިކާގެ ސީނިއާ ކްލައިމެޓް އެންޑް އެނަރޖީ ކެމްޕެއިން މެނޭޖަރ ހެޕީ ޚާމްބުލް ނެރުނު ބަޔާނެގައި ބުނެފައިވަނި ބޯޓު ފައްތާލައިފި ނަމަ އެކަމުގެ ސަބަބުން ބައޯޑައިވާސިޓީއާއި ބޯޓުގައި ހުރި އެކި ބައިތަކުގައި އެކުލެވޭ ވިހާ މާއްދާތަކުގެ ސަބަބުން ކަނޑުގެ ދިރުންތަކަށް އެކަމުގެ ނުރައްކާ ވެދާނެ ކަމަށެވެ. ބޯޓު ފައްތައިފި ނަމަ އެކަމުގެ ނުރަނގަޅު އަސަރުކުރާނެ ކަމަށް ބެލޭ އެއް ސަރަހައްދަކީ ފްރެންޗް ޔޫނިއަންއެވެ.

ފަރަށް އެރި ބޯޓު އޮޕަރޭޓް ކުރާ ކުންފުނި ނަގަޝިކި ޝިޕިން އިން ބުނެފައިވަނީ ބޯޓުގެ ފަޅުވެރިންނާއި އާއިލާތަކަށް އެހީތެރިވާނެ ކަމަށެވެ. އަދި ބޯޓު ފަރަށް އެރުމުގެ ސަބަބުން ގެއްލުންވަމުންދާތީ އެކަމަށް މައާފަށް އެދޭ ކަމަށެވެ.

ސައިންޓިސްޓުން ބުނެފައިވަނީ މިހާތަނަށް ލިބުނު ގެއްލުން އެއްކޮށް ދެނެގަނެވިފައި ނުވާ ކަމަށާއި، ނަމަވެސް އެކަމުގެ ސަބަބުން މޮރޮޝަސާއި އެގައުމުގެ އިގްތިސާދު ބަރޯސާވެފައިވާ ފަތުރުވެރިކަމަށް އެތައް އަހަރަކަށް ގެއްލުން ލިބިގެންދާނެއެވެ. އަދި އެތަނުން ބޯޓު ނެގުމަށް އެތައް މަސް ދުވަހެއް ހޭދަވާނެކަމަށް ވެސް ސައިންސްވެރިން އަންދާޒާކުރެއެވެ.

އެމްވީ ވަކަށިއޯ ފަރަށް އެރި އިރު އޭގައި 4000 ޓަނުގެ ތެޔޮ ހުއްޓެވެ. މޮރިޝަސްގެ ނެޝަނަލް ކްރައިސިސް ކޮމިޓީއިން ބުނެފައިވަނީ އެ ބޯޓުގެ ކުރީކޮޅުން ބޮޑު ބައެއް ބޯޓާއި ވަކިވެފައިވާ ކަމަށެވެ. ފޮޓޯތަކުން ފެންނަ ގޮތުން ބޯޓު ދެބުރިވެ ވަކިވެފައިވާއިރު، އޭގައި ހުރި ތެޔޮތައް އިތުރަށް ފަރުމައްޗަށް އެޅިދާނެކަމަށް ބަލާ ޖަޕާންގެ ރެސްކިއު ޓީމުން ވަނީ އެހެން އުޅަނދަކަށް ނަގާފައެވެ.

މި ހަފްތާގެ ކުރީކޮޅު މޮރިޝަސްގެ ބޮޑުވަޒީރު ޕްރަވިންދު ޖުގްނައުތު ވިދާޅުވީ ވަކަޝިއޯ އޮޕަރޭޓް ކުރާ ކުންފުނިން ބޯޓުގައި ބާކީ ހުރި ތެޔޮތަށް އެހެން އުޅަނދަކަށް ނަގާފައިވާ ކަމަށާއި، އަދިވެސް ބޯޓުގައި 100 އެއްހާ ޓަނުގެ ތެޔޮ އެބަހުރި ކަމަށެވެ.

މޮރިޝަސްގެ ސަރުކާރުން ވަނީ ބޯޓު ފަރަށް އެރުމާއެކު އެތަނުން ބޯޓު ނެގުމަށް ކުރި މަސައްކަތް ރަނގަޅު ނޫން ކަމަށް ބުނެ ފާޑު ކިޔާފައެވެ. ބައިނަލް އަގުވާމީ މީޑިއާތަކުން ރިޕޯޓްކޮށްފައިވާ ގޮތުން ބޯޓު އެތަނުން ނެގުމުގެ މަސައްކަތް ފެށުމަށް ބޯޓުގެ ވެރި ފަރާތުން މަސައްކަތް ފަށާފައިވަނީ ތިން ހަފްތާ ފަހުންނެވެ.

މީގެ އިތުރުން ފަރުމައްޗަށް އެޅިފައިވާ ތެޔޮތައް ސާފުކުރުމަށް ކުރަމުންދާ މަސައްކަތަށާއި، ލިބިފައިވާ ގެއްލުމާއި އަދި އެއްވެސް ބައެއްގެ ދިރިއުޅުމަށް އަސަރުކޮށްފައިވާ ނަމަ އޭގެ ބަދަލު ލިބޭނެ ކަމަށް އުއްމީދުކުރާ ކަމަށެވެ. އަދި މި މައްސަލައިގައި މޮރިޝަސްގެ ސަރުކާރުން އެއްވެސް ވަރަކަށް ޒިންމާ ނަގަން ބޭނުން ނުވާ ކަމަށް ވަނީ ބުނެފައެވެ. ސަރުކާރުގެ މި އެދުމާއެކު ބޯޓުގެ ވެރިފަރާތުން ވަނީ އެކަމަސް އިޖާބަދީ ގެއްލުމުގެ ބަދަލު ހޯދުމަށް އެދުމަށް އެދިފައެވެ.

އެމްވީ ވަކަޝިއޯ ފަރަށް އުރުމުގެ ސަބަބުން 1000 ޓަނުގެ ތެޔޮ ވަނީ ފަރުމައްޗަށް އެޅިފައެވެ. މީގެ އިތުރުން 1180 ޓަނުގެ ތެޔޮ ކަނޑަށް ވެސް ބޭރުވެފައިވާ ކަމަށް ރިޕޯޓްތައް ބުނެއެވެ. އަދި ތެޔޮތައް ޖަމާވި ތަންތަނުގެ ތެރޭގައި މުރަކަ ފަރުތަކާއި، ކަނޑޫފާތަކާއި ހިމާޔަތްކޮށްފައިވާ ޗަކަ ބިންތައް ހިމެނެއެވެ. މި ތަންތަނަކީ ފަތުރުވެރިންގެ މެދުގައި މަޝްހޫރު ތަންތަނެވެ.