އާސަންދައިގެ ދަށުން ބޭސްފަރުވާއަށްދާ ފަސްވަނަ ބެޗް އިންޑިއާއަށް ފުރައިފި
20 އޯގަސްޓު 2020 | ބުރާސްފަތި 14:10ކޮޗިންއަށް ފުރީ 18 ބަލިމީހުންނާއި 18 އެހީތެރިން އަދި 4 މެޑިކަލް އެސްކޯޓުން
ވެލޭނާ އިންޓަނޭޝަން އެއަރޕޯޓުން ބަޔަކު ފުރުމަށް ތައްޔާރުވަނީ، ބުރާސްފަތި ދުވަހު އިންޑިއާ ފުރީ ފަސްވަނަ ބެޗް
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އެދިވަޑައިގަތުމުގެ މަތިން އިންޑިއާ ސަރުކާރުން ދެއްވާފައިވާ ޚާއްސަ ހުއްދައާއިއެކު އިންޑިއާއިން ފަރުވާ ހޯދުމަށް ދާ ފަސްވަނަ ބެޗް ބުރާސްފަތި ދުވަހު ފުރައިފިއެވެ.
ބުރާސްފަތި ދުވަހުގެ ހަވީރު 16:15 ގައި އިންޑިއާގެ ކޮޗިންއަށް ފުރީ 18 ބަލިމީހުންނާއި 18 އެހީތެރިން އަދި 4 މެޑިކަލް އެސްކޯޓުންނެވެ.
އާސަންދައިގެ ޚަރަދުގައި ފުރި މިމީހުންނަށް ފަރުވާ ދިނުމަށް ހަމަޖެހިފައިވަނީ އަމްރީތާ ހޮސްޕިޓަލުންނެވެ.
މީގެ އިތުރުން އާސަންދައިން ބުނީ މިފްލައިޓްގައި އެންސްޕާގެ ހަރަދުގައި ދިޔަ 3 އެހީތެރިންނާއި، އަމިއްލަ ހަރަދުގައި ޓިކެޓް ނަގައިގެން ދިޔަ ތިން އެހީތެރިން ހިމެނޭ ކަަމަށެވެ.
އިންޑިއާއިން މި މީހުން ކޮވިޑަށް ޓެސްޓު ކުރާނެއެވެ. އަދި އެ ގައުމުގައި 14 ދުވަހުގެ ކަރަންޓީން ފުރިހަމަކުރަންޖެހޭނެއެވެ. 14 ދުވަސް ފަހުން އަނެއްކާވެސް ކޮވިޑް-19 އަށް ޓެސްޓު ކުރާނެއެވެ.. ބަލިމީހުންނާއި އެހީތެރިން ވެސް ކަރަންޓީނުގައި ތިބޭނީ ފަރުވާ ހަމަޖެހިފައިވާ ހޮސްޕިޓަލުގައެވެ. އަދި ކަރަންޓީނުގެ މުއްދަތުގައި ވެސް އެމީހުންގެ ފަރުވާކުރިއަށް ގެންދެވޭނެއެވެ.
