ގްރޭޑް 11 އަދި 12 ދަރިވަރުންނަށް ރިވިޝަން ކްލާސްތައް އަންނަ އާދިއްތަ ދުވަހު ފަށަނީ
20 އޯގަސްޓު 2020 | ބުރާސްފަތި 13:47އިމްތިހާނަށް ތައްޔާރުކުރުމުގެ ގޮތުން ކުރިއަށް ގެންދާ ކްލާސްތަކެއް
އެޑިއުކޭޝަން މިނިސްޓަރު ޑރ.އައިޝަތު އަލީ ސްކޫލުގެ ދަރިވަރުންތަކަކާ ބައްދަލުކުރައްވަނީ
ކޮވިޑް-19އާ ގުޅިގެން ކުރިއަށް އޮތް ދެ ހަފްތާ ސްކޫލުތައް ބަންދުކުރި ނަމަވެސް ގްރޭޑް 11 އަދި 12ގެ ދަރިވަރުންނަށް ރިވިޝަން ކްލާސްތައް ކުރިއަށް ގެންދިއުމުގެ ހުއްދަ ދީފިއެވެ.
އެޑިއުކޭޝަން މިނިސްޓްރީން ބުނީ ކަމާބެހޭ ފަރާތްތަކުގެ ލަފާގެ މަތިން, އޭލެވެލް އަދި އޭ.އެސް އިމްތިހާން ހަދާ ދަރިވަރުން އިމްތިހާނަށް ތައްޔާރުވުމުގެ ގޮތުން ސްކޫލަށް ގެންގޮސްގެން ކިޔަވައިދިނުމުގެ ހުއްދަ ދީފައިވާ ކަމަށެވެ. އަދި ރިވިޝަން ކްލާސްތައް މިއަންނަ އާދިއްތަ ދުވަހުން ފެށިގެން ކުރިއަށް ގެންދާނެ ކަމަށް މިނިސްޓްރީން ބުނެއެވެ.
އެޑިއުކޭޝަން މިނިސްޓްރީން ބުނީ ގްރޭޑް 11 އާއި 12ގެ ދަރިވަރުން ސްކޫލަށް ގެންގޮސް ރިވިޝަން ކްލާސްތައް ކުރިއަށް ގެންދިއުމަށް ނިންމީ މިއަހަރު އިމްތިހާން އޮތުމުން ކަމަށެވެ. އަދި އޭލެވެލްގެ އޭއެސް އިމްތިހާނަށް ދަރިވަރުން ތައްޔާރުކުރުވުމުގެ ގޮތުން ކްލާސްތައް ނެގުން މުހިންމު ކަމަށް މިނިސްޓްރީން ބުނެއެވެ.
ކޮވިޑް-19 އާ ގުޅިގެން މިއަހަރުގެ މެއި-ޖޫން ގައި އޮންނަ އޭލެވެލް އިމްތިހާނު ވަނީ މިއަހަރުގެ އޮކްޓޯބަރު-ނޮވެމްބަރަށް ބަދަލުކޮށްފައެވެ.
ކޮވިޑް-19 އާ ގުޅިގެން ރާއްޖޭގެ ހުރިހާ ސްކޫލްތަކެއްގެ ކިޔެވުން މެދުކަނޑާލުމަށް ފަހު ޖުލައި 1 ގައި ވަނީ މާލޭ ސިޓީގެ ސްކޫލްތައް ފިޔަވައި ރާއްޖޭގެ ހުރިހާ ސްކޫލްތަކެއްގައި ގްރޭޑް 1 ން 12 އަށް ކިޔަވައިދޭން ފަށާފައެވެ. އަދި މާލޭސިޓީގެ ސްކޫލްތަކުގައި ކިޔަވައިދީފައި ވަނީ ކީ ސްޓޭޖް 4 އަދި 5 (ގްރޭޑް 9 ން 12) އަށެވެ.
މީގެ އިތުރުން ކީ ސްޓޭޖް3 (ގްރޭޑް 7 އަދި 8) ގެ ކިޔެވުން މާލޭ ސިޓީގެ ސްކޫލްތަކުގައި އޮގަސްޓު 16 ގައި ފެށުމަށް ވަނީ އިއުލާން ކުރެވިފައެވެ. އީދު ބަންދާއި، މިޑް ޓާމު ބަންދަށް ސްކޫލްތައް ބަންދުވުމަށްފަހު އަލުން ހުޅުވުމަށް ހަމަޖައްސާފައިވާ ތާރީޚަކީ މި ހިނގާ އޮގަސްޓް މަހުގެ 9 ވަނަ ދުވަހެވެ. ނަމަވެސް ކޮވިޑްގެ ހާލަތާއި ގުޅިގެން ސްކޫލްތައް އަލުން ބަންދު ކުރުމަށް އެޑިޔުކޭޝަން މިނިސްޓްރީން މިވަނީ ނިންމާފައެވެ.
މިނިސްޓްރީން ބުނީ މިނިސްޓްރީއިން އަބަދުވެސް އެންމެ އިސްކަމެއްދޭނީ ދަރިވަރުންގެ ސިއްހަތަށް ކަމުގައިވާތީ، ކޮވިޑް-19ގެ މިހާރުގެ ހާލަތަށްރިޢާޔަތް ކުރުމަށްފަހު، ދަރިވަރުން އާއިލާއާއެކު ގޭގައި ތިބުމަކީ މިވަގުތަށް އެންމެ ރައްކާތެރިގޮތް ކަމުގައި ދެކޭ ކަމަށެވެ. ގޭގައި ދަރިވަރުން ތިބޭއިރު، އާންމު ސާފުތާހިރުކަމަށް ސަމާލުކަން ދިނުމަށާއި، ހެލްތް ޕްރޮޓެކްޝަން އެޖެންސީއާއި ކަމާގުޅޭ އެހެނިހެން މުއައްސަސާތަކުންދޭ ލަފައާއި އިރުޝާދުތަކާ އެއްގޮތަށް އަމަލު ކުރުމަށް ދަރިވަރުންނާއި މުދައްރިސުން އަދި ބެލެނިވެރިންނަށް ހަނދާކޮށްދޭ ކަމަށް މިނިސްޓްރީން ބުނެއެވެ.
