ކޮވިޑް-19 އާއި ގުޅިގެން ދައުލަތުގެ ބަޖެޓުން 15 ވަރަކަށް ބިލިއަން ރުފިޔާގެ ޝޯޓޭޖެއް އުޅެދާނެ: ނާޝިޒު

ކޮވިޑް-19 ގެ ބަލިމަޑުކަމާއި ގުޅިގެން ރާއްޖެ ކުރިމަތިލަމުންދާ ހާއްސަ ހާލަތުގެ ސަބަބުން މި އަހަރުގެ ދައުލަތުގެ ބަޖެޓުން 15 ވަރަކަށް ބިލިއަން ރުފިޔާގެ ޝޯޓޭޖެއް އުޅެދާނެ ކަމަށް ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރު މުހައްމަދު ނާޝިޒު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ނާޝިޒު ވިދާޅުވީ ކޮވިޑް-19 އާއި ގުޅިގެން ދިމާވި ހާއްސަ ހާލަތުގެ ސަބަބުން ދައުލަތަށް ވަންނަ އާމްދަނި ދަށްވެ، ގާތްގަޑަކަށް 14 ނުވަތަ 15 ވަރަކަށް ބިލިއަން ރުފިޔާގެ ޝޯޓޭޖެއް މި އަހަރުގެ ބަޖެޓުގައި އުޅޭނެ ކަމަށް ލަފާކުރެއްވޭ ކަމަށެވެ. އަދި އެ ޝޯޓޭޖް ފައިނޭންސް ކުރަން އިތުރު އެޑިޝަނަލް ފައިނޭންސް ނަގަން ޖެހޭ ކަމަށާއި، ނުނަގައިފިނަމަ ސަރުކާރެއް ނުހިނގާނެ ކަމަށެވެ.

އޭނާ ވިދާޅުވީ ސަރުކާރުގެ މުވައްޒަފުންނަށް ދޭންޖެހޭ މުސާރަ ވެސް ނުދެވޭނެ ކަމަށާއި، ސަރުކާރެއް އޮންނަނީ މައްސަލަތައް ހައްލުކޮށް ރައްޔިތުންނަށް ދިމާވާ ކަންކަމުގައި ހައްލު ހޯދައި ދިނުމަށް ކަމަށެވެ.

ނާޝިޒު ވިދާޅުވީ ސަރުކާރު ބަދަލުވި މަރުހަލާގައި ޓްރާންސިޝަނަލް ފައިނޭންސް ކޮމިޓީގެ ކޯ ޗެއަރއެއްގެ ގޮތުގައި މަސައްކަތް ކުރެއްވިއިރު އެއިރު ހެދި ޕްލޭންގައި ފުރަތަމަ ކަމަކަށް އެންމެ ބޮޑު ސަމާލުކަމެއް ދިނީ ދިވެހި ރައްޔިތުންނަށް ފޯރުކޮށްދޭންޖެހޭ އަސާސީ ހިދުމަތްތަކަށް ކުރިއަށް ގެންދަން ޖެހޭ މަޝްރޫއުތައް ކުރިއަށް ގެންދިއުމަށް ކަމަށެވެ. އޭގެ ތެރޭގައި ފެނާއި ނަރުދަމާ، ސިއްހީ ހިދުމަތް އަދި އަރައި ފޭބުމުގެ ދަތިތައް ހުރި ރަށްރަށުގައި އެ ދަތިތައް ފިލުވުން ކަމަށް ނާޝިޒު ވިދާޅުވިއެވެ.

ނާޝިޒު ވިދާޅުވީ ކޮވިޑާއި ގުޅިގެން އާމްދަނީއަށް އަސަރު ކުރުމުގެ ސަބަބުން ޓްރާންސިޝަނަލް މަރުހަލާގައި ހެދި ޕްލޭނާ އެއްގޮތަށް ކަންތައްތައް ނުހިނގާ ކަމަށާއި، އެހެން އެގޮތަށް ދިމާވާން ޖެހުނީ ކޮވިޑާއި ގުޅިގެން ކަމަށެވެ. އަދި ކޮވިޑް-19 އާއި ހެދި އަހަރުގެ ބޮޑު ބައެއް މި ދިޔައީ ކަންތައްތަކާއި މަޝްރޫއުތައް ކުރިއަށް ދާންޖެހޭ ސްޕީޑުގައި ނުގޮސް ކަމަށާއި، އެހެންކަމުން އެއަށް ކޮންމެވެސް ވަރެއްގެ ބަދަލުތަކެއް އަންނާނެ ކަމަށެވެ.